Adil Qeybulla: “Mövcud əməkhaqqının 1,3 əmsal artırılması o deməkdir ki, maaşlar 30 faiz artır”
Məlum olduğu kimi, sentyabrın 1-dən TƏBİB-in tabeliyindəki tibb müəssisələrində çalışan tibb işçilərinin əməkhaqları artırılıb. Birinci vitse-prezident Mehriban Əliyeva tibb işçilərinin maddi rifahının yaxşılaşdırılması, əməyinin yüksək qiymətləndirilməsi və səhiyyə sistemində insan kapitalının gücləndirilməsi məqsədilə TƏBİB tabeliyində çalışan tibb işçilərinin əməkhaqqılarının artırılması təşəbbüsü ilə çıxış edib. Prezident İlham Əliyev təşəbbüsü müsbət qarşılayaraq onun icrası ilə bağlı müvafiq tapşırıq verib.
Bütün bunlarla yanaşı, regionlarda kadr çatışmazlığı olan ixtisaslar üzrə xüsusi stimullaşdırıcı əlavələr və müəyyən xidmətlər üzrə işin nəticələrinə görə əlavə ödənişlərinə 1,3 əmsalı tətbiq olunacaq. Bu mexanizmlər həkimlərin regionlara cəlb olunmasına və tibbi xidmətlərə əlçatanlığın artırılmasına xidmət edir.
Maraqlıdır, 1,3 əmsalın tətbiqi nə deməkdir və bu, nə ilə nəticələnə bilər? Eyni zamanda bu, bölgələrdə kadr çatışmazlığı hiss olunan ixtisaslar üzrə kadr təminatına necə təsir edəcək?
Sözügedən məsələyə aydınlıq gətirən tibb elmləri doktoru, professor Adil Qeybulla baki-xeber.com-a açıqlamasında bununla bağlı bir sıra məqamlara toxundu: “Tibb işçilərin maaşlarının artırılması bütövlükdə müsbət bir addım kimi dəyərləndirmək lazımdır. Ancaq 76 min tibb işçisi elan edilib. Lakin təxminən 33-34 min həkim var. Hesab edirəm ki, maaş artımı bütün həkimlərə şamil edilməlidir. Çünki Səhiyyə Nazirliyinin tabeliyində də kifayət qədər ciddi strukturlar var. Elmi tədqiqat institutları var, məhkəmə-tibbi ekspertizası var. Bir sözlə, başqa qurumlar var və onlar çox mühüm işlər görürlər. Fikrimcə, onların da maaşı artırılsa yaxşı olar. Ona görə də hələlik bəzi məsələlər tam aydın deyil. O ki qaldı artım əmsalına, burada vahid əmsal var. Vahid rəqəm vurulur orta əmsala və yeni əməkhaqqı hesablanır. Ancaq bir daha qeyd edirəm ki, burada məsələ bir az qəlizdir. Tətbiqdən sonra tam aydın olacaq ki, situasiya necədir. Təcili yardımda işləyən həkimlərin maaşlarının artırılması yaxşıdır. Çünki onlarda əməkhaqqı aşağıdır. Tibb işçilərinin maaşların artırılması bir sistem şəklində olmalıdır. Orada artıq hər kəs işini bilməlidir. Məsələn elmi-tədqiqat institutlarında həm bir tərəfdən müalicə işi gedir, digər tərəfdən tədqiqat işi gedir. Ola bilsin növbəti mərhələdə onların da maaşı artırılsın. 1,3 əmsalı müxtəlif cür tətbiq edilir. Məsələn, bir var ortalama əməkhaqqının 1,3 əmsal artırılması. Bir də var mövcud əməkhaqqının 1,3 artırılması. Mövcud əməkhaqqının 1,3 əmsal artırılması o deməkdir ki, maaşlar 30 faiz artır. Yəni maaşın üstünə 30 faiz gəlir. Ortalama əməkhaqqının artırılması bu cürdür, amma o 1,3 əmsala vurulur və o şəkildə hesablanır. Bu halda da həkimlərin əməkhaqqının 30 faiz artması deməkdir”.
Vidadi ORDAHALLI
