Ermənistan Təhlükəsizlik Şurasının katibi Alen Simonyan müxalifətin yeni Konstitusiya ilə bağlı təklifləri qəbul etməyəcəyi təqdirdə növbədənkənar parlament seçkilərinin keçirilə biləcəyini bildirib.
Ermənistan mediasının məlumatına görə, Simonyan noyabrın 19-da jurnalistlərə açıqlamasında müxalifətin düşüncə tərzini nəzərə alaraq, onların hakimiyyətin təklifləri ilə razılaşmayacağını iddia edib.
“Yeni seçkilər keçirəcəyik və onları darmadağın edəcəyik. Seçkilərin keçirilməsi ilə bağlı hansı problemimiz var? Heç bir problemimiz yoxdur”, – deyə o bildirib.
Simonyan Ermənistanın regionda düşmənlərinin olmadığını, ölkə üçün əsas təhlükənin isə onun iddiasına görə, Ermənistanda fəaliyyət göstərən və siyasi birliklər yaradan xarici agentlər olduğunu söyləyib.
O, həmçinin Ermənistan Konstitusiyasının dəyişdirilməsinin zəruriliyini müdafiə edib. Simonyanın sözlərinə görə, 1990-cı illərdə qəbul edilmiş Konstitusiya ilə indiki geosiyasi reallıqlar arasında uyğunsuzluq var.
Təhlükəsizlik Şurasının katibi bildirib ki, yeni Konstitusiya qəbul ediləcəyi təqdirdə qurum artıq konstitusion orqan statusunda olmayacaq. Onun sözlərinə görə, gələcəkdə milli təhlükəsizlik üzrə müşavir vəzifəsinin yaradılması mümkündür.
Simonyan əlavə edib ki, hakimiyyət yeni seçkilər və Konstitusiya məsələsi ilə bağlı qərarı xalqın iradəsinə uyğun qəbul etməyə hazırdır.
Tahir TAĞIYEV