Rusiya Baş nazirinin müavini Aleksey Overçuk bildirib ki, Ermənistanın Rusiya əvəzinə digər bazarlara uğurla yönəldiyinin heç bir əlamətini görmür.
“Görünür, yox. Əlbəttə ki, onlar kiçik bir yardım alıblar, amma bu, Rusiyanın onlar üçün təmsil etdiyi böyük və tanış bazarla müqayisədə heç nədir. Biz də bu məhsullara öyrəşmişik”, - deyə Overçuk Pavel Zarubinlə müsahibəsində Ermənistanın təchizatlarını başqa istiqamətlərə yönləndirmək cəhdlərinin nəticələri ilə bağlı sualı cavablandırarkən bildirib.
Baş nazirin müavininin sözlərinə görə, Rusiya öz bazarını qorumaq üçün tədbirlər görməyə məcburdur və erməni tərəfdaşlarına ortaya çıxan problemləri birgə həll etməyi təklif edir: "Mövcud vəziyyət bizdən bazarımızı qorumağı tələb edir. Və biz erməni tərəfdaşlarımızı bu məsələdə bizimlə işləməyə dəvət edirik".
12 iyundan etibarən “Rosselxoznadzor” Ermənistandan Rusiyaya bütün karantin məhsullarının idxalını, eləcə də onların Rusiya ərazisindən AİB ölkələrinə tranzitini məhdudlaşdırıb. Agentliyin rəhbəri Sergey Dankvert məhdudiyyətləri erməni istehsalçıları arasında keyfiyyətə nəzarət problemləri ilə əlaqələndirərək, "qərarın siyasi motivli olmadığını" vurğulayıb.
Bu fonda Ermənistan Avropa İttifaqı ilə iqtisadi əlaqələrin genişləndirilməsi siyasətini davam etdirir. 2025-ci ilin mart ayında parlament Aİ-yə üzvlük prosesinə başlayan qanun qəbul edib. Moskva isə Ermənistanın həm Aİ, həm də AİB-in gömrük məkanlarında eyni vaxtda mövcudluğunun mümkün olmadığını bildirir.
Tahir TAĞIYEV
