Məlum olduğu kimi, Ermənistanın baş naziri Nikol Paşinyan ölkənin yeni konstitusiyasının qəbulu üçün növbədənkənar parlament seçkilərinin keçirilməsi imkanını istisna etmir: "Yaxın gələcəkdə biz konstitusiyanın yeni layihəsini dərc edəcək, müzakirələrə başlayacaq və onu parlamentə göndərəcəyik. Və biz müxalifətdən olan həmkarlarımızı bunun çox mühüm və prinsipial məsələ, Ermənistan dövlətinin həyat qabiliyyətini müəyyən etmək və həll etmək məsələsi olduğuna inandırmağa çalışacağıq. Lakin bu alınmasa, başqa ssenariləri, o cümlədən növbədənkənar seçkilərin keçirilməsi imkanını nəzərdən keçirəcəyik, hərçənd, belə bir ssenarinin istisna edildiyini kim deyib?".
Ermənistanın “Hraparak” nəşri yazır ki, Paşinyanın müxalifəti Konstitusiya dəyişikliyinə razı sala bilməyəcəyi təqdirdə növbədənkənar parlament seçkilərinə gedəcəkləri barədə bəyanatı hakim partiyanın orta və aşağı eşelonlarında ciddi narahatlıq yaradıb: “Təsadüfən deputat mandatı qazananlar qarşıdakı beş il üçün nəzərdə tutulan yüksək maaşlardan, ezamiyyətlərdən və dəbdəbəli həyat tərzindən məhrum ola biləcəklərini düşünərək ruh düşkünlüyünə qapılıblar. Paşinyan, müxalifəti Konstitusiya dəyişikliyinə razı salmaq mümkün olmasa, başqa yola əl atacaqlarını, məsələn, növbədənkənar parlament seçkilərinə gedəcəklərini bildirib. Bu bəyanat hakim “Vətəndaş Müqaviləsi” partiyasının deputat fraksiyasının orta və aşağı eşelonlarını bir-birinə vurub. Bəxtin gətirməsi nəticəsində, yaxud təsadüfən deputat olanlar sözün əsl mənasında depressiyaya düşüblər. Onlar artıq qarşıdakı beş il ərzində alacaqları yüksək maaşlardan, ezamiyyətlərdən və kral həyatından məhrum olduqlarını təsəvvür edir, qarşılarında yeni sınaqların dayandığını anlayırlar. Hakim partiyanın bəzi nümayəndələri isə bir-birinə təsəlli verərək, Paşinyanın əvvəlki bəyanatlarının hansının gerçəkləşdiyini sual edir və bu dəfə də onun sözlərini ciddi qəbul etməməyə çağırırlar. Bəziləri bir-birinə ümid verir ki, Paşinyanın hansı bəyanatı indiyədək reallığa çevrilib ki, bu da gerçəkləşsin. Buna görə də onun sözlərinə həddindən artıq ciddi yanaşmaq lazım deyil”. Nəşr yazır ki, hakim partiyanın bəzi üzvləri Paşinyanın çoxdan “yanğınsöndürən” vəziyyətinə düşdüyünü düşünürlər. Onların fikrincə, baş nazir vəziyyətdən çıxmağa, yaranmış problemləri aradan qaldırmağa və siyasi böhranı səngitməyə çalışaraq situasiyaya uyğun bəyanatlar verir: “Deyirlər ki, o çoxdan yanğınsöndürən roluna keçib. Vəziyyətdən asılı olaraq bəyanatlar verir, vəziyyəti xilas etməyə, alovun ayrı-ayrı ocaqlarını söndürməyə çalışır. Bu da onun növbəti belə bəyanatıdır”. Ermənistanın “Joğovurd” nəşri də qeyd edir ki, Paşinyanın Konstitusiya dəyişiklikləri həyata keçirilməyəcəyi təqdirdə növbədənkənar parlament seçkilərinin keçirilə biləcəyi barədə bəyanatı Ermənistan hakimiyyəti daxilində ciddi narahatlıq yaradıb. Hakimiyyət nümayəndələri yeni seçkilərdən sonra ən azı dörd-beş il vəzifələrində qalacaqlarını düşünsələr də, baş nazirin açıqlaması onların siyasi gələcəyinin heç də təminatlı olmadığını göstərib: “Baş nazir Konstitusiya dəyişiklikləri prosesini həyata keçirmək mümkün olmayacağı təqdirdə növbədənkənar parlament seçkilərinin keçirilə biləcəyini bildirib.
Problem ondadır ki, əldə etdiyimiz məlumatlara görə, hakimiyyət nümayəndələrinin çoxu yeni seçkilərdən sonra ən azı dörd-beş il ərzində vəzifələrində qalmaq və rahat işləmək üçün vaxtlarının olacağını düşünürdülər. Lakin Paşinyanın bəyanatı vəziyyətin istənilən an dəyişə biləcəyini və hakimiyyətdə olanların siyasi gələcəyinin təsəvvür etdikləri qədər təminatlı olmadığını göstərib”.
Müxalifətdəki “Güclü Ermənistan” fraksiyasının rəhbəri Narek Karapetyan da Paşinyanın hakimiyyətin növbədənkənar seçkilərə gedə biləcəyi ilə bağlı açıqlamasına münasibət bildirib. Karapetyan sosial şəbəkədəki paylaşımında Paşinyana müraciətlə növbədənkənar seçkilərə hazır olduqlarını bildirib:
“Biz hazırıq. Sadəcə, günü deyin. İnsanlar sizin bitib-tükənməyən güzəştlərinizə qarşı səslərini ucaltmalıdırlar”. Erməni siyasətçi Metakse Hakobyan Paşinyanın Konstitusiyaya dəyişikliklərlə bağlı açıqlamasını şərh edərək bildirib ki, burada narahatlıq doğuran əsas məqam təkcə Konstitusiyanı dəyişmək niyyəti deyil, həm də bu niyyətin necə əsaslandırılması və ondan hansı siyasi nəticələrin çıxarılmasıdır: “Paşinyan iddia edir ki, Azərbaycan Konstitusiya məsələsinin Ermənistanın daxili işi olduğunu qəbul edir. Lakin bu məsələ həqiqətən də yalnız Ermənistanın daxili gündəliyinə aiddirsə, onda nə üçün Ermənistanla Azərbaycan arasında sülh prosesi ilə eyni siyasi kontekstdə müzakirə olunur? Bakı Ermənistanın Konstitusiyası ilə bağlı tələblər irəli sürməyə davam edirsə, həmin tələblərin sadəcə siyasi mövqe adlandırılması xarici təzyiq probleminin mövcudluğunu aradan qaldırmır. Tələbin ifadə formasını dəyişmək hələ onun siyasi mahiyyətinin dəyişməsi demək deyil”. Hakobyan bildirib ki, Konstitusiyaya dəyişiklik məsələsinin növbədənkənar seçkilərlə əlaqələndirilməsi də ciddi narahatlıq doğurur. O hesab edir ki, dövlətçiliyin davamlılığı konkret bir şəxsin siyasi missiyası ilə eyniləşdirilməməlidir.
Samirə SƏFƏROVA
