Rusiya qüvvələri son üç ay ərzində Ukraynada Ümumdünya Səhiyyə Təşkilatına (ÜST) məxsus üç humanitar anbarı, o cümlədən onun əsas anbarlarından birini məhv edib. Nəticədə cəbhə xətti və əl çatmayan ərazilər üçün nəzərdə tutulmuş tibbi ləvazimatlar məhv olub.
ÜST-ün Avropa Regional Ofisi anbarların dağıdılmasını hava hücumları ilə əlaqələndirib, lakin Rusiyanın məsuliyyət daşıdığını qeyd etməyib.
Təşkilat bildirib ki, hadisələrdən biri 3 sentyabrda Rusiya qüvvələri ölkənin ən böyük əczaçılıq anbarlarından birinə - Kiyev vilayətinin Boryspil rayonundakı Biocon logistika kompleksinə zərbə endirəndə baş verib.
ÜST həmçinin avqustun əvvəlində Dneprdə humanitar yardım anbarının dağıdılmasından da bəhs edib . Orada saxlanılan və cəbhə xəttində və çətin əli çatan ərazilərdə yaşayan təxminən 225.000 insana kömək etmək üçün nəzərdə tutulmuş tibbi ləvazimat və avadanlıqların yarısı hücum nəticəsində itirilib.
Kiyev vilayətində ÜST tərəfindən istifadə edilən başqa bir anbar iyul ayında Rusiyanın paytaxta və bölgəyə genişmiqyaslı hücumları zamanı zədələnib.
"Vacib təchizatların saxlanıldığı humanitar anbarlara hücum edildikdə, təsir binaların və ya avadanlıqların itirilməsindən daha çox şeyə çatır. Bu, ən çox ehtiyacı olan insanlara zəruri tibbi yardımın çatdırılmasını gecikdirə və ya poza bilər. Hazırda komandalarımız təhlükəsizliyini təmin etmək üçün təchizatları bir yerdən digər yerə daşımaq üçün dəyərli vaxt və resurslar sərf edirlər; bu vaxt və resurslar səhiyyə xidmətlərinin göstərilməsinə sərf olunmalıdır, onu hücumlardan qorumaq üçün deyil. Ukraynada səhiyyəyə, o cümlədən humanitar saxlama müəssisələrinə edilən hücumların artmasından dərin narahatlıq duyuruq ", - deyə ÜST-ün Ukraynadakı nümayəndəsi Silviu Domente təcavüzkarın adını çəkmədən bildirib.
BMT-nin Humanitar İşlər üzrə Koordinasiya Ofisinin məlumatına görə, 2026-cı ildə humanitar yardımların saxlanıldığı ən azı 20 anbara hücum edilib. Bundan əlavə, ÜST tibbi ləvazimatların saxlanıldığı anbarlara 15 hücumu təsdiqləyib. Təşkilat bildirib ki, hücumlara baxmayaraq, Ukraynanın Səhiyyə Nazirliyi və ölkə daxilindəki digər tərəfdaşlarla əməkdaşlığı davam etdirir. Xüsusilə, son hücumlardan sonra tibbi ləvazimatların saxlanmasının alternativ yolları artıq tapılıb.
Tahir TAĞIYEV
