Polşa xarici işlər naziri Radoslav Sikorski Avropa Birliyini birlik ölkələrində xidmət göstərən Rusiya diplomatlarının 40%-ə qədərini - təxminən 1000 nəfəri - qovmağa çağırıb. Sikorskinin alman və fransız həmkarları ilə görüşdən sonra Veymarda keçirilən mətbuat konfransında qeyd edib ki, son hibrid hücumlar dalğası göstərir ki, AB Rusiyaya qarşı daha sərt məhdudiyyətlər tətbiq etməlidir.
"Nəticə etibarilə, Rusiya AB-ni daxildən məhv etməyə çalışır və ona sərbəst hərəkət imtiyazlarından istifadə etməyə icazə verilməməlidir", - deyə o bildirib.
Polşanın hesablamalarına görə, hazırda Aİ ölkələrində 2000-dən çox Rusiya diplomatı var və onların ən azı 40%-i "diplomatik statusları ilə uyğun olmayan vəzifələri yerinə yetirir", o cümlədən Avropa ölkələrində "terror fəaliyyəti həyata keçirən" kəşfiyyat orqanlarına işləyirlər. Sikorski Rusiya diplomatik heyətinin sayının azaldılması ilə yanaşı, Rusiya diplomatlarının hərəkət azadlığının məhdudlaşdırılmasına, Rusiya vətəndaşlarına Şengen vizalarının verilməsinin azaldılmasına və rusların AB-yə daxil olarkən yalnız biometrik sənədlərdən istifadə etmələrinin tələb edilməsinə çağırıb.
Varşavanın təklifi Almaniyada baş verən bir sıra təxribat aktlarından sonra irəli sürülüb və ölkə hakimiyyəti hadisəyə görə Rusiyanı günahlandırır. Avqustun 4-də Leypsiq/Halle hava limanında Ukrayna hərbi nəqliyyat təyyarəsinin yaxınlığında partlayıcı maddələrlə yüklənmiş dron aşkar edilib. Daha sonra müstəntiqlər başqa bir dron və təxminən 50 qram partlayıcı maddə aşkar ediblər. Almaniya rəsmi olaraq Rusiyanı hücum cəhdində ittiham edib. Almaniyanın daxili işlər naziri Aleksandr Dobrindt bildirib ki, Moskvanın hərəkətləri "Avropaya qarşı yönəlmiş uzunmüddətli qeyri-sabitlik, dezinformasiya, təhdidlər, təxribat və təcavüz cəhdlərinə uyğundur".
Sentyabrın əvvəlindən bəri Almaniyada daha bir neçə hadisə baş verib: Berqheymdə naməlum şəxslər elektrik xəttini qısaqapanma ilə ümumi gücü 4200 MVt olan enerji bloklarını söndürüblər; Brandenburqda əldə hazırlanmış raketlər yarımstansiyaya zərər verib; Auqsburqda dəmir yolu stansiyasının yaxınlığında naməlum obyekt partlayıb; Münhendə isə müdafiə zavodunun tikinti sahəsinə Molotov kokteyli atılıb.
Artan gərginlik səbəbindən Almaniya ruslar üçün viza siyasətini sərtləşdirmək qərarına gəlib. Almaniya Xarici İşlər Nazirliyinin sözçüsü Martin Giese bildirib ki, Rusiya təcavüzkar müharibə apararkən rus turist səyahətləri həmişəki kimi davam edə bilməz. O bildirib ki, verilən vizaların sayı "çox yüksəkdir" və Berlin bunu azaltmaq niyyətindədir. 1 sentyabrda Almaniyanın xarici işlər naziri Yohann Vadeful ruslar üçün giriş nəzarətinin sərtləşdirildiyini elan edib .
Tahir TAĞIYEV
