Rusiyanın daxili işlər nazirinin birinci müavini Andrey Kikot prezident Vladimir Putinə miqrantların işləməyən ailə üzvlərinin sayını azaltmaq üçün görülən tədbirlər barədə məlumat verib. Bu görüşün mətni Kremlin rəsmi saytında yerləşdirilib.
Kikot bildirib ki, 1 yanvar 2027-ci ildən Rusiyada yeni qanun qüvvəyə minəcək. Həmin qanuna görə, işləyən miqrantlar onlarla qalan və işləməyən qohumları üçün vergi ödəməli olacaqlar. Nazir müavini bu addımın dövlətin miqrasiya siyasətinə uyğun olduğunu və xarici işçilərin işləməyən ailə üzvlərinin sayını azaltmaq məqsədi daşıdığını vurğulayıb. Kikot qeyd edib ki, hazırda Rusiyada təxminən 3 milyon əmək miqrantı və onların 1.7 milyona yaxın ailə üzvü yaşayır. Bununla yanaşı, Kikotun sözlərinə görə, miqrant uşaqlarının Rusiya məktəblərinə qəbuluna qoyulan məhdudiyyətlər sayəsində əcnəbilərin işləməyən qohumlarının sayı artıq 20 faizə yaxın azalıb. Kikot digər miqrasiya tədbirlərindən də danışıb. O bildirib ki, Daxili İşlər Nazirliyi işəgötürənlərin yoxlanılmasını iki dəfə artırıb, altı ay ərzində 100 minə yaxın əcnəbini ölkədən çıxarıb və 200 minə yaxın şəxsin ölkəyə girişinə qadağa qoyub. Bundan başqa, nazirlik miqrasiya pozuntularını sərhəd, işəgötürən və kamera məlumatlarını süni intellektlə təhlil edərək aşkarlayacaq yeni mərkəz yaradır. Bundan əvvəl mediada Mərkəzi Asiyadan Rusiyaya işləməyə gələnlərin sayının azalmaqda davam etdiyi barədə məlumatlar yayılmışdı. Tacikistan vətəndaşlarının törətməkdə ittiham olunduğu 2024-cü il "Krokus Siti Holl" terrorundan sonra Rusiya miqrasiya nəzarətini sərtləşdirib. Ölkə boyu reydlər keçirilir, yoxlamaların və deportasiyaların sayı artıb. Bir çox regionlarda miqrantların bəzi sahələrdə işləməsi məhdudlaşdırılıb, patentlərin qiyməti isə qaldırılıb. Hüquq müdafiəçiləri isə Mərkəzi Asiya vətəndaşlarının Ukraynadakı müharibəyə cəlb olunduğunu da bildirirlər.
Vladimir Putin özü isə Andrey Kikotla görüşdə qeyd edib ki, Rusiyadan deportasiya edilən qanunsuz miqrantların sayı 2,6 dəfə, yəni 85 faiz artıb. Dövlət başçısı miqrantların məqsədyönlü seçimindən yana olduğunu söyləyib. Onun sözlərinə görə, bu, həm də miqrantların öz hüquqlarını təmin etmək üçün zəruridir: “Miqrantların gəldiyi ölkələr iş üçün Rusiyaya gəlmək istəyən insanları birlikdə hazırlamaqda maraqlıdırlar. Onlara həm iş, həm də Rusiyada yaşamaq üçün hazırlıq keçək”. Ölkədə deportasiya qaydaları da köklü şəkildə dəyişib. 2025-ci il fevralın 5-dən etibarən miqrantın ölkədən çıxarılmasına məhkəmə deyil, onu saxlayan polis şöbəsinin rəisi qərar verir. Bundan başqa, miqrant uşaqlarının rus dili imtahanı vermədən məktəbə qəbulu qadağan edilib. Bu qərar azyaşlı xaricilərin 80 faizdən çoxunu konstitusiya ilə təmin olunan təhsil hüququndan məhrum edib. Əlavə olaraq nəzərə alınmalıdır ki, Rusiyanın mövcud qanunvericiliyinin tələblərinə əsasən, bu ölkəyə daxil olan zaman əcnəbilərdən, o cümlədən Azərbaycan vətəndaşlarından miqrasiya kartının doldurulması tələb olunur. Miqrasiya kartını Rusiyanın dövlət sərhədinin buraxılış məntəqələrində, beynəlxalq hava limanlarında, Rusiyaya uçan təyyarələrin göyərtəsində pulsuz əldə etmək mümkündür. Miqrasiya kartı rus dilində və ya pasportda qeyd edilən məlumatlara uyğun olaraq latın əlifbasının hərfləri ilə doldurulmalıdır. Azərbaycan və Rusiya arasında formalaşmış əmək miqrasiyası uzun illərdir müəyyən sabitlik nümayiş etdirir. Amma indi rüsumların artırılması və digər sərt qaydalar yeni vəziyyət yaradır.
Tahir TAĞIYEV
