ABŞ-ın keçmiş ordu katibi, admiral Den Driskol dünyanın ən böyük ordularının müasir müharibənin təbiətindəki sürətli dəyişikliklərə uyğunlaşa bilmədiyini deyir. CBS News xəbər verir ki, o, silahlı qüvvələrin "dönüş nöqtəsində" olduğunu və yeni texnologiyalar və döyüş metodlarını daha tez tətbiq etməli olduğunu bildirib.
Driskol Kiyevdə Yalta Avropa Strategiyası forumunda çıxış edib, bu, onun Tramp administrasiyasından ayrıldıqdan sonra ilk dəfə ictimaiyyət qarşısında çıxışıdır. Paneldə ona hazırda Amerikanın müdafiə şirkəti “Perennial Autonomy”a rəhbərlik edən keçmiş Google baş direktoru Erik Şmidt də qoşulub.
Driskol və Şmidt müharibə dövründə Ukraynanın texnoloji inkişafını yüksək qiymətləndirərək, xüsusilə, radarlardan, sensorlardan və digər mənbələrdən məlumatları birləşdirən və orduya döyüş meydanında baş verənlər haqqında daha dolğun bir mənzərə əldə etməyə imkan verən Ukrayna proqram təminatı platforması olan DELTA sistemini vurğulayıblar. Driskolun sözlərinə görə, DELTA hazırda ABŞ ordusunda mövcud olan bütün oxşar texnologiyalardan daha yaxşı nəticələr göstərir. O, həmçinin bildirib ki, artan hesablama gücü və süni intellekt imkanlarının inkişafı Ukraynaya innovasiya və hərbi texnologiyanın sürətində Rusiyanı ötmək üçün "gözəl bir fürsət" verir.
Keçmiş nazir hərbçiləri Ukraynadakı müharibədən, ilk növbədə yeni həllərin hazırlanması və tətbiqi sürəti ilə bağlı dərslər çıxarmağa çağırıb. O, Ukrayna təcrübəsinin sürətli hərəkət etməyin, təcrübə aparmağın və texnologiyaların daim təkmilləşdirilməsinin vacibliyini nümayiş etdirdiyini vurğulayıb.
Erik Şmidt isə bildirib ki, Driskol ABŞ-ın İranın “Shahid” dronlarına qarşı müdafiəsinin yetərsiz olduğunu aşkar etdikdən sonra yardım ABŞ-ın əsas müdafiə podratçılarından deyil, “Perennial Autonomy”dən gəlib. Şirkət onları Ukraynada geniş istifadə olunan 13 min Merops müdafiə dronu və 10 min Bumblebee kəşfiyyat və hücum dronları ilə təchiz edib.
Ukraynanın dron istehsalının miqyası da müzakirə mövzusu olub. ABŞ-ın bu il təxminən 300 min dron almasının gözlənildiyi, Ukraynanın isə təxminən 7 milyon dron istehsal edəcəyi qeyd edilib. Mərkəzi Kəşfiyyat İdarəsinin keçmiş direktoru Devid Petreus isə Ukraynanın bu rəqəminin 10 milyona yaxınlaşa biləcəyini bildirib.
Son aylarda ABŞ Ukraynadakı müharibəni öyrənməklə məşğul olan bəzi strukturlarını da ixtisar edib. Avqust ayında ABŞ ordusu qismən Ukraynanın dronlarla bağlı təcrübəsini təhlil etmək üçün yaradılan dron bölməsini ləğv edib. Driskol buradakı bir neçə yüksək vəzifəli hərbçinin gedişi ilə bağlı şərh verməkdən imtina edib. O, ABŞ-ın Ukraynaya dəstəyinin dəyişməz qaldığını qeyd etsə də, bunun həmişə Kiyevin gözləntilərini doğrultmadığını etiraf edib.
Driskol avqustun sonlarında ABŞ Ordu rəhbəri vəzifəsindən istefa verib. Onun müdafiə naziri Pit Heqsetlə kadr qərarları və hərbi modernləşdirmə ilə bağlı fikir ayrılıqları olduğu bildirilir. Driskol özü istefasını hökumətdən kənarda işləməyə davam etməyin qlobal təhlükəsizlik üçün daha faydalı olacağına inandığı ilə izah edib.
Tahir TAĞIYEV
