"The Wall Street Journal" qəzetinin ABŞ və Avropa kəşfiyyat mənbələrinə istinadən yaydığı məlumata görə, Rusiya Prezidenti Vladimir Putin NATO ölkələrinə qarşı təxribat əməliyyatlarının gücləndirilməsi barədə göstəriş verib. Məlumata əsasən, Almaniyanın Leypsiq hava limanına avqustun 4-də baş vermiş uğursuz dron hücumu bu kampaniyanın ilk addımlarından biri olub.
Nəşrin yazdığına görə, əməliyyatların məqsədi Ukraynaya dəstək verən ölkələrdə sabitliyi pozmaq, iğtişaşlar yaratmaq və Avropa dövlətlərinin Kiyevə hərbi yardımını zəiflətməkdir. Təxribatların intensivləşməsi Rusiyanın Ukraynada hərbi məqsədlərinə nail olmaqda çətinlik çəkməsi və ABŞ-la danışıqlardan gözlədiyi nəticələri əldə edə bilməməsi ilə əlaqələndirilir.
Almaniya müstəntiqləri Leypsiq hadisəsinin Rusiya hərbi kəşfiyyatı — QRU ilə əlaqəli şəxslər tərəfindən təşkil olunduğunu ehtimal edirlər. İddialara görə, şəbəkə Serbiyadan logistika mərkəzi kimi istifadə edərək dronları və partlayıcı maddələri Avropaya daşıyıb. Serbiyada bu işlə əlaqəli olduğu ehtimal edilən yeddi nəfər saxlanılıb.
Nəşr həmçinin Estoniya və Polşada dron istehsalı müəssisələrində baş verən yanğınları, Slovakiyada mümkün təxribat cəhdinin qarşısının alınmasını, eləcə də Polşa, Litva və Bolqarıstanda Starlink yerüstü stansiyalarına qarşı qeydə alınan hadisələri daha geniş təxribat kampaniyasının mümkün tərkib hissələri kimi təqdim edir.
Məlumata görə, Qərb kəşfiyyat orqanları bu əməliyyatların QRU-nun Xüsusi Tapşırıqlar Departamenti tərəfindən əlaqələndirildiyini düşünür. Bununla belə, Putinin şəxsən belə bir əmr verməsi və ayrı-ayrı hadisələrin vahid kampaniyaya aid olması barədə məlumatlar nəşrin istinad etdiyi kəşfiyyat mənbələrinin iddialarıdır.
Putinin NATO ölkələrinə qarşı təxribat əməliyyatlarını gücləndirmək barədə göstəriş verdiyi iddiaları Avropa ilə Rusiya arasında siyasi və hərbi qarşıdurmanın gələcəyinə necə təsir edə bilər və bu, NATO-nun Ukraynaya hərbi dəstəyinin artırılmasına, yoxsa Avropada təhlükəsizlik risklərinin daha da yüksəlməsinə gətirib çıxara bilər?
Azər Həsrət: "Rusiya Avropaya qarşı təxribatlara davam etsə, Ukraynada olduğundan da betər vəziyyətə düşə bilər"
Siyasi şərhçi Azər Həsrət "Bakı-Xəbər" qəzetinə açıqlamasında bildirib ki, Avropa ölkələri, xüsusilə Fransa və Almaniya uzun illər rifah şəraitində yaşadıqlarından müharibə reallıqlarından uzaqlaşıblar. Onun sözlərinə görə, Avropada hərbi xidmətin məhdudlaşdırılması və cəmiyyətlərdə müharibəyə qarşı münasibətin güclənməsi Rusiyanın təzyiq siyasətində nəzərə aldığı amillərdəndir.
Azər Həsrət hesab edir ki, Rusiya Avropaya qarşı təxribatlar vasitəsilə cəmiyyətdə qorxu yaratmağa, Ukraynaya dəstəyin dayandırılmasına və Moskva ilə münasibətlərin bərpasına çağırışları gücləndirməyə çalışa bilər. Onun fikrincə, Avropa ictimaiyyətində bu mövqeyi dəstəkləyən müəyyən təbəqə mövcuddur.
Siyasi şərhçi Almaniyanın hərbi potensialının uzun müddət məhdud qalmasını da diqqətə çatdıraraq bildirib ki, Avropa ölkələrinin müdafiə sahəsindəki hazırlığı Rusiyanın hesablamalarına təsir edən amillərdən biri ola bilər. Bununla belə, onun fikrincə, Moskvanın bu hesablamaları yanlış nəticələrə gətirib çıxara bilər.
Azər Həsrət xatırladıb ki, Rusiya Ukraynaya hücum edərkən qısa müddətdə Kiyevi ələ keçirəcəyini və ölkədə siyasi hakimiyyəti dəyişəcəyini düşünürdü. Lakin müharibənin gedişi bu gözləntiləri doğrultmadı. Onun sözlərinə görə, Ukrayna xalqı müqavimət göstərərək paytaxtın müdafiəsini təmin etdi və Rusiyanın ilkin hərbi planlarının qarşısını aldı.
A.Həsrət vurğulayıb ki, Rusiyanın hərbi əməliyyatları və törətdiyi dağıntılar Ukrayna cəmiyyətində Moskvaya qarşı münasibətin dəyişməsinə səbəb olub. Hətta əvvəllər Rusiyaya rəğbət bəsləyən və rusdilli əhalinin yaşadığı ərazilərdə də bu münasibətin dəyişdiyini deyən Azər Həsrət qeyd edib ki, Ukrayna öz müstəqilliyini və ərazi bütövlüyünü qorumaq üçün mübarizəni davam etdirir.
Onun qənaətinə görə, Avropaya qarşı təxribatlar ilkin mərhələdə müəyyən ölkələrdə qorxu və tərəddüd yarada bilər. Lakin sonrakı mərhələdə Avropa dövlətləri birləşərək Rusiyaya qarşı daha qəti mövqe nümayiş etdirə bilərlər.
Azər Həsrət hesab edir ki, Rusiya belə bir ssenarinin mümkün nəticələrini nəzərə almalıdır. Əks halda, onun fikrincə, Moskva Ukraynada üzləşdiyi çətinliklərdən daha ağır siyasi və hərbi nəticələrlə qarşılaşa bilər.
Dəniz NƏSİRLİ
