Afsəddin Nəbiyev: “Azərbaycanın 30 illik təcrübəsi beynəlxalq ictimaiyyət üçün ciddi mesajdır”
Xəbər verildiyi kimi, Prezident İlham Əliyev ATƏT Parlament Assambleyasının prezidenti Pere Joan Pons Sanpietronu qəbul edib. Görüşdə Azərbaycan-Ermənistan sülh gündəliyi müzakirə olunub.
Prezident Əliyev 30 ilə yaxın müddətdə münaqişənin həllinə məsul olan ATƏT-in Minsk qrupu tərəfindən danışıqlar prosesində hər hansı bir nəticənin əldə edilmədiyini və BMT Təhlükəsizlik Şurasının Ermənistan qoşunlarının Azərbaycan ərazisindən dərhal və qeyd-şərtsiz çıxarılmasını tələb edən qətnamələrin yerinə yetirilmədiyini təəssüflə vurğulayıb. Ölkə başçısı deyib ki, Azərbaycan özü münaqişəyə hərbi-siyasi vasitələrlə son qoyub, ərazi bütövlüyünü və suverenliyini təmin edib.
Sözügedən məsələni baki-xeber.com-a şərh edən AMİP-in sədr müavini Afsəddin Nəbiyevin fikrincə, Prezident İlham Əliyevin ATƏT barədə səsləndirdiyi iradlar reallığı əks etdirir: “Parlament Assambleyasının prezidenti ilə görüşündə səsləndirdiyi fikirlər Azərbaycan-Ermənistan münaqişəsinin keçmişinə və bu günə gələn yoluna bir daha aydın siyasi qiymət verir. Azərbaycan uzun illər ərzində münaqişənin sülh yolu ilə həllinə, beynəlxalq hüququn və beynəlxalq təşkilatların qəbul etdiyi qərarların icrasına ümid bəslədi. 30 il ərzində Azərbaycan ATƏT-in Minsk qrupunun vasitəçiliyinə, danışıqlar prosesinə və BMT Təhlükəsizlik Şurasının qəbul etdiyi qətnamələrin yerinə yetiriləcəyinə inandı. Lakin nəticə nə oldu? Azərbaycan torpaqları işğal altında qaldı, yüz minlərlə insan öz doğma yurdlarından didərgin düşdü. Beynəlxalq hüququn açıq tələbləri isə uzun illər kağız üzərində qaldı. BMT Təhlükəsizlik Şurasının Ermənistan silahlı qüvvələrinin Azərbaycan ərazilərindən dərhal və qeyd-şərtsiz çıxarılmasını tələb edən qətnamələri icra olunmadı. Minsk qrupu isə onilliklər ərzində münaqişənin həlli istiqamətində real və nəticəli siyasi irəliləyişə nail ola bilmədi. Bu tarix bizə mühüm bir həqiqəti göstərdi. Azərbaycanın taleyini yalnız başqalarının qərarlarına buraxmaq olmazdı”.
A.Nəbiyev onu da qeyd etdi ki, Azərbaycan illərlə sülh danışıqlarında iştirak etdi, diplomatik imkanlardan istifadə etdi, beynəlxalq ictimaiyyətin diqqətini işğal faktına yönəltdi və beynəlxalq hüququn bərpa olunmasını gözlədi: “Lakin eyni zamanda Azərbaycan dövləti öz gücünü artırdı, iqtisadi və hərbi potensialını möhkəmləndirdi və dövlət siyasətini milli maraqlar üzərində qurdu. Nəticədə Azərbaycan münaqişəyə hərbi-siyasi vasitələrlə özü son qoydu, ərazi bütövlüyünü və suverenliyini bərpa etdi. Prezident Əliyevin də vurğuladığı kimi, bu nəticə illərlə davam edən nəticəsiz vasitəçilikdən deyil, Azərbaycanın öz siyasi iradəsindən, gücündən və qətiyyətindən irəli gəldi. Burada mühüm bir məqam xüsusilə vurğulanmalıdır. Azərbaycan heç vaxt sülhdən imtina edən tərəf olmayıb. Azərbaycan sülh gözlədi, danışıqlara güvəndi və diplomatik yolları sonadək sınadı. Lakin sülhün təmin olunmaması və işğalın davam etməsi şəraitində öz dövlət suverenliyini və ərazi bütövlüyünü müdafiə etmək hüququndan istifadə etdi. Bu baxımdan Azərbaycanın keçdiyi yol yalnız hərbi Zəfər nümunəsi olmaqla yanaşı həm də dövlətçilik dərsidir. Bu tarix göstərdi ki, beynəlxalq təşkilatların fəaliyyəti mühüm olsa da, dövlət öz milli maraqlarını qorumaq üçün ilk növbədə öz siyasi iradəsinə, iqtisadi gücünə, müdafiə qabiliyyətinə və xalqın birliyinə arxalanmalıdır. Bu gün hamılıqla keçmiş münaqişənin nəticələri haqqında deyil, yeni reallıq və davamlı sülh haqqında danışırıq. ATƏT-in Minsk prosesinin bağlanması da artıq köhnə münaqişə modelinin tarixdə qaldığını təsdiqləyən mühüm mərhələdir. Azərbaycanın 30 illik təcrübəsi beynəlxalq ictimaiyyət üçün də ciddi mesajdır. Azərbaycanın bugünkü mövqeyi məhz bu tarixi təcrübəyə söykənir. Biz keçmişi unutmaq üçün deyil, ondan nəticə çıxarmaq üçün xatırlayırıq. Azərbaycan xalqı 30 il gözlədi, 30 il sülh və ədalət naminə mübarizə apardı və nəhayət, öz dövlət gücünə söykənərək tarixi ədaləti bərpa etdi. Bu, həm də beynəlxalq hüququn sözlə deyil, real siyasi iradə və məsuliyyətlə müdafiə edilməsinin vacibliyini göstərən böyük bir dərsdir”.
Vidadi ORDAHALLI
