Rusiya Prezidenti Vladimir Putin Çində keçirilən mətbuat konfransında Krım körpüsünə endirilən zərbələrə ilk dəfə münasibət bildirib. Hücum nəticəsində körpünün bu həftə qismən dağıldığı bildirilir.
Putin iddia edib ki, onun göstərişi ilə artıq uzun müddətdir Krım körpüsü vasitəsilə hərbi texnika və sursat daşınmır. Onun sözlərinə görə, hətta neft və neft məhsullarının da daşınması dayandırılıb.
Rusiya lideri ilhaq edilmiş Krımı Rusiya ilə birləşdirən körpünün yalnız mülki obyekt olduğunu vurğulayıb.
Putin Ukraynanın Rusiya gəmilərinə və digər obyektlərinə hücumlarını xatırladaraq, Moskvanın buna cavab zərbələri endirdiyini bildirib. O, Rusiyanın cavab tədbirlərinin daha ağrılı olduğunu iddia edib.
Rusiya Prezidenti Krım körpüsünə hücumlardan sonra danışıqlar aparmaq niyyətində olmadıqlarını da bəyan edib: “Bu hücumlara cavab verəcəyik. İstəyirəm ki, hamı bunu bilsin. Hesab edirəm ki, cavab tədbirlərimiz daha ağrılı olacaq. Körpünü isə, əlbəttə, bərpa edəcəyik”.
Putinin sözlərinə görə, körpünün avtomobil hissəsinə ciddi ziyan dəyib, dəmir yolu hissəsi isə artıq bərpa olunub.
Rusiya Prezidenti Qərb ölkələrinin Moskvanı ərazi məsələsində mövqeyini dəyişməyə məcbur etmək cəhdlərini mənasız adlandırıb.
O bildirib ki, Rusiya mövcud vəziyyətdən çıxış edir və nəzarətində olan əraziləri geri qaytarmaq niyyətində deyil.
“Biz heç nədən imtina etmək fikrində deyilik, kompromislər axtarmaq niyyətindəyik və hesab edirik ki, bu, mümkündür”, – Putin deyib.
Onun fikrincə, müharibənin başa çatması üçün Ukrayna və Avropa hakimiyyətləri “yerdəki reallıqları” qəbul etməli və onların rəsmiləşdirilməsinə razılıq verməlidirlər.
Putin Ukraynanın NATO-ya üzvlüyü məsələsini də yenidən gündəmə gətirib. Rusiya Prezidenti Moskvanın Ukraynanın NATO-ya üzvlüyünə dəfələrlə qarşı çıxdığını, lakin Rusiyanın mövqeyinin nəzərə alınmadığını iddia edib.
O, bildirib ki, Moskvanın xəbərdarlıqlarına məhəl qoyulmaması nəticədə silahlı münaqişəyə gətirib çıxarıb.
Putin keçmiş Ukrayna Prezidenti Viktor Yanukoviçin də ölkənin NATO-ya üzvlüyünə qarşı olduğunu xatırladıb. Onun sözlərinə görə, 2014-cü ildə Yanukoviçin hakimiyyətdən uzaqlaşdırılmasından sonra Ukraynanın NATO-ya üzvlüyü məsələsi yenidən gündəmə gəlib.
Rusiya lideri 2008-ci ildə Buxarestdə keçirilən NATO sammitində Ukrayna və Gürcüstana gələcəkdə alyansa üzv olmaq vədinin verilməsini də xatırladıb.
Putin Avropanın Ukraynaya hərbi qüvvə göndərməsinə də qarşı çıxıb. O,
Avropanın təhlükəsizliyinin Avropa ölkələrinin iştirakı olmadan müzakirə edilməsini qəribə hesab etdiyini bildirib. Bununla yanaşı, Moskvanın mümkün danışıqlarda Avropanın hansı mövqedən çıxış edəcəyini əvvəlcədən bilməli olduğunu vurğulayıb.
Putin Avropa ölkələrinin Ukraynaya hərbi kontingent yerləşdirmək niyyətlərini də tənqid edib.
“Bizim üçün Ukrayna ərazisinə istənilən xarici qoşunların yeridilməsi qəbuledilməzdir”, – deyə Rusiya Prezidenti bildirib.
O, Avropa ölkələrinin bir tərəfdən müharibənin dayandırılmasını istədiklərini, digər tərəfdən isə Ukraynaya qoşun göndərməyi planlaşdırdıqlarını iddia edib.
Rusiya Prezidenti ölkəsinə qarşı tətbiq edilən sanksiyaların legitim olmadığını və beynəlxalq hüquq normalarına zidd olduğunu bəyan edib.
“Rusiyaya qarşı tətbiq edilən sanksiyalar qeyri-legitimdir və beynəlxalq hüquq normalarına ziddir”, – Putin bildirib.
O, Ukraynanı ABŞ-ın təklif etdiyi kompromisləri qəbul etməyə çağırıb. Rusiya Prezidenti Ukraynanın münaqişənin həlli üçün ABŞ tərəfindən təklif olunan kompromislərlə razılaşmalı olduğunu bildirib.
Onun sözlərinə görə, Moskva hələ Ankoric görüşündən əvvəl ABŞ tərəfindən irəli sürülən təklifləri qəbul edib və indi qərar Kiyevdən asılıdır.
“Əgər onlar münaqişəni başa çatdırmaq istəyirlərsə, amerikalıların Ankoricdən əvvəl təklif etdikləri kompromislərlə razılaşsınlar. Biz onlarla razılaşmışıq, indi növbə Ukraynanındır”, – Putin deyib.
Rusiya lideri Avropa ölkələrinin Ukraynaya iqtisadi yardım göstərməsi məsələsinə də münasibət bildirib. O, Avropa xalqlarının Ukraynanı maliyyələşdirməyə davam etmək istəyinin öz qərarları olduğunu söyləyib.
Qeyd edək ki, Vladimir Putin noyabrın 18-19-da Çinin Şençjen şəhərində keçirilən Asiya-Sakit Okean İqtisadi Əməkdaşlıq Təşkilatının (APEC) sammitində iştirak edib. Noyabrın 19-da Putin, Çin Sədri Si Cinpin və ABŞ Prezidenti Donald Tramp arasında üçtərəfli görüş keçirilib. Rusiya tərəfinin məlumatına görə, təxminən bir saat yarım davam edən görüş Rusiya, Çin və ABŞ liderlərinin tarixdə ilk üçtərəfli təması olub.
Tahir TAĞIYEV