İsrail Türkiyədəki diplomatik missiyasına yeni rəhbər təyin edib; lakin davam edən təhlükəsizlik təhdidləri səbəbindən ölkənin Ankaradakı səfirliyi faktiki olaraq fəaliyyət göstərmir.
Bu barədə "Middle East Eye" nəşrinin İsrail rəsmisinə istinadən verdiyi məlumatda deyilir. Xəbərə görə, Yoel Lion İsrailin Türkiyədəki yeni müvəqqəti işlər vəkili təyin olunub. Çərşənbə günü o, Ankarada Türkiyə Xarici İşlər Nazirliyinə etimadnaməsini təqdim edib. Bu, İsrailin 2023-cü ilin sonlarında Ankara və İstanbuldakı diplomatik heyətini geri çağırmasından bəri yüksək rütbəli bir İsrail diplomatının Türkiyəyə ilk səfəridir. Lion daha əvvəl İsrailin Moldovadakı ilk rezident səfiri kimi fəaliyyət göstərib və bu vəzifəni 2025-ci ilin aprelinə qədər icra edib. Bundan əlavə, o, 2026-cı ilin avqustuna qədər Ermənistanda qeyri-rezident səfir qismində İsraili təmsil edib. Bu təyinat İsrailin Türkiyədəki səfiri İrit Lillianın vəzifəsindən ayrılmasından sonra həyata keçirilib. O, vəzifəsini tərk etdikdən sonra səfir postu boş qalmışdı. İsrail rəsmisinin sözlərinə görə, səfirliyin tam fəaliyyət göstərməməsi siyasi qərardan deyil, yalnız təhlükəsizliklə bağlı narahatlıqlardan irəli gəlir. Eyni zamanda, diplomatik missiya rəsmən bağlanmayıb; yerli əməkdaşlar ölkədə işlərini davam etdirirlər. O bildirib ki, "hər iki tərəf təhlükəsizlik məsələləri səbəbindən səfirliyin bağlı qalması ilə razılaşır". İsrail ilə Türkiyə arasında münasibətlər 2022–2023-cü illərdə nəzərəçarpacaq dərəcədə yaxşılaşmağa başlamışdı, lakin HƏMAS-ın 7 oktyabr 2023-cü ildə İsrailə hücumu və ardınca Qəzza zolağında başlanan müharibədən sonra kəskin şəkildə pisləşdi. Ankara İsrailin hərbi əməliyyatını pisləyən ilk ölkələrdən biri oldu və sonradan İsrailin hərəkətlərini "soyqırım" kimi qiymətləndirdi. 2024-cü ildə Türkiyə İsrailə qarşı ticarət məhdudiyyətləri tətbiq etdi. Gərginlik həmçinin Suriyadakı təhlükəsizlik məsələlərinə də sirayət edib. İsrailin Türkiyə sərhədindən təxminən 70 kilometr aralıda, Suriyanın şimalında yerləşən Əbu əl-Duhur hərbi hava bazasına endirdiyi zərbələr səbəbindən iki ölkə arasında münasibətlər son vaxtlar bir az da gərginləşib. İsrail bəyan edib ki, zərbələri Türkiyənin həmin bazada hava hücumundan müdafiə sistemləri yerləşdirməyə hazırlaşması səbəbindən həyata keçirib. İsrailin fikrincə, belə bir yerləşdirmə İsrail təyyarələrinin həmin ərazidə əməliyyat aparmaq imkanlarını məhdudlaşdıra bilərdi.
SAMİRƏ
