“Prezidentə ona görə müraciət etdik ki, Azərbaycan Kinematoqrafçılar İttifaqının konfransında seçki zamanı çoxsaylı qanun pozuntusu oldu. Potokol qaydaları kobudcasına pozuldu. Gündəlik tərtib olunmalı və səsə qoyulmalı, seçki prosesi gündəlik üzrə getməli idi. Gündəlik səsə qoyulmadı. Katib seçkisində heç bir alternativ olmadı. Yəni icazə vermədilər ki, konfransı başqa bir şəxs aparsın. Seçkinin gedişində çoxsaylı pozuntular baş verdi. Əvvəla say komissiyası səsi saymaqla məşğul olmadı, leyihə, əleyhinə olanlar, bitərəflər barədə məlumat verilmədi. Videogörüntülərdə də var ki, səsverənlərin sayı heç o qədər deyil, amma konfransın aparıcısı elan edir ki, hamı Şəfiqə Məmmədovaya səs verib”.
Bu fikirləri baki-xeber.com-a kinorejissor Kənan Musayev bildirib.
K.Musayev bildirdi ki, burada Ş.Məmmədovaya qarşı qərəzdən, hansısa addımdan söhbət getmir. “Şəfiqə xanımın özünə də, sənətinə də çox böyük hörmətimiz var. Şəfiqə xanımın özünə də, namizədliyinə də mənim bir etirazım yoxdur. Sadəcə olaraq, seçki prosesi qanunvericiliyə uyğun keçirilməlidir. Ancaq keçirilmədi. Söhbət ondan gedir. “Bu belə olmalıdır” prinsipi ilə keçirildi və kim söz demək istədisə onun ağzını bağladılar. Mikrofonları işlək vəziyyətə gətirmədilər ki, kimsə öz sözünü desin. Söz demək istəyənlər çox idi. Açığını deyim ki, şokda idim. Mən heç bir vaxt insanlara qarşı bur cür hörmətsizlik görməmişdim. Orada oturanların çoxu incəsənət xadimləri, hörmətli adamlar idlər.
Onlara qarşı bu cür münasibəti görəndə mən şoka düşdüm”.
K.Musayev qeyd etdi ki, Prezidentə müraciətlərinin səbəbi seçkinin yenidən təşkil olunmasına nail olmaqdır. “Tələbimiz odur ki, alternativ namizdələrin iştirakı ilə seçki yenidən keçirilsin. Şəfqə xanıma bir alternativ olsun, normal seçki keçirilsin. Əgər Şəfiqə xanım seçiləcəksə, qoy seçilsin hamımız dəstək verəcəyik. Məsələn, mən Şəfqə xanıma səs verməmişəmsə belə, o əgər seçiləcəksə mən onu dəstəkləyəcəyəm. Çünki qanun var, qanunun tələbi var. Amma alternativ olsun. Seçkiyə gedirlər, amma alternativləri yoxdur və alternativ bir namizəd də irəli sürməyə imkan vermirlər. Niyə? Əgər alternativ yoxdursa, onda onun nəyə seçki oldu? O seçki deyil ki, o artıq təyinat effekti verir. İstəyimiz budur, başqa bir istəyimiz yoxdur”-deyə K.Musayev qeyd etdi.
Xatırladaq ki, 40-dan artıq kino xadimi Azərbaycan Kinematoqrafçılar İttifaqının (AKİ) sentyabrın 11-də keçirilmiş ümumi konfransında qanun və nizamnamə pozuntularına yol verildini iddia edərək Prezident İlham Əliyevə açıq müraciət ünvanlayıb.
İradə SARIYEVA
