Rusiya NATO-ya diplomatik kanallar vasitəsilə qeyri-rəsmi mesaj göndərərək, alyans Kalininqrad bölgəsini blokadaya almağa cəhd edəcəyi təqdirdə nüvə silahına əl atacağını bildirib. “Reuters” agentliyinin məlumatına görə, sənəddə Moskva alyansı "birbaşa silahlı münaqişə riski yüksək olan" "təhlükəli və ehtiyatsız bir kurs" izləməkdə günahlandırıb.
Mesajda həmçinin vurğulanıb ki, hərbi münaqişə baş verərsə, Rusiya dərhal "alyansa üzv ölkələrdəki qərar qəbuletmə mərkəzlərinə" zərbə endirəcək. "Soyuq müharibə”dən bəri ilk dəfədir ki, Rusiya bizi bu şəkildə açıq təhdid edir. Buna görə də bu mesajı ciddi qəbul edirik" – deyə Avropanın yüksək vəzifəli müdafiə rəsmisi “Reuters”ə bildirib.
NATO-dakı bir mənbə isə bunun Rusiyanın avropalıları qorxutmaq üçün daha bir cəhdi olduğunu qeyd edib. Lakin o, cavabın "qətiyyətli" olacağını və NATO-nun Ukraynaya davamlı dəstəyindən imtina etməyəcəyini bildirib. NATO-nun sözçüsü Allison Hart Rusiya notasının alındığını təsdiqləyib: "Biz cavab olaraq qeyd etdik ki, NATO müdafiə ittifaqıdır və heç bir hərəkətimiz və ya təlimimiz Rusiyanın heç bir hissəsi üçün təhlükə yaratmır. Biz hər hansı məsuliyyətsiz nüvə ritorikası da daxil olmaqla, güc təhdidini qətiyyətlə pisləyirik".
Sənədi NATO-nun qərargahına göndərdikdən sonra bir neçə Avropa ölkəsindəki Rusiya səfirlikləri açıq şəkildə alyansı hərbi təlimlər vasitəsilə Kalininqrad bölgəsi ətrafında gərginliyi artırmaqda günahlandırıblar. Xüsusilə, bəyanatlarda Rusiyanın NATO ölkələrinə hücum etmək niyyətində olmadığı bildirilib, lakin Kalininqrada qarşı hər hansı bir təcavüzə mümkün olan ən sərt cavab veriləcəyi barədə xəbərdarlıq edilib.
Tahir TAĞIYEV
