Çexiya Respublikası rusiyalı idmançıların yarışlarda iştirak etmək üçün ölkəyə girişinə icazə verməkdən imtina edib. Bu barədə daxili işlər naziri Lubomir Metnar Çexiya Xokkey Assosiasiyasının rəhbərliyi ilə keçirilən və Rusiya komandalarının dünya çempionatlarında iştirakı məsələsinin müzakirə olunduğu görüşdən sonra məlumat verib. Metnar bildirib ki, həmin idmançıların, digər Şengen zonası ölkələri tərəfindən verilmiş vizaları olsa belə, ölkəyə girişinin qarşısını almaq niyyətindədir. Onun sözlərinə görə, xarici işlər naziri Petr Maçinka artıq beynəlxalq tərəfdaşları Praqanın bu mövqeyi barədə məlumatlandırıb. Yanvar ayında Ostrava şəhəri 18 yaşadək qızlar arasında IIHF (Beynəlxalq Xokkey Federasiyası) Dünya Çempionatına ev sahibliyi edəcək. Çexiya Xokkey Assosiasiyası Beynəlxalq Xokkey Federasiyasını (IIHF) ölkə hakimiyyətinin rusiyalı idmançılara viza verməyəcəyi barədə xəbərdar edəcək. Daha əvvəl Beynəlxalq Xizək və Snoubord Federasiyası (FIS) Rusiya və Belarusdan olan idmançılara qarşı tətbiq edilən məhdudiyyətləri yumşaltmışdı; İdman Arbitraj Məhkəməsi isə Beynəlxalq Xokkey Federasiyasının Rusiya milli komandalarına 2026/27-ci il mövsümündə yarışlarda iştirak etməyə icazə verməli olduğuna dair qərar çıxarmışdı. Bundan sonra Finlandiya və Norveç Rusiya və Belarus idmançılarının yarış məqsədilə öz ərazilərinə daxil olmasını qadağan etdi. Estoniya Mədəniyyət Nazirliyi də FIS-ə məlumat verərək, həmin idmançıların ölkəyə girişinə icazə verməyəcəyini bildirib.
SAMİRƏ