“Ermənistanın dəmir yolunun bərpasına ehtiyac var, lakin Rusiya tərəfi bunu özünə sərfəli hesab etməyərək tərəddüd edir”.
Bunu Ermənistan Parlamentinin spikeri Ruben Rubinyan bildirib.
O, Ermənistanın dəmir yolu şəbəkəsini idarə edən Rusiya şirkətlərinə tətbiq edilən sanksiyalar nəzərə alınmaqla, ölkənin tranzit zonasına çevrilmək baxımından rəqabət qabiliyyətini itirə biləcəyini qiymətləndirib. Ruben Rubinyan bu mövzu ilə bağlı müzakirələrin müsbət getdiyini və tezliklə həll yolu tapılacağına ümid etdiyini bildirib: "Bu, geosiyasi məsələ deyil, iqtisadi məsələdir. Biz iqtisadi rəqabət qabiliyyətimizi qorumaq və ya qazanmaq məqsədinə çatmalıyıq. Bizim Rusiyaya və ya “Rusiya Dəmir Yolları”na qarşı heç bir etirazımız yoxdur, amma biz təcrid olunmuş qalmaq istəmirik və dəmir yolu təcridindən qaçmaq və tranzit ölkəyə çevrilmək imkanını itirməmək üçün həll yolları tapmalıyıq".
Bu arada Rusiya tərəfi “Cənubi Qafqaz Dəmir Yolu”nun konsessiya müqaviləsi çərçivəsində Ermənistan dəmir yollarının idarə edilməsinin səmərəliliyi ilə bağlı məsələləri müzakirə etmək üçün birgə işçi qrupun ilk iclasında Ermənistan dəmir yolu şəbəkəsinin inkişaf perspektivləri və yük daşımalarının artımı ilə bağlı qiymətləndirmələrini təqdim edib. Ermənistan Ərazi İdarəetmə və İnfrastruktur Nazirliyinin mətbuat xidmətinin açıqlamasında deyilir: "Rusiya tərəfi dəmir yolu şəbəkəsinin inkişaf perspektivləri və yük daşımalarının artımı ilə bağlı qiymətləndirməsini təqdim edərək, regionda rəqabətin, sərbəst tutumun və investisiya gəlirlərinin təmin edilməsi məsələlərinə diqqət yetirib". Qeyd olunub ki, işçi qrupun Ermənistan tərəfindən sədri, nazir müavini David İvanyan Ermənistan hökumətinin dəmir yolu şəbəkəsinin inkişafı və regional kommunikasiyaların bərpası ilə bağlı vizyonunu təqdim edib. O, həmçinin onların region və respublika iqtisadiyyatı üçün əhəmiyyətini vurğulayıb. Tərəflər işi davam etdirmək və işçi qrupun müntəzəm görüşlərini təşkil etmək barədə razılığa gəliblər. Amma Ruben Rubinyanın açıqlaması tərəflər arasında dəmir yolu ilə bağlı ziddiyyətlərin hələ də davam etdiyini nümayiş etdirir.
Samirə SƏFƏROVA