Cümhuriyyət Xalq Partiyasının (CHP) 38-ci Növbəti Qurultayında qanun pozuntularına yol verildiyi iddiası ilə açılan məhkəmə işi üzrə hökm elan olunub.
Məhkəmənin qərarına əsasən, aralarında İstanbul Böyükşəhər Bələdiyyəsinin sabiq sədri Əkrəm İmamoğlunun da olduğu 9 nəfər "Seçki Qanununu pozma" cinayətinə görə hər biri 2 il 1 ay müddətinə azadlıqdan məhrum edilib. Əkrəm İmamoğlu, Rıza Akpolat, Özgür Çelik, Nihat Yeşiltaş, Baki Aydöner, Erkan Aydın, Mehmet Kılınçarslan, Metin Güzelkaya və Serhat Can Eşin həbs olunub. Məhkəmə, həmçinin Cemil Tuqay, Hüseyin Yaşar və Özgen Nama barəsində bəraət hökmü çıxarıb. Əkrəm İmamoğluna Türkiyə Cinayət Məcəlləsinin 53-cü maddəsinə əsasən siyasi qadağa cəzası da verilib. Yəni Əkrəm İmamoğlunun siyasi fəaliyyətlə məşğul olması qadağan edilib. Diqqəti çəkən məqam həm də odur ki, İmamoğlunun siyasi fəaliyyətlə məşğul olmasına iki ildən çox qadağa qoyulub. Yəni elə ediblər ki, növbəti prezident seçkiləri keçirilənə qədər İmamoğlu üzərində siyasi qadağa qalsın. Böyük ehtimalla qadağa bununla bağlıdır.
Maraqlıdır, qadağa bununla bağlı ola bilərmi? O cümlədən, belə qərarlarla ölkəni hara aparırlar? AK Parti iqtidarının bu qərarı ölkədə vətəndaş həmrəyliyini necə təsirləndirir?
Elşən Manafov: “İmamoğlu prezident seçkilərində Ərdoğanın müxalifətdən olan əsas rəqibi sayılırdı”
Sözügedən məsələyə aydınlıq gətirən politoloq Elşən Manafov baki-xeber.com-a açıqlamasında bildirdi ki, İstanbul Böyük Şəhər bələdiyyəsinin sabiq sədri Əkrəm İmamoğlunun 2 il 1 ay müddətinə azadlıqdan məhrum edilməsi ilə bağlı məhkəmənin qəbul etdiyi qərar istər Türkiyədə, istərsə də bu ölkədəki siyasi prosesləri izləyən dairələrdə ciddi rezonans və suallar doğurub: “Bəllidir ki, İmamoğıu 2025-ci ilin martında ona ünvanlanmış məlum ittihamlara qədər Türkiyədə prezident seçkilərində hazırkı prezident Ərdoğanın müxalifətdən olan əsas rəqibi sayılırdı. İmamğlu isə tərəfdaşları ilə birlikdə Türkiyədə bələdiyyələrə keçirilən sonuncu seçkilərdə ciddi uğur qazanaraq İstanbul Bələdiyyəsinin, tərəfdaşları isə Ankara, İzmir və digər iri şəhərlərdə bələdiyyə institutlarının sədrləri seçilmişdilər. Türkiyənin ana müxalifət partiyasının bu ölkədə bələdiyyələrə keçirilən seçkilərdə əldə etdiyi qələbə iqtidar partiyası sayılan Ak Partinin ölkə seçiciləri arasında əvvəlki nüfuzunun aşağı düşməsi və parlament, habelə prezident seçkiləri ərəfəsində ciddi sınaq qarşısında qalacağı ilə bağlı suallar doğurmuşdu. Mühafizəkar klerikalist mövqelərdə duran Ak Partinin iri şəhərlərdə seçicilər arasında reytinqinin sürətlə aşağı düşməsi, ABŞ-Türkiyə münasibətlərində həmin dövrdə yaşanan soyuqluq, (rəsmi Ankaranın Moskva ilə enerji, hərbi təhlükəsizlik sahəsində dərinləşməkdə olan əməkdaşlığı), nəticədə lirənin alıcılıq kursunun aşağı düşməsi, inflyasiyanın yüksəlməsi, sosial gərginliyin artması fonunda CXP-yə Qərbdən olan dəstək, ölkə seçiciləri, xüsusilə gənclər arasında sol mərkəzçi ideyalara meylin artması və s seçkilərdə CXP-nin namizədinin xeyrinə işləyəcək faktorlar kimi dəyərləndirilirdi. Bu şəraitdə siyasi konyuktura ilə bağlı mövqelərdən çıxış edən hakim partiya qarşıdakı seçkilərdə məğlubiyyətdən sığortalanmaq üçün İmamoğlunu seçki marafonundan kənarlaşdıra biləcək fəndə əl atdı. İmamoğlu korrupsiya qalmaqlarında ittiham olundu, onun ali təhsilli olması barədə diplomun isə "saxta" olduğu aşkarlandı. Bu ittihamlarla haqqında qəti həbs imkan qərarı çıxarılan şəxs və daha 9 nəfər haqqında isə noyabrın 18 də məhkəmə seçki qanunun pozulması barədə də qərar qəbul etdi. Ən əsası siyasi fəaliyyət müxalifət liderlərindən sayılan bu şəxsə yasaq edildi. Çox güman ki, burada məqsəd növbəti prezident seçkilərində İmamoğlunun iştirakını önləməkdir.
Əlbəttə, Türkiyə məhkəməsinin icra hakimiyyəti və ya iqtidar yetkilərinin təsiri ilə qərar qəbul etməsi barədə ciddi dəlil və sübutlar yoxdur. Rəsmi Ankara da məhkəmə qərarlarının arxasında hər hansı siyasi konyukturanın olmadığını bəyan edir. Bununla belə Türkiyədə azad media, xüsusilə müxalifətlə bağlı media və KİV-lərə məhz məhkəmələr üzərindən Türkiyə iqtidarının sifarişi və bilavasitə təsiri ilə təzyiqlərin artması barədə elə Türkiyə, habelə dünya mətbuatı da məlumatlar tirajlamaqdadır. Avropa Parlamentinin 2025-ci ilin 13 fevralında Türkiyədə qanunların aliliyinin son illər ərzində məhkəmə orqanları tərəfindən heç də həmişə gözlənilməməsi ilə bağlı qətnaməsi də məhz bununla bağlıdır”.
Əli Orucov: “Bütün bunlar o demək deyil ki, ölkədə hər şey bir nəfərin iradəsi ilə həll edilir”
AMİP funksioneri Əli Orucov isə məsələyə bir qədər fərqli prizmadan yanaşdı: “Bəli, son illər Türkiyə demokratiyasında bir sıra problemlər var. Ölkədə bir sıra siyasi, iqtisadi, sosial təbəddülatlar yaşanmaqdadır. Ancaq bütün bunlar o demək deyil ki, ölkədə hər şey bir nəfərin iradəsi ilə həll edilir. Şəxsən mən hesab edirəm ki, Türkiyə zəngin dövlətçilik ənənələrinə malik olduğu üçün sözügedən məsələdə ədalətli qərar verəcək”.
Vidadi ORDAHALLI