Azərbaycan Respublikası Daxili İşlər Nazirliyinin məlumatlarına əsasən, 2022-ci il ərzində ölkədə 36494 cinayət hadisəsi qeydə alınıb. Bu da 2021-ci ilin göstəricisindən 17,2 faiz çoxdur.
Dövlət Statistika komitəsinin yaydığı məlumata görə, ötən il əhalinin hər 100 min nəfərinə 361 cinayət hadisəsi düşüb, onların da 59,6 faizini az ağır, 23,8 faizini böyük ictimai təhlükə törətməyən, 16,6 faizini isə ağır və xüsusilə ağır cinayətlər təşkil edib.
Hesabat dövründə 24432 nəfər cinayət törətmiş şəxs müəyyən edilib, 19069 nəfər isə cinayət məsuliyyətinə cəlb olunub.
Maraqlı məqam ondan ibarətdir ki, cinayət törədənlər arasında işsiz və ali təhsili olmayan şəxslər də var.
Mahmud Hacıyev: “Cəmiyyət olan yerdə cinayət olur, insan faktoru varsa, cinayət də var”
Kriminalist Mahmud Hacıyev bildirdi ki, cəmiyyət olan yerdə cinayət olur: “İnsan faktoru varsa, cinayət də var. Yəni demək olmaz ki, mütləq qaydada cinayətlər azalmalı və yaxud yox olmalıdır. Bunu birmənalı olaraq qəbul etmək lazımdır. İnsan mürəkkəb xarakterli məxluqdur. İnsanın səbri, iradəsi, intellekti, tərbiyəsi var”.
M.Hacıyevin sözlərinə görə, hər insanın psixoloji durumu eyni deyil: “İnsan var, adi bir sözə reaksiya verir, insan da var səbrlidir. Elə ay, il olur ki, cinayətlərin sayı artır, elə vaxt da olur azalır, normaldır. Cinayətsiz cəmiyyət ola bilər? Heç cür ola bilməz!”.
Könül İsmayılova: “Bu gün cinayət hadisələrinin sayının artmasının səbəblərindən biri də gənclərin, işsiz kütlənin el arasında “vorovskoy aləm” adlanan şəxslərə…”
Psixoloq Könül İsmayılova bildirdi ki, insanlarda sanki qisasçılıq hissi var. Cinayətlərin əksəriyyəti işsizlik, yoxsulluq, sosial və iqtisadi problemlərdən qaynaqlanır. Belə hal təkcə Azərbaycanda deyil bütün dünyada var. Bu cür problemlər olduqca xüsusi amansızlıqla törədilən cinayətlərin də sayı azalmayacaq: "Cinayət törədənlər arasında ziyalılar da var, bundan sonra da olacaq. Çünki ilk növbədə cinayətin motivinə baxmaq lazımdır. Daha çox cinayətlərin motivi qisasçılıq və qısqanclıq olur. Bu motivlər əsasında cinayətləri sadə vətəndaş da , ali təhsilli vətəndaş da törədə bilər. Amansızlıqla törədilən cinayətlərin sayının artmasının əsas səbəbi cəmiyyətdə aqressivliyin artmasıdır. Təbii ki, aqressivlik artanda, bu, ailə-məişət məsələlərinə də öz təsirini göstərir. Aqressivliyin əsas səbəbləri məişət şəraitinin ağır olmasına iqtisadi çətinliklər, dünyada gedən proseslər, iqlim dəyişkənliyi və s. aid etmək olar”.
Həmsöhbətimiz onu da əlavə etdi ki, bu gün cinayət hadisələrinin sayının artma səbəblərindən biri də gənclərin, işsiz kütlənin el arasında “vorovskoy aləm” adlanan şəxslərə maraq və rəğbət göstərməsidir.
Günel CƏLİLOVA
