Təmas xəttində hərbi əməliyyatların dayandırılması barədə Ermənistan və Azərbaycan arasında yenidən atəşkəsin əldə olunması doğru bir yol olsa da, bu, problemi aradan qaldırmır. Bunu Trend-ə Türkiyənin Azərbaycandakı səfiri İsmayıl Alper Coşqun deyib.
Azərbaycan torpaqlarının işğal altında olmasının ən ciddi bir problem olduğunu deyən səfir heç kimin müharibə istəmədiyini də söyləyib: "Kimsənin könlündən müharibə keçməz, heç kəs bunu arzulamaz. Atəşkəs müharibənin olmaması üçün sevindirici bir hal olsa da, problemi aradan qaldırmır. İşğal davam etdiyinə görə atəşkəs də bu işğala görə qarşıdurma olmasın deyə bağlanıb. Buna görə də problemin özünün həll edilməsi, yəni işğalın dayandırılması lazımdır. Onun da parametləri bəllidir".
İ.A.Coşqun qeyd edib ki, Azərbaycanın ərazi bütövlüyü çərçivəsində bu problem aradan qaldırılarsa, atəşkəsə də ehtiyac qalmayacaq: "Bu halda hər bir ölkə özünün tanınmış sərhədləri daxilində sülh, xoşbəxtlik içində yaşaya biləcək. Vəziyyətin normallaşmasına görə də əsas işimizə dönə biləcəyik. Əsas işimiz də bölgənin, xalqlarımızın rifahı, işbirliyinin qurulması, ticarətin inkişafıdır. Bunlara nail olmaq üçün vəziyyətin normallaşması lazımdır. Normallaşmanın olması üçün isə işğala son verilməsi lazımdır. İşğala son qoyularsa, təbii ki, atəşkəsə də ehtiyac qalmayacaq".
Qeyd edək ki, aprelin 5-də Azərbaycan və Ermənistan qoşunlarının təmas xəttində tərəflərin razılığı ilə əməliyyatlar dayandırılıb. Buna baxmayaraq, Ermənistan tərəfi atəşkəsi pozmaqda davam edir.
"Türkiyədə bu il ərzində baş verən terror aktları ilə əlaqədar olaraq, Azərbaycandan ölkəmizə yay ayları ərzində gedən turistlərin sayının azalacağı gözlənilmir". Bunu da İsmayıl Alper Coşqun deyib.
Səfirin sözlərinə görə, Türkiyə hər zaman dünyanın ən önəmli turizm mərkəzlərindən biri olmaqda davam edəcək: "Təəssüf olsun ki, bu gün dünyanın hər yeri terror təhlükəsi ilə üz-üzədir. Türkiyə azərbaycanlı qardaşlarımızın hər zamankı kimi öz ölkəsidir".
Terrrorizmin dünyanı təhdid edən ən başlıca problem olduğunu deyən İ.A.Coşqun əlavə edib ki, terrorizm sadəcə Türkiyəni hədəfə almır: "Çox təəssüf ki, son bir necə ay ərzində İstanbulda və Ankarada terror hadisələri baş verdi. Terrorçuların Türkiyəni hədəfə alması əsas müzakirə olunan mövzu oldu. Ancaq bu hadisələr sadəcə Türkiyədə baş vermir. Bu hadisələr Belçikada da, Fransada da, Afrikada da, Pakistanda da olur. Bu, dünyanın çox acı bir gerçəyidir. Bundan dərs almaq üçün hər bir dövlət terrora qarşı mübarizə aparmalıdır. Türkiyədə, Pakistanda və digər yerlərdə "terror təhdidi mənə toxunmaz", "yaxşı və pis terrorçu" müzakirə mövzusu deyil. Bu bəla ilə mübarizə aparmaq üçün hər birimiz qərarlı olmaq məcburiyyətindəyik. Bunu anlamamaq mümkün deyil. Avropada terror fəaliyyəti ilə məşğul olmayan, lakin bütün maliyyə qaynaqlarını Avropanın fərqli ölkələrindən alan, iş yerlərindən zorla pul toplayaraq bu pulları terror fəaliyyətlərinə yönəldən mənbələri qurutmalıyıq".
Səfir əlavə edib ki, PKK-nın bütün maliyyə qaynaqları Türkiyə hüdudlarından kənardadır: "Dünyanın bu faktla mübarizə aparması lazımdır. Türkiyə uzun müddətdir ki, buna qarşı iradəli bir şəkildə mübarizə aparır. Terrorçuların əsas məqsədi vətəndaşların rifahına zərər vurmaqdır. Bizim buna heç bir halda izn verməyimiz mümkün deyil".
Diplomat deyib ki, Türkiyə ölkənin və vətəndaşların təhlükəsizliyini təmin etmək üçün bütün bunlara qarşı tədbirlər görəcək.
Xatırladaq ki, Türkiyə azərbaycanlı turistlərin səfər etdikləri ölkələr sırasında ilk yeri tutur.
Səfir bildirib ki, dünyada baş verən iqtisadi böhran şəraitində Türkiyə və Azərbaycan arasında birgə layihələrin icrasının dayandırılması müzakirə mövzusu deyil. Onun sözlərinə görə, hər iki tərəfin birgə icra etdiyi layihələr planlaşdırılan şəkildə davam edir: "Hazırda Bakı-Tbilisi-Qars dəmir yolu layihəsi icra edilir. İşlər planlaşdırıldığı şəkildə davam etdirilir. Bu ilin sonunda Bakı-Tbilisi-Qars dəmir yolu xətti istifadəyə veriləcək. TANAP layihəsi üzrə işlər planlaşdırılandan da sürətlə aparılır".
Səfir qeyd edib ki, Türkiyə və Azərbaycanın ortaq layihələrinin həyata keçirilməsi təkcə siyasi iradə ilə bağlı deyil: "Bu layihələr sayəsində sadəcə Türkiyə və Azərbaycan deyil, bizim önəm verdiyimiz daha geniş yaxın coğrafiya iqtisadi böhran kimi çətinliklərdən çıxmaq imkanına da malik olacaq. Bakı-Tbilisi-Qars dəmir yolu layihəsi sayəsində həm ticarət, həm də logistika baxımından əlaqələr daha da canlanacaq, bu əlaqələr uğurlu şəkildə həyata keçiriləcək. İqtisadi böhrana görə layihələrin icrasını dayandırmaq barədə fikirləşmirik. Əksinə, yeni layihələr üzərində işləməyə davam edəcəyik".
