Ukrayna Silahlı Qüvvələri noyabrın 18-nə keçən gecə Rusiyanın Krasnodar diyarında yerləşən iki iri neft emalı zavodunu (NEZ) pilotsuz uçuş aparatları ilə hədəfə alıb. Bu, ayın əvvəlindən bəri həmin müəssisələrə qarşı ikinci hücumdur.
Regionun əməliyyat qərargahının məlumatına görə, Severski rayonunda PUA qalıqlarının düşməsi nəticəsində iki müəssisədə yanğın baş verib. Bundan başqa, pilotsuz aparatların fraqmentləri yaşayış evlərinin həyətlərində və küçələrdə olmaqla doqquz ünvanda aşkarlanıb. Hadisə nəticəsində dörd nəfər xəsarət alıb və onlara tibbi yardım göstərilir.
Ukraynanın “Exilenova+” monitorinq kanalının məlumatına görə, hücumun hədəfi Afipski və İlski neft emalı zavodları olub. “Astra” nəşrinin mənbələri hər iki müəssisənin ərazisində yanğın baş verdiyini təsdiqləyib.
Afipski neft emalı zavodu Krasnodar diyarının üç ən böyük, Rusiyanın cənubunun isə beş ən böyük NEZ-dən biridir. Müəssisə ildə 7 milyon tondan çox neft emal etmək gücünə malikdir. Zavodda benzin, dizel yanacağı, aviasiya kerosini və digər neft məhsulları istehsal olunur. Müəssisənin əsasən ixrac yönümlü olduğu bildirilir.
Məlumata görə, Afipski zavodu ilin əvvəlindən bəri səkkizinci, noyabr ayında isə ikinci dəfə hücuma məruz qalıb. Sonuncu dəfə noyabrın 6-da PUA-larla vurulub.
İlski neft emalı zavodu da Krasnodar diyarının üç ən böyük müəssisəsindən biridir. İllik təxminən 6,6 milyon ton neft emalı gücünə malik zavod benzin, dizel yanacağı və digər neft məhsulları istehsal edir. Müəssisə sonuncu dəfə noyabrın 16-da PUA hücumuna məruz qalıb. Ukrayna Silahlı Qüvvələrinin Baş Qərargahı həmin hücum nəticəsində zavodun üç atmosfer distillə qurğusunun sıradan çıxarıldığını iddia etmişdi.
Qeyd edək ki, Ukrayna Silahlı Qüvvələri oktyabrın sonlarından etibarən Rusiyanın neft emalı müəssisələrinə hücumları intensivləşdirib. Son həftələrdə ölkədəki 35 zavoddan təxminən 10-u hücuma məruz qalıb. Onların arasında Novokuybışevsk, Ryazan, Afipski, Saratov, Yaroslavl, Omsk, Nijni Novqorod, Ufa və Kirışı neft emalı zavodları da var.
“Reuters” agentliyinin məlumatlı mənbələrə istinadən yaydığı məlumata görə, bu hücumlar nəticəsində Rusiyada neft emalının həcmi əvvəlki ayın sonu ilə müqayisədə 30% azalıb. Mənbələrin qiymətləndirməsinə əsasən, oktyabrın sonunda sutkalıq neft emalı təxminən 700 min ton (5 milyon barel) təşkil etdiyi halda, noyabrın ortalarında bu göstərici 500 min tona düşüb.
Neft emalı sahəsində yaranan problemlər Rusiyanın bir sıra regionlarında yanacaq çatışmazlığına və benzin satışına məhdudiyyətlərin tətbiqinə səbəb olub. Məlumata görə, Leninqrad, Nijni Novqorod, Arxangelsk, Novosibirsk və Penza vilayətlərində, eləcə də Kareliya və Buryatiyada yanacaq satışına məhdudiyyətlər qoyulub.
Moskvada isə “Rosneft” yanacaqdoldurma məntəqələrində satış limitləri yenidən tətbiq edilib. Belə ki, bir avtomobilə maksimum 50 litr yanacaq doldurulmasına, kanistrlərə isə 20 litrdən artıq yanacaq satılmasına icazə verilmir.
Tahir TAĞIYEV