İlk dəfə olaraq metropolis Ermənistanı özünə yaxınlaşdırmağa çalışmır, əksinə onu uzaqlaşdıra biləcəyi barədə xəbərdarlıq edir. Bunu Ermənistanın Baş naziri Nikol Paşinyan brifinqdə Avrasiya Hökumətlərarası Şurasının Yerevanın Avrasiya İqtisadi İttifaqında (Aİİ) iştirakının dayandırılmasının mümkün nəticələri ilə bağlı hesabatını şərh edərkən bildirib.
Rusiya, Belarus, Qazaxıstan və Qırğızıstanı təmsil edən Avrasiya Hökumətlərarası Şurasının Aİİ haqqında Müqavilənin dayandırılmasının Ermənistana qarşı potensial nəticələri barədə hesabatı əvvəllər dərc olunmuşdu. Hesabatda qeyd olunurdu ki, İrəvanın Avropa İttifaqına qoşulmaq planları ölkənin iqtisadi göstəricilərinin pisləşməsinə və müxtəlif hüquqi rejimlər arasında ziddiyyət yaradacaq. Hesabat Belarus, Qazaxıstan, Qırğızıstan və Rusiya prezidentlərinin 29 may 2026-cı il tarixli birgə bəyanatına əsasən hazırlanıb.
“Bu dəyərləndirmələrə gəldikdə isə, bunu zaman göstərəcək. Daha əvvəl dediyim kimi, biz Ermənistanın ardıcıl inkişafına, suverenliyimizin və müstəqilliyimizin qorunmasına və münasibətlərimizin şaxələndirilməsinə diqqət yetirməliyik”, - deyə Paşinyan qeyd edib.
Aİ-yə qoşulma qanununa toxunan o, Ermənistanda ilk dəfə olaraq "ictimai təşkilatların və vətəndaş cəmiyyətinin təşəbbüsü ilə" qanun qəbul edildiyini qeyd edib. Onun fikrincə, bu qanun "ölkədə demokratiyanın təzahürünə" çevrilib və hakimiyyət onu qorumaq niyyətindədir.
Hüquqi aspektə gəldikdə, Ermənistan Baş nazirinin sözlərinə görə, hesabatın özündə deyilir ki, Birlik üzvlərinin başqa bir dövləti təşkilatdan çıxarmaq hüququ yoxdur. Paşinyan qeyd edib ki, bu imkan KTMT-də də mövcuddur, amma nədənsə həmin ölkələr bunu etmir.
“Aİİ kontekstində diqqəti buna çəkmək istərdim: bəlkə də tariximizdə ilk dəfə olaraq metropolis bizi özünə yaxınlaşdırmır, əksinə dolayı yolla bizi özündən uzaqlaşdıra biləcəyi barədə xəbərdarlıq edir. Belə bir hal əvvəllər erməni xalqının tarixində heç vaxt baş verməyib”, - deyə Ermənistan hökumətinin başçısı bildirib.
Baş nazir qeyd edib ki, Ermənistana qarşı əvvəlki məhdudiyyətlər həm ölkədə, həm də xaricdə müəyyən dairələrin ümid etdiyi siyasi və iqtisadi nəticələrə gətirib çıxarmayıb. Paşinyan bunu son üç ildə Ermənistanda daxili siyasi qeyri-sabitlik yaratmağa yönəlmiş üçüncü cəhd adlandırıb.
"Görürəm ki, həm Ermənistan daxilində, həm də xaricdə mövcud vəziyyətdən yalnız ölkədə siyasi sabitliyi pozmaq üçün deyil, həm də onun müstəqilliyini sarsıtmaq üçün istifadə etməyə çalışan qüvvələr var", - deyə Ermənistanın baş naziri hesab edir.
Tahir TAĞIYEV
