Xaqani Cəfərli: “Birincisi, bu kampaniya Türkiyənin rəsmi dairələri başladıb”
Ceyhun Məmmədov: “...Türkiyənin ayrı-ayrı siyasi şəxsləri, müxtəlif ictimai-siyasi simaları Azərbaycana qarşı kampaniyanı davam etdirirlər”
Türkiyə Prezidenti Rəcəb Tayyib Ərdoğanın Azərbaycan Prezidenti İlham Əliyevə zəngindən sonra da Türkiyənin bəzi media resurslarında və sosial şəbəkə hesablarında Azərbaycanda hicabla bağlı həbslərin guya hələ də davam etməsi barədə informasiyalar yayılır.
Media və Yayım Şurası ölkəmizə qarşı davam edən bu dezinformasiya kampaniyasına qarşı bəyanat yayıb və bəyan edib ki, Türkiyənin bəzi media resurslarında və sosial şəbəkə hesablarında Azərbaycanda hicabla əlaqədar kütləvi həbslərin başladığı və insanların bu səbəbdən ölkəni tərk etdiyi barədə yayılan əsassız iddialar dini həssaslıqlardan istifadə etməklə ictimai rəyi manipulyasiya etməyə və ölkəmiz haqqında yanlış təsəvvür formalaşdırmağa yönəlmiş açıq dezinformasiya nümunəsidir.
Ərdoğanın zəngindən sonra Türkiyənin media resurslarında və sosial şəbəkə hesablarında Azərbaycana qarşı xüsusilə də hicabla bağlı cəhdləri niyə səngimir, niyə davam edir?
Politoloq Xaqani Cəfərli baki-xeber.com-a bildirdi ki, Türkiyə prezidenti Rəcəb Tayyip Ərdoğanın Azərbaycan prezidenti İlham Əliyevlə telefon danışığından sonra Azərbaycana qarşı aparılan qarlama, böhtan və iftira kampaniyasının səngiyəcəyini gözləmək sadəlövlük olardı. “Birincisi, bu kampaniya Türkiyənin rəsmi dairələri başladıb. İkincisi, hakimiyyətin asılı olduğu dini topluluqlar belə hallarda böyük “qənimət” əldə etmədən geri çəkilmirlər. Bunu Səudiyyə Ərəbistanı, Misirlə gərginlik zamanı da müşahidə etmişik. Açığını demək lazımdır ki, Türkiyədəki sayları 400-dən çox olan təriqqət və camaatların ən güclüləri FETO-nun yerini tutmağa çalışırlar. Bu istəklərinin gerçəkləşməsinə yardım etməsi üçün Türkiyə hakimiyyətinə də təzyiq etməkdən çəkinmirlər. Çünki yaxşı bilirlər ki, onların dəstəyi olmasa Ərdoğan hakimiyyətdə qala, iqtidarın davamlığını təmin edəcək “varis” planın həyata keçirə bilməz. Ərdoğanın sabit 33-34 faizlik səsi var ki, bunlar həmin təriqqət və camaatların səsidir.
Təriqqət və camaatların nə qədər güclü olduğuan şübhə edən varsa, gedib araşdırsın. Hələ 50 qabaq bu təriqqət və camaatlar hökuməti onlarla hesablaşmağa vadar edirdi. Mərhum Süleyman Dəmirəli istefaya məcbur edəcək qədər gücləri olub. İndi isə ən azı iki dəfə gücləniblər. Yüz milyardla dollar vəsaitə, yüz minlərlə iş yerinə nəzarət edirlər. Bu mənada indiki vəziyyət çox fərqlidir. Azərbaycanın maraqlarını qorumaq üçün fərqli addımlara ehtiyac var”-deyə X.Cəfərli qeyd etdi.
Millət vəkili Ceyhun Məmmədov baki-xeber.com-a açıqlamasında bu prosesin davam etdirildiyini təəssüflə qeyd etdi: “Təəssüflə bildirmək lazımdır ki, bu proses davam edir. Yəni bu gün də biz Türkiyədə Azərbaycana qarşı aparılan çirkin kampaniyanın davam etdiyini görürük. Çox təəssüf ki, bir çox dairələr davamlı olaraq Azərbaycanı hədəf alır və Azərbaycana qarşı davamlı olaraq xoşəgəlməz fikirlər səsləndirirlər. Bu prosesin davamlı xarakter alması, ardıcıl həyata keçirilməsi qəbul edilməzdir. Yəni Azərbaycanla Türkiyə arasında danışqlar olmuşdu, münasibətlərin normallaşması gözlənilirdi və bu istiqamətdə addımlar atılması nəzərdə tutulmuşdu. Amma Türkiyənin ayrı-ayrı siyasi şəxsləri, müxtəlif ictimai-siyasi simaları Azərbaycana qarşı kampaniyanı davam etdirirlər. Təbii ki, bu da münasibətlərin normallaşmasına birmənalı olaraq çox ciddi təsir göstərir. Yəni bu cür cəhdlər, bu cür addımlar bizim münasibətlərimizə çox ciddi zərər gətirir və münasibətlərdə müəyyən problemlər yaradır. Bizim gözləntilərimiz ondan ibarətdir ki, bu prosesə son qoyulsun və Azərbaycana qarşı aparılan bu çirkin kampaniyalar dayandırılsın”.
C.Məmmədov qeyd etdi ki, bu kampaniyalar, bu addımlar yol verilməzdir, bunlar ciddi narahatlıq doğuran məsələdir və münasibətlərimizə də ciddi problemlər yaratmaqdadır. “Biz çox arzu edərdik ki, Türkiyə tərəfi də buna anlayışla yanaşsın və bu kampaniyalara və bu təbliğatlara və bu yanlış fəaliyyətlərə son qoyulsun, Azərbaycana qarşı atılan addımlar dayandırılsın”-deyə millət vəkili vurğuladı.
İradə SARIYEVA
