İrana qarşı davam edən hücumlarla bağlı sızdırılmış məxfi məlumatlar ABŞ-da şok effekti yaradıb. "New York Times" qəzetinin məlumatına görə, hücumlar səbəbindən ABŞ ordusunda sursat çatışmazlığı ilə bağlı mətbuata sızan məlumatlardan sonra Birləşmiş Qərargah Rəisləri Komitəsindən təxminən 50 yüksək rütbəli hərbi və mülki şəxsi avqust ayında yalan detektoru testlərindən keçirilib.
Məlumata görə, ABŞ Müdafiə Nazirliyinin məxfi məlumatların sızmasından sonra başlatdığı istintaq yüksək rütbəli hərbi vəzifəli şəxsləri də əhatə edib.
İstintaq, İranla müharibə zamanı ABŞ-ın azalan sursat ehtiyatları haqqında məlumatların mətbuata necə sızdırılmasına yönəlib.
Son həftələrdə ABŞ mediası tez-tez İrana qarşı davam edən hücumlar səbəbindən ABŞ ordusunun sursat çatışmazlığı ilə üzləşdiyi barədə xəbərlər yayıb. Pentaqon, uzaq mənzilli raketlər və “Patriot” raketləri də daxil olmaqla, vacib sursat ehtiyatlarının azalması ilə bağlı xəbərlərdən sonra hərəkətə keçib.
Test zamanı personaldan mətbuata məxfi məlumatlar verib-vermədikləri və ABŞ-ın azalan sursat ehtiyatları barədə jurnalistlərlə məlumat paylaşıb-paylaşmadıqları soruşulub. Qəzet yazır ki, genişmiqyaslı araşdırma yalnız mövcud sızmanın mənbəyini müəyyən etmək deyil, həm də gələcəkdə mətbuata məlumat verməyi düşünə biləcək işçilər üçün çəkindirici amil yaratmaq məqsədi daşıyır.
ABŞ döyüş komandanlıqları ilə əməliyyatları, siyasəti və müharibə planlarını əlaqələndirən Birgə Qərargah təxminən 1500-2000 hərbi və mülki heyətdən ibarətdir. Komandanın təxminən 50 üzvünün yalan detektoru testlərindən keçməsi istintaqın əhatə dairəsinə görə diqqəti cəlb edib. 2000-2002-ci illərdə ABŞ Hərbi Dəniz Qüvvələrinin baş hərbi hakimi vəzifəsində çalışmış təqaüdçü kontr-admiral Quter bu təcrübənin əhatə dairəsini "görünməmiş dərəcədə" adlandırıb.
"Mən heç vaxt yalan detektorlarının bu qədər geniş miqyasda və ya bu qədər yüksək səviyyədə istifadə edildiyini görməmişəm" – deyə Quter bildirib.
Pentaqon sözçüsü Parnell məsələ ilə bağlı şərh verməkdən imtina etsə də, məxfi milli təhlükəsizlik məlumatlarının sızmasının "son dərəcə ciddi" qəbul edildiyini bildirib. O, məxfi məlumatların qorunmasının ABŞ-ın və dünyanın müxtəlif yerlərində xidmət edən Amerika əsgərlərinin təhlükəsizliyi üçün vacib olduğunu deyib.
Tramp əvvəllər İran müharibəsinin idarə olunması və sursat ehtiyatlarının tükənməsi ilə bağlı bəzi məlumatları "xəyanət" adlandırmışdı.
Qəzet yazıb ki, ardıcıl sızmalar Pentaqonda etimadsızlıq atmosferini daha da artırıb. Müharibə naziri Heqsetin liderlik tərzi də Vaşinqtonda müzakirələrin mərkəzinə düşüb. Qəzeti bildirib ki, Heqset vəzifədə olduğu müddətdə ən azı 80 general, admiral və digər vəzifəli şəxsin rütbə yüksəlişini əngəlləyib və ya işdən çıxarıb.
Şimali Karolina senatoru Tillis Heqseti sərt tənqid edib və Trampı müharibə nazirini vəzifəsindən azad etməyə çağırıb. "Mən heç vaxt ölkəmizə xidmət edən cəsur kişi və qadınların bu qədər səriştəsiz idarə olunduğunu görməmişəm" - deyə senator bildirib.
Pentaqonda geniş yalan detektoru araşdırmasından sonra sızmanın mənbəyinin müəyyən edilib-edilmədiyi ilə bağlı hələlik heç bir açıqlama verilməyib.
Tahir TAĞIYEV
