Ramil Məmmədli: “Prinsipcə, Almaniya ilə Rusiya arasında hərbi qarşıdurma istisna deyil”
Son günlər Rusiya və Almaniya arasında münasibətlərdə baş verənlər artıq adi diplomatik narazılıq çərçivəsindən çıxaraq qarşıdurmaya keçib. Berlinin Rusiyanı Leypsiq-Halle hava limanında baş verdiyi bildirilən dron insidentində ittiham etməsi, ardınca Rusiyanın Bonn şəhərindəki Baş Konsulluğunun və Berlindəki “Rusiya Evi”nin bağlanması Moskvanın sərt reaksiyasına səbəb olub.
Rusiya buna cavab tədbiri olaraq Moskvada, Sankt-Peterburqda və Yekaterinburqda Höte İnstitutunun filiallarını bağlayır. Almaniyanın xarici işlər naziri Yohan Vadeful Rusiyanın ölkədəki Höte İnstitutunun filiallarını bağlamaq qərarından kədərləndiyini söyləyib.
Almaniya xarici işlər naziri daha sonra vurğulayıb ki, bir çox Avropa ölkələri, xüsusən də Şərqi Avropada olanlar, Rusiya tərəfindən suverenliklərinin daim pozulması ilə yaşamaq məcburiyyətində qalıblar və buna son qoyulmalıdır, əlavə etdi: “Bu, indikindən uzaq görünən normal və ağlabatan münasibətlər üçün ilkin şərtdir”.
Vadeful 2024-cü ildən bəri, xüsusən də Avropanın bir çox yerində hibrid təhdidlərə və hücumlara qarşı "Veymar Üçbucağı" çərçivəsində sıx əməkdaşlığın davam etdirildiyini və Leypsiq-Halle hava limanındakı hadisənin almanlara "Rusiyanın təcavüzü sərhədlərdə dayanmadığını" göstərdiyini bildirib.
Baş verənlərdən sonra Rusiyanın Bonndakı Baş Konsulluğu özünü bağlamaq qərarına gəlib. "Almaniya hökumətinin Bonndakı Rusiya Baş Konsulluğunu 18 sentyabr 2026-cı ilə qədər bağlamaq qərarı ilə əlaqədar olaraq, bütün konsulluq məsələləri üzrə müraciətlərin qəbulu ləğv edilir", - qurum bildirib.
Görünən odur ki, Almaniya-Rusiya münasibətləri həqiqətən də getdikcə gərginləşir. Faktiki olaraq gərginlik fonunda son iki ayda diplomatların qarşılıqlı şəkildə qovulması prosesi baş verir. Müqayisə üçün qeyd edək ki, birinci və ikinci dünya müharibələri ərəfəsində Avropada ən kəskin münasibətlər Almaniya ilə Rusiya arasında olub. O baxımdan hazırkı bu gərginlik növbəti Üçüncü Dünya Müharibəsinin də Almaniya və Rusiya arasında başlanma ehtimalını nə dərəcədə gücləndirir?
Sözügedən məsələni baki-xeber.com-a şərh edən hərbi ekspert Ramil Məmmədli prinsipcə, Almaniya ilə Rusiya arasında hərbi qarşıdurmanı istisna etmədi: “Elə bir dünyada yaşayırıq ki, hər an hər şey baş verə bilər. Almaniya Ukraynanın hərbi baxımdan əsas təchizatçısıdır. Baydenin prezidentliyi dövründə Ukraynanın əsas silah tədarükçüsü Birləşmiş Ştatlar idi. Tramp prezident olandan sonra Almaniyanın yükü artdı. Üstəlik, İstəklilər Koalisiyasının başında Almaniya dayanır. Bütün bunlar Rusiya-Almaniya qarşıdurmasını kəskinləşdirir. Rusiyadan Almaniyaya qarşı kiber hücumlar artır. Moskva ilə Berlin arasında münasibətlər son dövrdə daha da gərginləşib. Tərəflər arasında diplomatik qarşıdurma fonunda Almaniya Rusiyaya qarşı təhlükəsizlik tədbirlərini sərtləşdirib. Almaniya uzaqmənzilli silah arsenalını genişləndirmək niyyətindədir. Berlin bunun üçün təxminən 12 milyard avro ayırmağı planlaşdırır və ilk sistemlərin 2027-ci ildən etibarən əldə edilməsi nəzərdə tutulur. Bu arada Rusiyanın Berlindəki səfirliyi bəyan edib ki, Almaniyada Rusiyaya qarşı yönəldilə bilən uzaqmənzilli zərbə sistemləri yerləşdirilərsə, onların dislokasiya məntəqələri Moskva tərəfindən qanuni hərbi hədəf kimi nəzərdən keçiriləcək. Rusiyanın mövqeyinə görə, bu cür silahların Almaniya ərazisində yerləşdirilməsi təhlükəsizlik baxımından ciddi nəticələrə səbəb ola bilər. Bütün bunlar Moskva ilə Berlin arasında münasibətlərin necə sürətlə kəskinləşdiyini göstərir. Halbuki, Ukraynada müharibə başlayana qədər Almaniya Rusiyadan ən böyük qaz idxalatçısı idi. İndi isə tərəflər arasında münasibətlər görünməmiş dərəcədə kəskinləşib. Qarşılıqlı olaraq diplomatlar qovulur, mərkəzlər bağlanır və s.”.
Vidadi ORDAHALLI
