İlqar Hüseynli: “Uşaq anestezioloq-reanimatoloqlarının, radioloqların, neontoloqların əmək haqqında baş verən bu böyük artım həkimlərin regionlarda işləməsini stimullaşdıran əsas, önəmli bir faktordur”.
Tibbi Ərazi Bölmələrini İdrarəetmə Birliyinin icraçı direktoru Anar Bayramov deyib ki, əməkhaqqı artımları vəzifə, ixtisas, iş yükü, fəaliyyət göstəriciləri və regionlarda mövcud kadr təminatı nəzərə alınmaqla diferensiallaşdırılacaq. “Belə ki, regionlarda çalışan uşaq anestezioloq-reanimatoloqlarının aylıq əməkhaqqı 1450 manatdan 3000 manata yüksələcək. Bu, 107 faiz artım deməkdir. Neonatoloqların əməkhaqqı 1450 manatdan 2400 manata çatdırılacaq ki, bu da 950 manat və ya 66 faiz artım deməkdir. Hemodializ həkimlərinin əməkhaqqı isə 1450 manatdan 2250 manata çatdırılacaq ki, bu da 800 manat və ya 55 faiz artım deməkdir. Həkim çatışmazlığı olan regionlarda mama-ginekologiya, neyrocərrahiyyə, uşaq cərrahiyyəsi, ürək-damar cərrahiyyəsi, üz-çənə cərrahiyyəsi və travmatologiya ixtisasları üzrə həkimlərin aylıq əməkhaqqı 1450 manatdan 2150 manata yüksələcək. Bu, əlavə 700 manat və ya 48 faiz artım deməkdir".
Regionlarda həkimlərin əməkhaqlarının artırılması bölgələrdə kadr çatışmazlığını aradan qaldırmağa və tibbi xidmətin keyfiyyətini yüksəltməyə xidmət edir. Bunun əsas əhəmiyyəti kadr çatışmazlığının aradan qalxmasıdır. Eyni zamanda artan maaşlar peşəkar həkimlərin regionlarda işləməyə marağını artırır və bölgələrdə həkim qıtlığını azaldır.
Yerlərdə ixtisaslı kadrlar olduqda, sakinlər müayinə və müalicə üçün mərkəzi şəhərlərə getmək məcburiyyətində qalmırlar.
Diferensial yanaşma və stimul həkimlərin iş məsuliyyətini və göstərilən səhiyyə xidmətlərinin keyfiyyətini yaxşılaşdırır. Peşəkar kadrların özəl sektora və ya digər sahələrə axınının qarşısı alınır, onların dövlət tibb müəssisələrində qalması təmin olunur.
Sosial sahə üzrə ekspert İlqar Hüseynli baki-xeber.com-a bildirdi ki, ümumiyyətlə, bu məsələ gündəmdə idi. “Həkimlərin sosial imkanlarının yaxşılaşdırılması, əmək haqqının artırılması gündəmdə idi. Xüsusən regionlarda fəaliyyət göstərən həkimlərin fəaliyyətini stimullaşdırmaq məqsədi ilə müəyyən həvəsləndirici tədbirlərin həyata keçirilməsi gözlənilən idi. Bu çox mühüm əhəmiyyətli bir qərardı. Demək olar ki, həkimlərimiz az əməkhaqqı alırdı. Bu yöndə ölkənin birinci xanımı Mehriban Əliyevanın təşəbbüs göstərməsi və bu təşəbbüsə Prezidentin dəstək verməsi bütün cəmiyyət tərəfindən müsbət hal kimi dəyərləndirilir.
Bütün tip personalı bu addımı müsbət qarşılayır. Bizim həkimlərlə və tibb müəssisələrdə çalışan işçilərlə yaxın təmaslarımız var və bu məmnunluğu onların dilindən eşidirik. Ümumi götürəndə əmək haqqının artırılması həm də həkimlərin daha məhsuliyyətli, daha keyfiyyətli xidmət göstərməsini stimullaşdıran bir faktordu. TƏBİB rəhbəri Anar Bayramovun da bu məsələyə dərhal reaksiyaya verməsi də müsbətdir. Sentyabrın 1-dən belə bir artımın, belə bir sosial aksiyanın həyata keçirilməsi çox ciddi islahatdır.
Düşünürəm ki, bu amil eyni zamanda dar ixtisas sahəsində çalışan həkimlərin regionlara marağını artıracaq. Uşaq anestezioloq-reanimatoloqlarının, radioloqların, neontoloqların əmək haqqında baş verən bu böyük artım həkimlərin regionlarda işləməsini stimullaşdıran əsas, önəmli bir faktordur”.
İ.Hüseynli qeyd etdi ki, regionlarda çalışmaq məqsədilə tətbiq edilən 30% (və ya 1,3) əlavə əmsal regionlarda həkimlərin işləməsini stimullaşdırır.
“İnsanlar nə üçün çalışır? İnsanlar ona görə çalışır ki, o, yaxşı əməkhaqqı alsın və yaxşı yaşasın. Əgər bir sosial təbəqə yaxşı əməkhaqqı alıb, yaxşı yaşayacaqsa, o yerinə yetirdiyi xidməti də keyfiyyətlə, ürəklə yerinə yetirəcək. Məhz, burada bir önəmli faktor var. Regionlarda fəaliyyət göstərən həkimlərin əməkhaqqının daha çox artırılması onların yaşayış imkanlarının, yaşam şəraitlərinin yaxşılaşdırılması deməkdir. Eyni zamanda həkim təbəqəsində olan münasibətə yeni yanaşmadır. Burada bu məsələlər də var. Xüsusən təcili tibbi yardımda çalışan işçilərin maaşındakı artımlar bu xidməti yerinə yetirən, çətin şəraitdə işləyən həkimlərə olan diqqət və qayğının təzahürüdür. Düşünürəm ki, bu yerində və vaxtında atılmış adımdır.
Yəqin ki, gələcək islahatlarda da bu davam etdiriləcək, bu məsələlərə ciddi önəm veriləcək.
Çox yaxşı olardı ki, bu növbəti mərhələdə də rezidentura təhsil alan gənclərimizin də əmək haqqının artılması üzərində iş getsin. Yəni həmin gənc həkimlərimizin də stimullaşmasına imkan yaradılsın və onların ölkə daxilində qalıb tibb xidmətini yerinə yetirsinlər, xaricə axın etməsinlər. Hesab edirəm ki, bu gənc həkimlərimiz üçün stimullaşdırıcı olar”-deyə İ.Hüseynli vurğuladı.
İradə SARIYEVA
