Məlum olub ki, bir neçə gün əvvəl intihar edən Bakı Ağır Cinayətlər Məhkəməsinin hakimi Rahib Salmanovun icraatında 84 cinayət işi olub. O, sonuncu işlərini avqustun 31-nə təyin edib. İntihar etdiyi gün hakim 9 cinayət işi araşdırmalı olacaqmış. Həmin cinayətlərdən biri bıçaqlanma hadisəsi ilə, digər 8 cinayət işi narkotiklərlə bağlı olub.
Rahib Salmanov intihar etməzdən əvvəl sentyabrın 4-nə 15, sentyabrın 7-nə 10, sentyabrın 11-nə 17, sentyabrın 14-nə 7, sentyabrın 18-nə 8, sentyabrın 21-nə 8, sentyabrın 25-nə 2, sentyabrın 28-nə 3, noyabrın 2-nə 6, noyabrın 5-nə isə 1 cinayət işi üzrə məhkəmə iclası təyin edib.
Qeyd edək ki, intihar edən hakimin araşdırdığı cinayətlərdən 2 icraatda rüşvət verməyə təhrik etmə, 4 icraatda dələduzluq, 2 icraatda mənimsəmə, 1 icraatda qətl, 5 icraatda isə qəsdən sağlamlığa xəsarət yetirmə ilə bağlı cinayət işləri olub. Digər cinayət işləri isə narkotik vasitələrin qanunsuz dövriyyəsi ilə bağlı olub. Qanunverciliyə görə, bu cinayət işlərinin digər hakimlərin icraatına verilməsi üçün qərar qəbul olunacaq. Xatırladaq ki, Bakı Ağır Cinayətlər Məhkəməsinin hakimi Rahib Salmanov avqustun 28-də müalicə aldığı xəstəxananın yuxarı mərtəbəsindən özünü ataraq həyatına son qoyub. Hazırda bu iş üzrə Nərmanov rayon Prokurorluğunda araşdırma aparılır.
Burada olduqca maraqlı detal ortaya çıxır. Görünən budur ki, hakimlərin iş qrafiki olduqca sıxdır. Belə qrafik onların ədalətli qərarlar qəbul etməsinə hansısa formada mane olurmu?
Hüquqşünas Şəmsəddin Əliyev “Bakı-Xəbər”ə açıqlamasında bildirdi ki, bu, cəmiyyət üçün kifayət qədər ciddi bir siqnaldır: “Məhkəmə hakimiyyətində kifayət qədər ciddi islahatların həyata keçirilməsinə ehtiyacın olduğu üzə çıxır. Doğrudan da əhalinin sayına görə bizdə olan hakimlərin sayı çox azdır. Əvvəl il ərzində 21 min cinayət qeydiyyata alınırdısa, bu gün artıq 32-33 min cinayət qeydə alınır.
Cinayətlərin statistikasında da artım var. Sosial ədaləti bərpa etməli olan bir hakimin intihar etməsi də məsələnin ciddiliyindən xəbər verir. Bu işlə bağlı istintaq gedir və biz onun gedişinə təsir etmək fikirindən uzağıq. Biz sadəcə hakimin iş qrafiki ilə bağlı üzə çıxan mənzərəni təhlil edirik. Mən hesabladım, tək sentyabr ayı ərzində mərhum hakim 70-ə yaxın işə baxacaqmış. Hakimin icraatında olan cinayət işləri müxtəlif səpkili və çoxşaxəlidir. Yaxşı olardı ki, hakimlər də cinayət işləri üzrə ixtisaslaşardı. Belə olanda onların da gərginliyi azalmış olar. Bizdə hətta vəkillərin sayında azlıq hiss edilir. Məhkəmə Hüquq Şurası hakim ştatlarının artırılması ilə bağlı təkliflər verməlidir. Bir daha görünür ki, belə məsələləri nizama salmaq üçün Məhkəmə Hüquq Şurasının gücü yetərincə deyil. Heç zaman hakim fəaliyyəti də olmayanlar, bəzən hakimlərlə bağlı problemlərin həllində məsul şəxs kimi göstərilir. Bilirsiniz ki, ədliyyə naziri artıq Məhkəmə Hüquq Şurasının sədri funksiyasını daşımır. Bu yaxınlarda mənə məlum oldu ki, Bərdə rayonunda cəmi 4 hakim var. Maraqlandım, deyirlər ki, il ərzində 1000-dən çox cinayət işinə baxırlar. Belə olanda hakimlərin baxdıqları işlərin keyfiyyəti də aşağı olur. Çünki ətraflı məhkəmə istintaqını həyata keçirmək üçün qətiyyən vaxt qalmır. Hakimin sərbəstliyi üçün vaxtı olmalıdır. Elə ittiham aktı var ki, 150-200 səhifə olur. Hakim onun hamısını diqqətlə oxumalıdır. Buna zaman yetmirsə, deməli hakim işi obyektiv araşdırmış olmur. Buna görədir ki, Avropa Məhkəməsinə çox şikayət olur və onların böyük qismi təmin olunur. Bütün bunların olmaması üçün hər rayonda minimum 3 hakim ştatı artırılmalıdır”.
Məhəmmədəli QƏRİBLİ
