Ukraynanın paytaxtı Kiyevdə ölkənin iki əsas təhlükəsizlik və kəşfiyyat orqanı olan SBU və HUR-un əməkdaşları arasında küçənin ortasında kütləvi silahlı toqquşma baş verib.
Ukrayna mətbuatında yer alan xəbərlərə görə, hadisə sentyabrın 2-si səhər saatlarında rusiyalı müxalifətçi Stepan Kaplunovu hədəf alan əməliyyat zamanı baş verib. Əməliyyat zamanı Ukrayna təhlükəsizlik xidmətinin iki bölməsi arasında silahlı toqquşma baş verib və atışma nəticəsində üç kəşfiyyat zabiti yaralanıb.
Ukrayna Dövlət Təhlükəsizlik Xidməti (SBU) Rusiya müxalifətinin üzvünə qarşı iddia edilən Rusiya terror planını araşdırdığını açıqlayıb. Ukrayna Hərbi Kəşfiyyat Xidməti (HUR) isə Kaplunovun 24 avqust Müstəqillik Günü şənlikləri üçün Ukraynada olduğunu, lakin həyətində naməlum şəxslər tərəfindən qaçırıldığını bildirib. İddialara görə, Rusiya Federal Təhlükəsizlik Xidməti (FSB) Kaplunova qarşı sui-qəsd cəhdi təşkil edib. Məlumata görə, Ukrayna tərəfi isə sui-qəsd planını pozmaq üçün SBU və HUR-un birgə əməliyyatını keçirib. SBU HUR ilə əlaqəli bir zabiti həbs etdikdən sonra iki qurum arasında silahlı atışma baş verib. Silahlı toqquşmadan sonra polis küçəni mühasirəyə alıb.
Kiyev İndependent qəzetinin məlumatına görə, Ukrayna Müdafiə Qüvvələri sui-qəsdin hədəfinin Kiyevlə yanaşı döyüşən Rusiya Könüllü Korpusunun (RKK) komandir müavini Kaplunov olduğunu bildirib. Hakimiyyətin sui-qəsdin qarşısının alındığını açıqlamasından sonra Kiyevdə silahlı toqquşmalar barədə məlumatlar yayılmağa başlayıb.
Ukrayna Baş Prokurorluğunun məlumatına görə, SBU zabitləri iddia edilən sui-qəsdlə bağlı istintaq apararkən "Ukrayna Müdafiə Qüvvələrinin bir bölməsi" tərəfindən hücuma məruz qalıblar. Telegram vasitəsilə yayımlanan açıqlamada deyilir: "FSB-nin terror aktı ilə bağlı araşdırması zamanı SBU zabitləri silahlı hücuma məruz qalıblar". Açıqlamada əlavə olunur ki, hüquq-mühafizə orqanlarının əməkdaşları silahlı müqaviməti yatırmaq üçün odlu silahdan istifadə ediblər.
Prezidentin müşaviri Dmitri Litvin hadisədə iştirak edən iki tərəfin SBU və HUR olduğunu açıqlayıb. Prezident Zelenski hər iki bölmənin rəhbərləri ilə bağlı araşdırma başladıb və ictimaiyyətin məlumatlandırılmasını əmr edib.
Tahir TAĞIYEV
