Afsəddin Nəbiyev: “Bu, Azərbaycana öz mövqeyini daha geniş auditoriyaya çatdırmaq üçün əlavə imkanlar yaradır”
Prezident İlham Əliyev VII Ümumdünya Mədəniyyətlərarası Dialoq Forumunda çıxışı zamanı deyib ki, Azərbaycanın iki mötəbər tədbirə ev sahibliyi etməyə hazırlaşması bizə göstərilən hörməti nümayiş etdirir:
“Gələn il İslam Əməkdaşlıq Təşkilatının Zirvə Görüşünə ev sahibliyi edəcəyik və biz demək olar ki, 60 ölkəni birləşdirən bu mötəbər beynəlxalq təsisata sədrlik edəcəyik. Bunu siyasətimizə, dinimizə, ənənələrimizə və dəyərlərimizə olan münasibətin, hörmətin əlaməti kimi qəbul edirik. 2028-ci ildə biz Avropa Siyasi Birliyinin Zirvə Görüşünə ev sahibliyi edəcəyik. Bu format artıq dörd ildir ki, mövcuddur və Zirvə görüşlərinin keçirilməsinə yalnız 2022-ci ildən başlanılıb. Beləliklə 2028-ci ildə Zirvə Görüşü Bakıda keçiriləcəkdir. Avropa Siyasi Birliyində 50-dən çox ölkə var. Beləliklə bir şəhərdə, bir ölkədə bu iki mötəbər qlobal tədbir keçiriləcək. Bu da bizə göstərilən hörməti nümayiş etdirir”.
Sözügedən məsələni baki-xeber.com-a şərh edən AMİP-in sədr müavini Afsəddin Nəbiyevin fikrincə, İslam Əməkdaşlıq Təşkilatı (İƏT) və Avropa Siyasi Birliyi kimi fərqli siyasi platformaların zirvə görüşlərinə Bakının ev sahibliyi etməsi Azərbaycanın beynəlxalq mövqeyi baxımından mühüm hadisədir: “Bu, ölkəmizin regionda söz sahibi olması ilə bərabər həm də qlobal siyasi dialoqda iştirak edən və ona ev sahibliyi edən dövlət kimi qəbul edildiyini göstərir. Müasir dünyada bir ölkənin gücü təkcə iqtisadi imkanları və hərbi potensialı ilə ölçülmür. Onun beynəlxalq münasibətlərdə nə qədər fəal olması, hansı tərəflərlə dialoq qurması və qərarların qəbuluna nə dərəcədə təsir göstərməsi də böyük əhəmiyyət daşıyır. Bu baxımdan, Bakıda keçirilən beynəlxalq zirvələr Azərbaycana öz mövqeyini daha geniş auditoriyaya çatdırmaq üçün əlavə imkanlar yaradır. Bu siyasət Azərbaycana müxtəlif güc mərkəzləri ilə münasibətlərini balanslaşdırmaq və milli maraqlarını daha çevik şəkildə qorumaq imkanı verir. Təbii ki, burada söhbət sadəcə bütün tərəflərlə münasibət saxlamaqdan getmir. Əsas məsələ həmin əlaqələri konkret siyasi, iqtisadi və strateji nəticələrə çevirməkdir. Beynəlxalq təşkilatlarda sədrlik və zirvə görüşlərinə ev sahibliyi etmək ölkəyə gündəliyə təsir göstərmək üçün də imkan açır. Azərbaycan İƏT çərçivəsində İslamofobiya ilə mübarizə, iqtisadi tərəfdaşlıq, təhsil, elm və mədəniyyət sahələrində təşəbbüslər irəli sürə bilər. Bu təşəbbüslərin beynəlxalq sənədlərdə əks olunması və əməli addımlarla dəstəklənməsi isə ölkəmizin diplomatik nüfuzunu daha da artıra bilər”.
A.Nəbiyev hesab edir ki, digər mühüm məsələ Azərbaycanın Cənubi Qafqazdakı mövqeyidir: “Xüsusilə sülh, nəqliyyat əlaqələri, enerji təhlükəsizliyi və iqtisadi əməkdaşlıq kimi məsələlərdə Azərbaycan öz imkanlarını daha geniş şəkildə təqdim edə bilir. Belə tədbirlərin əhəmiyyəti yalnız plenar iclaslarda səsləndirilən bəyanatlarla məhdudlaşmır. Dövlət və hökumət rəhbərləri, xarici işlər nazirləri və beynəlxalq təşkilatların nümayəndələri arasında keçirilən ikitərəfli görüşlər yeni razılaşmaların əldə olunmasına şərait yaradır. Bəzən rəsmi çıxışlardan kənarda aparılan diplomatik danışıqlar konkret nəticələrə gedən yolu daha da sürətləndirir. Enerji, nəqliyyat, ticarət və təhlükəsizlik sahələrində yeni əməkdaşlıq imkanlarının müzakirəsi Azərbaycanın iqtisadi maraqlarına da xidmət edə bilər. Lakin bunun üçün yaranmış siyasi imkanlar davamlı danışıqlarla, konkret layihələrlə və qarşılıqlı fayda prinsipi əsasında həyata keçirilən əməkdaşlıqla möhkəmləndirilməlidir. Beynəlxalq zirvələrin daxili ictimaiyyət üçün də müəyyən mənası var. Belə tədbirlər Azərbaycanın dünya siyasətindəki yerini göstərir, ölkənin beynəlxalq əlaqələrinə və diplomatik təcrübəsinə diqqəti artırır. Bu, xüsusilə gənc nəsildə dövlətinin beynəlxalq proseslərdə fəal iştirak etməsi barədə təsəvvürün formalaşmasına töhfə verir. COP29 təcrübəsi də göstərdi ki, böyük beynəlxalq tədbirlərin təşkili ölkəyə yeni əlaqələr qurmaq, təcrübə toplamaq və gələcək təşəbbüslər üçün imkanlar yaratmaq baxımından faydalı ola bilər. Ancaq hər bir belə tədbirin real dəyəri onun miqyası ilə yanaşı, sonrakı dövrdə əldə olunan nəticələrlə müəyyən edilir. Əgər Azərbaycan beynəlxalq nüfuzunu regional sülhün möhkəmləndirilməsinə, iqtisadi əməkdaşlığın genişləndirilməsinə və milli maraqlarının qorunmasına yönəldə bilsə, bu tədbirlər uzunmüddətli strateji qazanca çevriləcək. Bakının fərqli siyasi platformalar üçün görüş məkanına çevrilməsi Azərbaycanın diplomatik imkanlarını genişləndirir. İndi əsas məsələ bu imkanlardan səmərəli istifadə etmək, dialoqu konkret nəticələrlə tamamlamaq və ölkəmizin beynəlxalq mövqeyini davamlı şəkildə gücləndirməkdir. Çünki dünya siyasətində nüfuz yalnız səni dinləmələri ilə deyil, mövqeyinin qərarlara və hadisələrin gedişinə təsir göstərməsi ilə ölçülür”.
Vidadi ORDAHALLI
