Tural İrfan: “Ortaya atılan bu iddialar siyasi manipulyasiya xarakteri daşıyır, heç bir həqiqət payı yoxdur”
Korrupsiyaya görə beş il həbs cəzasına məhkum edilmiş Gürcüstanın keçmiş baş naziri İrakli Qaribaşvili həbsxanadan göndərdiyi məktubda bildirib ki, “Gürcü Arzusu” hökuməti onun açıqlamaları, o cümlədən insan haqları fəalı Lazar Corbenadzenin ölümü ilə bağlı panikaya düşüb. Qaribaşvilinin sözlərinə görə, Corbenadze hakimiyyətin iddia etdiyi kimi intihar etməmiş ola bilər, əksinə, “David Qareci” monastırının bir hissəsinin Azərbaycana satılmasını ört-basdır etməyə çalışan hazırkı baş nazir İrakli Kobaxidzenin əmri ilə öldürülüb.
Bu gün Gürcüstan mediasında, siyasi dairələrində bu kimi şaiyələr gəzir ki, “David Qaracei” monastrının bir hissəsi guya Azərbaycana satılıb.
Gedən bu söz-söhbətlərə rəğmən “David Qareci” kilsənin bir hissəsinin Azərbaycana satılması faktı varmı? Bu doğru məlumatdır? “David Qareci” kilsəsinin bir hissəsi Azərbaycana nə vaxt satılıb? Gürcüstanda keçmiş və indiki baş nazirləri arasında baş verən mübarizə müstəvisində hallandırılan bir qətl işində “David Qareci” monstrının bir hissəsinin guya Azərbaycana satılıdığ iddia olunması nə deməkdir?
Milli Cəbhə Partiyasının sədr müavini, ilahiyyatçı Tural İrfan baki-xeber.com-a bildirdi ki, bu tamamilə yalan məlumatdır: ““David Qareci”, yəni, Keşikçidağ monastır kompleksinin hər hansı bir hissəsinin Azərbaycana satılması barədə iddialar tamamilə yalandır və heç bir real fakta əsaslanmır. Gürcüstanda bəzi siyasi dairələrin öz aralarında bir-birini ittiham edərkən əsassızca bu cür ifadələr işlətməsi də doğru deyil. Siyasilər gərək qonşu və dost ölkəyə qarşı həmişə ehtiyyatlı, diqqətli olsunlar. Həm Gürcüstan, həm də Azərbaycan tərəfi rəsmi olaraq belə bir torpaq satışı və ya sövdələşməsinin baş vermədiyini dəfələrlə bəyan ediblər. Gürcüstanın daxili siyasətində, xüsusilə keçmiş baş nazir İrakli Qaribaşvili ilə hazırkı baş nazir İrakli Kobaxidze və hakim "Gürcü Arzusu" partiyası arasındakı gərgin mübarizə fonunda ortaya atılan bu iddialar siyasi manipulyasiya xarakteri daşıyır, heç bir həqiqət payı yoxdur”.
T.İrfan qeyd etdi ki, keçmiş baş nazir İrakli Qaribaşvili məlum olduğu kimi korrupsiya və çirkli pulların yuyulması ittihamı ilə azadlıqdan məhrum edilib. “Həbsxanadan göndərdiyi məktublarda o, öz həbsini siyasi intiqam adlandırır və hazırkı hökuməti zəiflətmək üçün müxtəlif iddialar irəli sürür. İnsan hüquqları fəalı və keçmiş əks-kəşfiyyat rəsmisi Lazar Corbenadze 4 aprel 2026-cı ildə vəfat edib. Gürcüstan Baş Prokurorluğu onun intihar etdiyini rəsmən və qəti şəkildə təsdiqləyib. Lakin Qaribaşvili bu intiharı hazırkı baş nazir İrakli Kobaxidzenin sifarişi ilə törədilmiş qətl kimi qələmə verməyə çalışaraq, bunun guya “David Qareci”nin Azərbaycana "satılması" sənədini gizlətmək məqsədi güddüyünü iddia edir. Gürcüstan hüquq-mühafizə orqanları bu iddiaların tamamilə əsassız olduğunu bildirsə də, ictimaiyyətdəki suallara aydınlıq gətirmək üçün Qaribaşvili də daxil olmaqla bir sıra siyasətçilərin ifadəsini alıb. Hüquqa və hər iki ölkənin konstitusiyasına əsasən, delimitasiya olunmamış dövlət sərhədləri üzərindəki mübahisəli ərazilər alqı-satqı predmeti ola bilməz. Qeyd edək ki, “David Qareci” monastır kompleksi Gürcüstan və Azərbaycan sərhədində yerləşir. Kompleksin bir hissəsi yəni, Udabno və Çiçxitura monastırları yerləşən cənub yamacı sovet dövründə, 1920-ci illərdə Stalinin qərarı ilə müəyyən edilmiş inzibati sərhədlərə görə Azərbaycan SSR-in, hazırkı Ağstafa rayonunun ərazisinə düşüb. SSRİ dağıldıqdan sonra iki ölkə arasında sərhədlərin delimitasiyası üzrə dövlət komissiyası yaradılıb. Sərhədin böyük hissəsi, təxminən 70%-i razılaşdırılsa da, monastırın yerləşdiyi strateji yüksəklik hələ də tam delimitasiya olunmayıb. Azərbaycan tərəfi bu yüksəkliyi hərbi-strateji əhəmiyyətinə görə öz ərazisi hesab edir və qoruyur. Yəni, Azərbaycan ərazini Gürcüstandan "satın almayıb", bura sovet dövründən qalma xəritələrə əsasən iddia olunan və hazırda tərəflər arasında diplomatik yolla həll edilməyə çalışılan mübahisəli sərhəd xəttidir”.
T.İrfan sonda bildirdi ki, Gürcüstan hakimiyyəti gərək ölkə siyasilərinin Azərbaycana qarşı bu cür ittihamlar səsləndirən siyasilərə qarşı yeni hüquqi tədbirlər görsün.
İradə SARIYEVA
