ABŞ Prezidentinin xüsusi nümayəndəsi Cared Kuşner bildirib ki, Vaşinqton tezliklə Rusiya, ABŞ və Ukraynanın iştirakı ilə Ukraynadakı münaqişənin həlli ilə bağlı üçtərəfli danışıqlar formatına qayıdacaq. "European Pravda" qəzetinin məlumatına görə, Kuşner Rusiya prezidenti Vladimir Putinlə əvvəlki gün Moskvada keçirdiyi görüşü "çox konstruktiv və məzmunlu" adlandırıb.
"Artıq hər iki tərəflə danışmışıq, ona görə də üçtərəfli formata qayıtmaqda tezliklə irəliləyiş əldə edəcəyimizə ümid edirik" – deyə Kuşner jurnalistlərə bildirib.
O qeyd edib ki, Putinlə görüşdə Amerika tərəfi "indiyə qədər işə yaramayan bir çox ideyanı" müzakirə edib və həmçinin davamlı sülhə nail olmaq üçün hansı elementlərin zəruri olduğunu və Rusiya, Ukrayna və digər ölkələrin belə bir razılaşmadan hansı faydaları əldə edə biləcəyini müəyyən etməyə çalışıb. "Bu, çox səmərəli bir dialoq idi", - deyən Kuşner əlavə edib ki, o və Uitkoff danışıqlar prosesinə kömək edə biləcəyinə inandığı bir sıra yeni ideyalar irəli sürüblər.
Kuşner həmçinin xatırladıb ki, Amerika nümayəndələri təxminən altı aydır ki, regiona səfər etməyiblər.
Tahir TAĞIYEV
