İbrahim Rüstəmli: “Savadlı, bilikli gənclərə bu istiqamətdə şərait yaradılması, dəstək göstərilməsi müsbət haldır”
Müxtəlif saxta sənədlərlə hərbi xidmətdən yayınan gənclərin mövcudluğu təəssüf hissi doğurur. Aydındır ki, bəziləri ayrı-ayrı neqativ yollarla belə sənədlər əldə edir və müvafiq quruma təqim edir. Təbii ki, araşdırma zamanı o sənədlərin saxta olduğu üzə çıxır və onlara qarşı tədbir görülür. Bu məsələnin bir tərəfi. Digər tərəfdən də, təhsil alan gənclər də olur ki, onlar məhz təhsil almaq üçün hərbi xidmətdən möhlət hüququ əldə etmək istəyirlər.
Səfərbərlik və Hərbi Xidmətə Çağırış üzrə Dövlət Xidmətinin rəisi general-mayor Mürsəl İbrahimov müsahibələrindən birində möhlət istəyən vətəndaşlarla bağlı diqqət çəkən fikirlər səsləndirib. Xidmət rəsi açıq şəkildə deyib ki, həqiqətən də oxuyan, bilikli, savadlı, bacarıqlı gənclərə möhlət hüququ tanınır, amma neqativ yollarla saxta sənədlər təqdim edib hərbi xidmətdən yayınmaq istəyənlərə güzəşt olunmur.
M.İbrahimov deyib: “Biz görürük ki, həqiqətən də bu uşaq oxuyur, bilik əldə edir biz özümüz ona şərait yaradacağıq ki, o təhsilini bitirsin. Çünki o bizim vətəndaşdır. Heç respublikaya qayıtmasa da, harada işləsələr savadlı-bilikli kadrlar bizim ölkənin fəxrləridir”.
Xidmət rəhbərinin qeyd etdiyinə görə, həqiqi oxuyanla saxta sənədlər əsasında möhlət almaq istəyənləri ayrıd etmək lazımdır ki, ədalət pozulmasın.
“Biri də var ki, hansısa bir arayış əldə edib o arayışı gətirib təqdim etməklə müəyyən yayınmaya nail olmaq istəyirlər. Nəticə etibarı ilə də sən Azərbaycan Respublikasının ərazisində heç bir ali savadlı mütəxəssis hesab olunmayacaqsan. Gəlin ayrıd edək. Bəli, oxuyanlara nə lazımdısa dəstək olaq, möhlətlər verək, nə deyirsiz edək.
Amma hər hansı bir şirkətdən bir günün içində əldə olunan arayışı təqdim etmək nə dərəcədə düzgündür? Həqiqətən burada da ədalətsizlik baş verir. Baxın, adam var ki, bugünkü gün magistraturada, doktoranturada tər töküb oxuyur, xaricdə imtahanlar verir, o da bizim xidmət tərəfindən təhsil möhləti alır. O birisi də elə burada gəzir. O arayış əsasında bunları eyniləşdirmək düzgündürmü?”
Bu Xidmət rəsinin fikirləridir və bildirir ki, həqiqi oxuyanlara, işləyənlərə möhlət veriləcək, amma saxtakarlıqla hərbi xidmətdən yayınanlara güzəşt olmayacaq.
Hərbi ekspert İbrahim Rüstəmli baki-xeber.com-a bildirdi ki, Dövlət Xidməti rəisinin fikrində həqiqət var. “Elə ali təhsil müəssisələri var ki, doğrudan da yüksək səviyyədə təhsil vermir. Amma elə ali təhsil müəssisələri də var ki, onlar həqiqətən də yüksək bilik verir, savadlı uşaqlar var. Savadlı, bilikli gənclərə bu istiqamətdə şərait yaradılması, dəstək göstərilməsi müsbət haldır. Belə gənclərə hər zaman şərait yaradılıb. Təhsil alan, oxumaq istəyən gənclərə dövlətin qanunvericilik sistemində möhlət hüququ nəzərdə tutulub və bu təmin olunur. Oxuyan, təhsilini davam etdirib öz bilik səviyyəsini genişləndirmək, təhsilin müxtəlif pillələrində irəliləmək istəyən gənclərə şərait yaratmaq bizim borcumuzdur. Çağrış sistemində artıq müəyyən dəyişikliklər olub. 500-600 baldan yuxarı nəticə göstərən gənclər və yüksək qiymətlətlə ali məktəbi bitirən məzunlar Müdafiə Nazirliyinin, Müdafiə Sənayesi Nazirliyinin və digər güc strukturlarının elit hərbi hissəslərində xidmət edirlər. Yəni intellektual imkanlarını ortaya qoymaq üçün onlara şərait yaradılır. Bunu çox yüksək dəyərləndirirəm. 500-600 bal toplamış gəncin intellektual səviyyəsindən istifadə etmək ordumuz, Silahlı Qüvvələrimiz üçün müsbət tendensiyadır. Bunun ordumuzun, əsgər və zabirlərimizin inkişafı üçün çox böyük əhəmiyyəti var.
Mən xidmət rəisinin fikirləri ilə ümumikdə razıyam. O gənclərə şərait yaradılmalıdır. Öz bilik və bacarığını daim artırmağa çalışan, məsuliyyətli, fədakar gənclərimizə şərait yaratmaq bizim ən ümdə borcumuzdur. Bu təkcə çağrış sistemində yox, həm də ali təhsil müəssisələrində, digər müəssisələrdə, eyni zamanda istehsalat sahəsində də həyata keçirilməlidir. Yüksək ixtisaslı kadrlara şərait yaradılmalıdır...”-deyə İ.Rüstəmli qeyd etdi.
İradə SARIYEVA
