Akif Nağı: “Avropa Parlamentinin bu addımı Ermənistanın Rusiyadan qoparılmasına yönəlib”
Senytabrın 15-də Avropa Parlamenti Ermənistan malları üçün müvəqqəti ticarət liberallaşdırma tədbirləri haqqında qanun layihəsinə səs verəcək. Sənəddə Ermənistanın Avropa İttifaqına ixracının təxminən 80%-nə idxal rüsumlarının müvəqqəti olaraq qaldırılması nəzərdə tutulur. Məsələ 14-17 sentyabr tarixlərində Strasburqda keçiriləcək Avropa Parlamentinin plenar iclasının gündəliyindədir.
Söhbət "Ermənistandan gələn mallara tətbiq edilən müvəqqəti ticarət liberallaşdırma tədbirləri haqqında" (2026/0189(COD)) qanun layihəsindən gedir.
Sentyabrın 2-də Aİ Şurası Avropa Komissiyasının təklifini düzəlişsiz təsdiqləyib və bu, onun Avropa Parlamenti tərəfindən tez bir zamanda yekun qəbul edilməsinə yol açıb.
Təklif olunan tədbirlər geniş çeşiddə Ermənistan mallarına idxal rüsumlarının müvəqqəti dayandırılmasını nəzərdə tutur. Tarif kvotaları müəyyən kənd təsərrüfatı məhsullarına tətbiq olunacaq və güzəştli rejim Avropa bazarı üçün qoruyucu mexanizmlərlə müşayiət olunacaq.
Avropa Parlamentinin mövqeyinin rəsmi təsdiqindən sonra Aİ Şurası nəhayət qaydanı qəbul etməlidir. Sənəd Aİ-nin Rəsmi Jurnalında dərc olunduğu gündən bir gün sonra qüvvəyə minəcək və iki il müddətində tətbiq olunacaq.
Aİ Şurası qeyd edib ki, yeni tədbirlər Rusiya tərəfindən tətbiq edilən və Ermənistanın ixracına və tranzitinə təsir edən ticarət məhdudiyyətlərindən sonra Ermənistan iqtisadiyyatını dəstəkləməyə yönəlib.
Təklifə əsasən, güzəştli rejim Ermənistanın bir sıra şərtlərə, o cümlədən malların mənşə qaydalarına, Aİ ilə inzibati əməkdaşlıq, Aİ-dən idxala yeni məhdudiyyətlərin tətbiqinin qarşısının alınmasına və Aİ-Ermənistan Hərtərəfli və Genişləndirilmiş Tərəfdaşlıq Sazişinin (CEPA) əsas müddəalarına riayət etməsinə tabe olacaq.
Azad Vətən Partiyasının sədri Akif Nağı baki-xeber.com-a bildirdi ki, Avropa İttifaqının və digər Avropa təsisatlarının Ermənistana münasibəti aydındır. Avropa təsisatlarının bütün ölkələrə eyni gözlə baxmadığını, ayrı-seçkiliyə yol verdiklərini deyən A.Nağı qeyd etdi ki, Cənubi Qafqaz respublikalarına da ikili standartlarla yanaşılır. “Avropa Paralementi, Avropa təsisatları Azərbaycana qarşı həmişə qərəzli olub, amma Ermənistanın qanunsuzluqlarını görməzliyə vurublar. Gürcüstana qarşı da sərt davranılır. Ermənistanla bağlı məsələyə baxılması bu ölkəyə sevgidən yox, Avropa Parlamentinin özü marağından irəli gəlir. Bu qurumlarda obyektivlik yoxdur. Avropa Parlamentinin bu addımı Ermənistanın Rusiyadan qoparılmasına yönəlib. Eyni zamanda da bu Rusiyanın Cənubi Qafqazda mövqeyinin zəiflədilməsi ilə bağlıdır.
Bir tərəfdən Avropa İttifaqı Rusiya ilə əlaqələr saxlayır, Rusiyanın hərbi maşınının Avropaya qarşı yönəlməməsinə çalışır. Bəzən də görürsən ki, Rusiyaya münasibətdə ABŞ-la eyni yox, fərqli mövqe tuturlar. Sanksiyalarla və başqa məsələlərlə bağlı Rusiyanın mövqeyini müdafiə edirlər. Digər tərəfdən də Rusiyanın Cənubi Qafqazda olmasından narahatdılar. Cənubi Qafqaz vacib regiondur və bu regionun da lideri Azərbaycandır. Azərbaycanla da hesablaşmağa cəhd edirlər, amma yenə də düzgün mövqedə olmalarına ikili standartları imkan vermir.
İndiki şəraitdə Ermənistandan ixrac olunacaq, yaxud Ermənistana idxal ediləcək məsələlərə baxacaqlar ki, bu da Aİ-nin Ermənistanla ticarət əlaqələri ilə bağlıdır. Onun da 80 faizini liberallaşdırırlar. Yəni rüsumdan azad edirlər. Bu da ticarətin inkişafı üçün çox vacib şərtdir. O 20 faiz də yəqin müəyyən strateji mallardır və onlara da aid edirlər və öz maraqlarından keçmək istəmirlər. Əsasən də kənd təsərrüfatı malları, balıqçılıq, şərabçılıq, konyan istehsalı kimi məsələlərdən söhbət gedir.
Ermənistan əgər Avropaya çıxırsa idxal etdiyi mallarla bağlı saxtakarlıqdan da əl çəkməlidir. Hər şey qaydasında olmalıdır. Ermənistanın konyak buraxmağa lisenziyası olubmu ki, o konyak buraxıb özünü təirfləyir. Dünyada “erməni konyakı” deyilən bir şey olmayıb. Oxumuşam ki, Ermənistan hökuməti konyakın adını dəyişdirməklə bağlı da məsələni düşünür.
Bu onların mövqeydir. Amma bunun nəticəsi nə olacaq? Tutaq ki, Ermənistan öz mallarını Avropaya ixrac etdi, amma onların malları Avropa standartlarına cavab verəcəkmi? Onların malları Avropa alıcısını maraqlandıracaq, yoxsa yox? Orada çox böyük rəqabət var və dünyanın müxtəlif yerlərindən ən keyfiyyətli mallar Avropa bazarlarına gətirilir. O rəqabətə Ermənistan mallarının dözə biləcəyinə inanmıram.
Ola bilsin ki, qiyməti bir az ucuz olsun maraqlandırsın, amma Avropa əhalisi qiymətdən çox keyfiyyətə fikir verir. İnanmıram ki, Ermənistan məhsulları Avropa bazarlarında yer tuta bilsin”-deyə A.Nağı qeyd etdi.
İradə SARIYEVA
