Akif Nağı: “Nə qədər ki, Bakıda həbsdə olanların Ermənistan rəhbərliyi tərəfindən cinayətkar olduğu barədə teziz qəbul olunmayıb Azərbaycanın onlarla bu məsələni müzakirə etmək fikri yoxdur”
Ermənistanın Baş naziri Nikol Paşinyan, Bişkekdə Şanxay Əməkdaşlıq Təşkilatının (ŞƏT) sammiti çərçivəsində Azərbaycan Prezidenti İlham Əliyevlə keçirdiyi görüşdə məhbuslar və itkin düşmüş şəxslərlə bağlı məsələləri müzakirə etdiyini deyib.
“Məhbusların qaytarılması gündəmimizdədir. Təbii ki, məhbuslar və itkin düşmüş şəxslərlə bağlı məsələlər müzakirənin bir hissəsi idi. Mən ətraflı məlumat verə bilmərəm, çünki əvvəllər də dediyim kimi, bu məsələ ilə bağlı ictimailəşdirmə heç bir şəkildə faydalı ola bilməz", - deyə Paşinyan keçirdiyi brifinqdə bildirib.
Bakıda həbsdə olanların statusları ilə bağlı Ermənistanla Azərbaycan arasında vahid mövqe yoxdur. Azərbaycan Bakıda həbsdə olanlara haqlı olaraq separatçı, cinayətkar, insanlıq əleyhinə cinayətlər törətmiş şəxslər kimi baxır, amma Ermənistan onlara cinayətkar, separatçı, insanlıq əleyhinə cinayət törədənlər kimi baxmır, onları "hərbi əsir” və ya “mülkü girov” hesab edir.
Bunlarla bağlı Azərbaycanla Ermənistan arasında vahid mövqe olmadığı şəraitində hansı müzakirədən söhbət gedə bilər? Paşinyan müzakirə edir və təbii ki, separatçıların azad olunmasını istəyir. Amma Azərbaycan onlara mühakimə olunan cinayətkar kimi baxır. Əvvəlcə onların statusunda vahid baxış olmalıdır, Ermənistan ilk növbədə onları cinayətkar, mühakimə olunan şəxslər kimi qəbul etməlidir, ondan sonra bu müstəvidə danışıqlar ola bilər.
Azad Vətən Partiyasının sədri Akif Nağı baki-xeber.com-a bildirdi ki, ermənilər bu və bir neçə digər məsələdən Azərbaycana qarşı təzyiq vasitəsi kimi istifadə edirlər və bu prosesə çox təəssüf ki, müəyyən beynəlxalq qurumları da cəlb edə biliblər. A.Nağı qeyd etdi ki, ayrı-ayrı şəxslər, qurumlar, dövlər erməni yalanlarına ya bilərəkdən və yaxud bilməyəkdən aldanırlar və məsələni Azərbaycana qarşı hansısa bir “iddia” şəklində qoymaq istəyirlər.
“Bakıda həbsdə olan erməni əsilli şəxslərin hamısı cinayətkardır. Onların cinayətləri məhkəmə qərarı ilə sübut olunub. Onlar müxtəlif beynəlxalq məhkəmələrə müraciət edirlər ki, biz də o məhkəmələrdən heç vaxt obyektiv qərar görməmişik.
Onların törətdiyi cinayətlər həddən artıq böyük cinayətlərdir və o cinayətlər də sübut olunub.
Ermənistanın baş naziri Azərbaycan Prezidentinin görüşündən sonra müəyyən açıqlamalar verir və erməni xislətinə uyğun olaraq danışır. Paşinyanın bu açıqlaması daxili auditoriya üçündür. Çünki revanşistlər bu məsələdən ona qarşı təzyiq vasitəsi kimi istifadə edir. Bu səbəbdən də Paşinyan manevr etməyə çalışır. Ermənistanın baş naziri belə bir vəziyyətdə “məhbuslar və itkin düşmüş şəxslərlə” bağlı məsələlərin müzakirə edildiyini deyir ki, daxildəki bəzi qüvvələri sakitləşdirsin.
Sual yaranır ki, Bakıda həbsdə olan separatçılara münasibətdə vahid yanaşma yoxdursa burada nə müzakirə oluna bilər? Onlar qatı cinayətkarlardır. Bunu Ermənistan cəmiyyəti də bilir. Amma görürsüz ki, onların sayı ilə bağlı manipulyasiya edirlər, yalan danışırlar. Gah 30-a, gah da 80-ə qədər deyirlər. Bu nədir? Bu iynə deyil ki, itsin, insandır və sayları da bəllidir. Onlar haqqında hüquq-mühafizə orqanları konkret məlumatlar verirlər. Amma Ermənistan tərəf beynəlxalq ictimaiyyəti aldatmaq üçün ortaya müxtəlif rəqəmlər ortaya atırlar. Fikrimcə, nə qədər ki, Bakıda həbsdə olanların Ermənistan rəhbərliyi tərəfindən cinayətkar olduğu barədə teziz qəbul olunmayıb Azərbaycanın onlarla bu məsələni müzakirə etmək fikri yoxdur. Azərbaycan Prezidenti dəfələrlə bildirib ki, onlarınla bağlı məsələ hüquq müstəvisində həll olunub və onu siyasi proseslərin danışıq predmetinə çevirməyə ehtiyac yoxdur. Mən inanmıram ki, Azərbaycan Prezidenti orada hansısa şəkildə bunu müzakirə edib. Ola bilər, Paşinyan təklif səsləndirib, nə isə deyib. Amma Azərbaycan Prezidentinin bu məsələ ilə bağlı aydın mövqeyi var. Ona görə də orada müzakirə olunmağının bir məsələ yoxdur. Onlar cinayətkardərlar və cinayətlərinə görə cəzalarını alıblar”.
A.Nağı qeyd etdi ki, Azərbaycan Prezidenti bu mövqəni beynəlxalq təşkilatlarının qarşısında da qoyub. “Amerika prezidenti belə bu məsələni Azərbaycan Prezidenti qarşısına qoya bilməyib. Baxmayaraq ki, Amerikadakı erməni lobbisi, eyni zamanda Rusiyadakı ermənilə lobbisi Rusiya prezidentinə təzyiq edir. Fransada Makron bu məsələni dilinə gətirə bilmir, dilinə gətirsə belə hər dəfə peşiman olur. Azərbaycan Prezidenti öz mövqeyini beynəlxalq təşkilatların, bütün prezidentlərin qarşısında sərt şəkildə qoyub. O cümlədən Ermənistanın baş naziri kimdir ki, onunla bu məsələni Azərbaycan Prezidenti müzakirə etsin? Hesab edirəm ki, bu situasiyanı Paşinyan başa düşür və münasibətləri korlamamaq, tərs cavab almamaq üçün o bu məsələni Azərbaycan Prezidenti qarşısında qoymayıb və indən sonra da qoymayacaq”-deyə A.Nağı bildirdi.
İradə SARIYEVA
