Təbriz Musayev: “Yeni Konqres gələn il işə başlayandan sonra 907-ci düzəlişin birdəfəlik ləğvində maraqlı olmayacaq”
ABŞ Konqresinə aralıq seçkilərdə Demokratlar Partiyası qələbə qazanıb. Səslərin sayıldığı ştatların nəticələrinə əsasən, Demokratlar Konqresin hər iki palatasında – Senatda və Nümayəndələr Palatasında – çoxluğu Prezident Donald Trampın mənsub olduğu Respublikaçılar Partiyasının əlindən alıblar. Demokratlar Senatda 54, Nümayəndələr Palatasında isə 228 yer əldə ediblər. Bununla da Respublikaçılar Konqresin hər iki palatasında nəzarəti itiriblər.
Demokratların qələbəsi və hər iki palatada üstünlük əldə etməsi Azərbaycana qarşı 34 il əvvəl qəbul edilmiş bədnam 907-ci düzəlişin birdəfəlik ləğvi məsələsinə necə təsir edəcək?
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayevin fikrincə, Demokratlar Partiyası qalib gəldiyi üçün növbəti ildə 907-ci düzəlişin birdəfəlik ləğvi real görünmür: “Azərbaycan üçün əsas həssas məsələlərdən biri 1992-ci ildə qəbul edilmiş Azadlığa Dəstək Aktının 907-ci düzəlişidir. Bu müddəa ABŞ-ın Azərbaycan hökumətinə müəyyən birbaşa yardım formalarını məhdudlaşdırır. 2002-ci ildən etibarən ABŞ prezidentlərinə müəyyən şərtlər daxilində həmin məhdudiyyətin tətbiqini müvəqqəti dayandırmaq səlahiyyəti verilib. O vaxtdan ABŞ prezidentləri hər il həmin bədnam düzəlişi dondurur. Bircə ABŞ-ın sabiq prezidenti Cozef Bayden 2023 və 2024-cü illərdə bunu etmədi. Azərbaycan 2023-cü ildə Qarabağda suverenliyini tam təmin edəndən sonra erməni lobbisi düzəlişin dondurulmasına mane oldu. Prezident Donald Tramp 2025-ci ilin avqustunda müvafiq qərar imzalayıb. 2026-cı ilin avqustunda isə ABŞ Dövlət Departamenti istisnanın müddətinin uzadılması barədə Konqresi məlumatlandırıb. Əlbəttə ki, yeni Konqres gələn il işə başlayandan sonra 907-ci düzəlişin birdəfəlik ləğvində maraqlı olmayacaq. Çünki erməni lobbisinin onlara təsiri böyükdür. Ancaq Tramp istəsə, gələn ilə qədər bunu ləğv etmək olar. Məsələ ondadır ki, ABŞ-la Azərbaycan arasında artıq strateji tərəfdaşlıq mövcuddur. Yəni bundan çıxış edərək 907-ci düzəlişi gələn ilin yanvarınadək ləğv etmək olar. O vaxta qədər Respublikaçılar Partiyası həm Nümayəndələr Palatasında, həm də Senatda üstünlük təşkil edir. Fikrimcə, Tramp belə bir təşəbbüslə çıxış etsə, bədnam düzəlişin ortadan qaldırılmasını təmin edə bilər”.
Vidadi ORDAHALLI
