Kinostudiyanın baş direktoru Fariz Əhmədov Samir Şərifovun sözlərinə cavab verdi - MÜSAHİBƏ

“Kinostudiyada köklü kadr islahatları gedir”

img

“30 ildən artıq bir müddətdən sonra kinostudiyamızın çəkiliş avadanlıqları bazası tamamilə yenilənərək, ən son standartlara cavab verən kameralar, işıqlandırma texnikaları və digər lazımi qurğularla təmin edilib

Cəfər Cabbarlı adına “Azərbaycanfilm” kinostudiyasının baş direktoru Fariz Əhmədova maliyyə naziri Samir  Şərifovun səsləndirdiyi “vəsaitlər ayrılır, ancaq nəticədə hər hansı bir kino əsərlərini görmürük” fikrinə münasibət bildirməsi üçün sorğu göndərmişdik. F.Əhmədov “Bakı-Xəbər”in sorğusuna cavab verib.

Baş direktorun müsahibəsini təqdim edirik.  

- Vətən müharibəsindən sonra “Azərbaycanfilm”in fəaliyyəti, bu istiqamətdə görülən və görüləcək işlər?

- Azərbaycan Respublikasının Mədəniyyət Nazirliyi tərəfindən elan olunmuş “Böyük Qayıdış” qısametrajlı bədii, sənədli və animasiya film layihələri müsabiqəsinin qalibləri arasında “Müharibənin uşaqları” və “Fulya” adlı sənədli film layihələri “Azərbaycanfilm” tərəfindən istehsal ediləcək. “Müharibənin uşaqları” sənədli filmi müharibə dövründə Gəncə, Bərdə, Tərtər və digər bölgələrimizə atılan raket zərbələri nəticəsində travma almış uşaqların, postmüharibə dövründə psixoloji reabilitasiyası üçün Kukla Teatrının həmin bölgələrə qastrola çıxması ilə ilham və ümidverici bir filmdir. Filmin rejissoru və ssenari müəllifi Leylaxanım Qənbərlidir. “Fulya” sənədli filmi isə müharibə dövrünün bütün həqiqətlərini, erməni barbarlığının yıxıcı təsirlərini dünyaya ilk səsdən çatdıran “CNN Türk”ün müxbiri Fulya Öztürkün həmin bölgələrə yenidən səyahəti ətrafında baş tutacaq. Filmin rejissoru və ssenari müəllifi Tahir Tahiroviçdir. Bundan əlavə, qeyd etməliyəm ki, Bakı Media Mərkəzi ilə birgə hazırladığımız növbəti layihə “Biz” adlı sənədli filmdir. Bu filmin layihəsi 44 günlük Vətən müharibəsi dövründə öz telefonlarında videoçəkilişləri ilə və ümumən diqqətəlayiq, trendə düşmüş insanlardır. Daha sonra “Görünməyən qəhrəmanlar” adlı 5 sənədli-salnamə janrında filmdən ibarət layihəmiz artıq Mədəniyyət Nazirliyi tərəfindən təsdiqlənib. Bu filmlər hər biri 44 dəqiqə olmaqla, müxtəlif qoşun növlərinin qəhrəman zabit və əsgər heyətinin 44 günlük müharibə müddətində keçdiyi şərəfli və müzəffər döyüş yolundan bəhs edəcək. Böyük Zəfərimizin milli kinoda növbəti mühim əksi, hazırda istehsal öncəsi mərhələsində olan və bu ilin iyul-avqust aylarında çəkilməyi planlaşdırılan “Həyat deyəsən gözəldir” bədii filmidir. Filmin ssenari müəllifi və rejissoru Xalq artisti Vaqif Mustafayevdir.

- Pandemiya dövründə fəaliyyət nə cür təşkil edildi? Pandemiyanın təsirləri nələrdir?

 - Təəssüf ki, bütün dünyada tüğyan edən koronavirus və buna paralel qapanmalar, ölkəmizdə bir çox sahədə olduğu kimi, kino sənayemizə də dərindən təsir göstərdi. Film istehsalı, nümayişlər dayandırıldı və kinoteatrlar qapandı. Ümidverici hal odur ki, artıq bir çox dünya ölkəsi tədricən öz normal həyatına qayıdır və biz də, öz növbəmizdə, mövcud qaydalara uyğun şəkildə fəaliyyətimizi təşkil edirik.

-  Axırıncı dəfə Prezident quruma nə vaxt maliyyə ayırıb? Vəsaitlər daha çox nələrə xərcləndi?

