Əli Mustafa: “Rusiya təzyiq yolu ilə Ermənistanı Avropa yolundan çəkindirə bilməz”
“Ermənistanın Avropa İttifaqına üzv olmaq istəyi tezliklə keçəcək”. Bunu Rusiya xarici işlər naziri Sergey Lavrov bildirib.
Rusiyanın xarici işlər naziri deyib ki, Avropa İttifaqı öz qərarları səbəbindən iqtisadi üstünlüklərini itirir.
“Erməni həmkarlarımız deməkdə davam edirlər: biz Avropa İttifaqına daxil olmaq istəyirik. Əminəm ki, onların bu həvəsi çox tezliklə keçəcək”, - Lavrov Şərq İqtisadi Forumunda bildirib.
Lavrovda bu əminlik hardandır ki, Ermənistanın Avropa İttifaqına üzv olmaq istəyi tezliklə keçəcək? Məgər Paşinyan hakimiyyətinin necə böyük istəklə bu məsələnin üzərinə getdiyini görmür? Üstəlik, bu komanda 3 ay əvvəl seçkidə qalib gəliblər.
Sözügedən məsələyə aydınlıq gətirən siyasi şərhçi Əli Mustafa baki-xeber.com-a açıqlamasında bildirdi ki, Lavrovun nə deməsindən asılı olmayaraq Ermənistanın Avroittifaqa üzv olmaq istəyi ortadadır: “Bunun Rusiya tərəfindən müzakirə edilməsi digər dövlətin işinə qarışmaqdır. Lavrovun buna ironiya ilə yanaşması gözlənilən idi. Çünki sözügedən proses Ermənistanın Rusiyanın yaratdığı bloklardan çıxması deməkdir. Bu da nəticə etibarı ilə Rusiyanın Ermənistandan tamamilə çıxmasına gətirib çıxaracaq. Rusiyanın arqumentləri ondan ibarətdir ki, Aİ-yə üzv olmaq çox mürəkkəb prosedurdur. Ancaq bunlar unudurlar ki, Ermənistan əhalisinin sayı azdır. İstəsələr çox qısa müddətdə Ermənistanı Aİ-yə üzv edərlər. Nəzərə alsaq ki, Aİ ilə Rusiya arasında Ukrayna müharibəsinə görə qarşıdurma mövcuddur, o zaman Ermənistan üçün digər imkanlar yaradıla bilər. Viza rejimi sadələşdiriləcək, imtiyazlı iqtisadi güzəştlər tətbiq ediləcək və s. Artıq Aİ Şurası Avropa Komissiyasının Ermənistanla ticarətin iki il müddətinə müvəqqəti liberallaşdırılmasını nəzərdə tutan təklifini təsdiqləyib. Qərar Avropa bazarı üçün qoruyucu tədbirləri də əhatə edir. Bu tədbirlər Ermənistanın ixrac etdiyi məhsulların təxminən 80 faizi üzrə ticarətin liberallaşdırılmasını təmin edəcək. Beləcə, Avropa İttifaqı iki il ərzində Ermənistanın Rusiyaya tədarük edəcəyi təzə meyvə, tərəvəz və bitkilərin 99 faizi üçün öz bazarını açmağı planlaşdırır. Bütün bunlardan sonra Ermənistanın Aİ-yə marağı niyə azalsın ki? Ermənistan Aİ-yə qoşulmaqla bağlı 2025-ci ilin martında qanun qəbul edib. Ona görə də Lavrovun məlum fikirləri daha çox piar xarakterlidir. Ermənistan uzun illər Rusiyanın Cənubi Qafqazda “arxa bağçası” rolunu ifa edib. Paşinyan hakimiyyətə gələndən sonra tədricən bu imkan əldən çıxır. Düzdür, Rusiyanın Ermənistanda hərbi bazaları var, amma zamanla buna da son qoyulacaq. Artıq hərbi bazalar məsələsi müzakirə predmetinə çevrilir. Rusiya təzyiq yolu ilə Ermənistanı Avropa yolundan çəkindirə bilməz. Çünki vəziyyət dəyişib. Ukraynada gedən müharibə, Ermənistanda Rusiyaya bağlı revanşist siyasi qüvvələrin zəif durumda olması və digər amillər Moskvanın təzir imkanlarını zəiflədir”.
Vidadi ORDAHALLI
