Azərbaycan ərazisinin 13 faizindən çoxu mina və digər partlayıcı müharibə qalıqları ilə çirklənib. İndiyədək həmin ərazilərin yalnız 24,3 faizi təmizlənib.
Bunu Azərbaycanın BMT yanında Daimi Nümayəndəliyinin birinci katibi Şəhriyar Hacıyev BMT Baş Assambleyasının 81-ci sessiyasının Üçüncü Komitəsində məcburi köçkünlərin insan hüquqları üzrə xüsusi məruzəçi ilə keçirilən interaktiv dialoq zamanı bildirib.
Diplomat qeyd edib ki, mina təhlükəsi işğaldan azad edilmiş ərazilərdə aparılan genişmiqyaslı bərpa və yenidənqurma işlərinə, eləcə də məcburi köçkünlərin doğma yurdlarına təhlükəsiz qayıdışına ciddi maneə yaradır. 2020-ci ildən bəri mina hadisələri nəticəsində qadınlar və uşaqlar da daxil olmaqla, 400-dən çox Azərbaycan vətəndaşı həlak olub və ya xəsarət alıb.
Şəhriyar Hacıyev vurğulayıb ki, işğaldan azad edilmiş ərazilərin bərpası Azərbaycanın əsas milli prioritetlərindən biridir. Münaqişədən sonrakı bərpa və yenidənqurma işlərinə 16 milyard ABŞ dollarından çox vəsait ayrılıb. Böyük Qayıdış Proqramı çərçivəsində hazırda 48 yaşayış məntəqəsində 100 minə yaxın insan yaşayır, işləyir və təhsil alır.
Azərbaycan diplomatı mina təhlükəsinin aradan qaldırılması üçün beynəlxalq yardımın artırılmasının və məsuliyyət məsələsinə diqqət yetirilməsinin vacibliyini vurğulayıb. O qeyd edib ki, minaların və digər partlayıcı müharibə qalıqlarının təmizlənməsi insanların dolanışıq imkanlarının bərpası, iqtisadi dirçəliş və məcburi köçkünlərin problemlərinin davamlı həlli üçün əsas şərtlərdəndir.
Şəhriyar Hacıyev Azərbaycanın məcburi köçkünlərin insan hüquqlarının tam təmin edilməsinə sadiqliyini bir daha təsdiqləyib və ölkəmizin münaqişədən sonrakı bərpa və yenidənqurma sahəsində təcrübəsini beynəlxalq ictimaiyyətlə bölüşməyə hazır olduğunu bildirib.