- “Azərbaycan Kinematoqrafiyasının inkişafı ilə bağlı bəzi tədbirlər haqqında” Azərbaycan Respublikası Prezidentinin 01 mart 2019-cu il tarixli Sərəncamı çərçivəsində Mədəniyyət Nazirliyinə müvafiq tapşırıqlar verilib və ayrılan büdcə ilə 30 ildən artıq bir müddətdən sonra kinostudiyamızın çəkiliş avadanlıqları bazası tamamilə yenilənərək, ən son standartlara cavab verən kameralar, işıqlandırma texnikaları və digər lazımi qurğularla təmin edilib. Bu hazırda bizim üçün ən sevindirici haldır.

- Mədəniyyət naziri və “Azərbaycanfilm”in rəhbəri dəyişdikdən sonra fəaliyyət istiqamətinizdə hansı dəyişikliklər oldu? İslahatlar həyata keçirilirmi?

- Bunu mütləq vurğulamalıyam ki, yeni mədəniyyət nazirimiz dünyadakı kino sənayesi ilə yaxından maraqlanır. Onun ən mühüm addımlarından biri bu ilin mart ayında nazirliyin kino şöbəsinin müdiri ilə birgə bu sahədə olduqca ixtisaslaşmış qardaş ölkə Türkiyəyə səfəri və yaxın zamanda müştərək film layihələri üçün Türkiyənin ən böyük 18 film istehsalı şirkətinin rəhbərləri ilə görüşərək, ikili müqavilələrə imza atmasıdır. Bu baxımdan, yeni kino siyasətində beynəlxalq film şirkətləri ilə müştərək istehsala olduqca əhəmiyyət verilir. Məlumat üçün qeyd edə bilərəm ki, “Azərbaycanfilm”in istehsal edəcəyi yeni filmlərdən Elçin Musaoğlunun “Məryəm” (“Sinema evi” şirkəti), Asif Rüstəmovun “Mərmər soyuğu” (Fransa – “Arizona Productions”) bədii filmləri və Tahir Əliyevin “Fulya’’ (Türkiyə - “Dada Yapım” şirkəti) adlı sənədli filmi birgə istehsal layihələridir. Kinostudiyada isə köklü kadr islahatları gedir, ictimaiyyətlə əlaqələr, beynəlxalq əlaqələr və layihələndirmə şöbələrimizə dəvət etdiyimiz gənc, ambisiyalı əməkdaşlarımızla qarşıdakı hədəflərə daha sürətlə yaxınlaşırıq. İdarəetmə modeli və strukturumuz isə beynəlxalq praktikaya əsaslanaraq yenilənir. Beynəlxalq film festivalları və təşkilatları ilə əlaqələrimizi gücləndiririk. Bu ilin “Nizami Gəncəvi İli” elan edilməsi ilə bağlı “Xosrov və Şirin” 12 seriyalı televiziya layihəsinin istehsal öncəsi hazırlıqları davam edir. İctimai TV ilə birgə hazırladığımız 24 hissəli “Bizim kino” layihəsi isə davam edir və kinosevərlərin sevgisini qazanıb. Bundan əlavə, Mirsadıq Ağazadənin “Eviniz abad” adlı bədii filminin çəkiliş materiallarından “Köşk” adlı 5 seriyadan ibarət miniserial hazırlanır.

Daha sonra qeyd edə bilərəm ki, 17 klassik filmimizin ingiliscə subtitrləşdirmə işləri yekunlaşmaq üzrədir.

Ən əsası isə filmlərin istehsal öncəsi mərhələsindən son mərhələyədək olan (pre-production, production, post-production) bütün dövrünün, produktiv, standartlara uyğun və hər cəhətdən şəffaf təşkili üçün maksimum əmək sərf edəcəyik. İzləyicilərimiz isə fəaliyyətimizə dair yeniliklərdən, mütəmadi olaraq, audio-vizual məzmunlarla məlumatlandırılır.

- Mövcud çətinliklər nələrdir?

- Bildiyiniz kimi, studiyanın mövcud binaları 1965-ci ildə tikilib, bu səbəbdən qarşıda duran başlıca məsələlərdən biri də təmir-tikinti işləridir. Bundan əlavə, hazırda kinostudiyanın yenilənmiş çəkiliş avadanlıqları bazasının bizə yaratdığı imkanlarla 2 bədii və 2 sənədli filmin istehsalını paralel şəkildə təşkil edə bilirik, lakin missiyamız bu rəqəmləri yüksəltmək və digər çatışmazlıqları da aradan qaldırmaqdır.

- Hazırda binada təmir gedir, təmirdən sonra hansı yeniliklər olacaq?

- Bütünlükdə təmir və yenidənqurma üçün layihələndirilmə aparılıb, lakin təmir işləri hələ başlamayıb. Ümid edirik ki, önümüzdəki zamanda buna nail olacağıq.

İradə SARIYEVA

Son xəbərlər