Əli Orucov: “Əsas məqsəd Makrondan Moskva səfəri öncəsi göstəriş almaqla bağlıdır”
Ermənistanın Baş naziri Nikol Paşinyanın Moskvaya gedəcəyi halda qəfil Parisə işgüzar səfərə yollanması ciddi müzakirələrə səbəb olub. Bir müddət əvvəl Bişkekdə keçirilən Şanxay Əməkdaşlıq Təşkilatının (ŞƏT) sammiti çərçivəsində Rusiya və Ermənistanın liderlərinin görüşü olub. Putin Paşinyanı Ermənistanın Avropa İttifaqı və Avrasiya İqtisadi İttifaqına üzvlük məsələsini ətraflı müzakirə etmək üçün Moskvaya dəvət edib. Paşinyanın Rusiyaya çağırıldığı ərəfədə gözlənilmədən Parisə üz tutması müxtəlif suallar yaradıb, müəyyən ehtimalların irəli sürülməsinə səbəb olub.
Ermənistan hökumətinin mətbuat xidmətinin yaydığı məlumata görə, Paşinyan Beynəlxalq Kosmik Sammitdə iştirak etmək üçün Parisə gedib.
Yeri gəlmişkən, bir neçə gün əvvəl Rusiya prezidenti Vladimir Putin ABŞ prezidenti Donald Trampın elçiləri ilə görüşüb və burada bir sıra gizli məsələlərin müzakirə olunduğu deyilir.
Bu arada siyasi analitiklər belə bir ehtimal irəli sürürlər ki, Trampın elçiləri ilə Putinin danışdığı məsələlərdən biri də Zəngəzur dəhlizi ilə bağlı olub. Yəni Rusiyanın Zəngəzur dəhlizinə necə qoşulması məsələsi barədə danışılıb. Ekspertlərin ehtimallarına görə, Putin Zəngəzur dəhlizində Rusiyanın da olması barədə Trampın elçiləri ilə razılaşıb. Bu da Ermənistanın xoşuna gəlməyib. Trampın elçiləri ilə Putinin görüşündən sonra Paşinyanın tələsik Parisə getməsi də bununla bağlı ola bilər.
Yəni ekspertlərin belə ehtimalları var və bu nə dərəcədə doğrudur?
O da məlumdur ki, Ermənistanın kosmik sənaye sahəsində elə də ciddi bir uğuru yoxdur. Bu baxımdan Ermənistanın baş nazirinin Kosmik Sammitdə iştirakı da suallar doğurmaya bilmir. Çünki Paşinyanı Moskvada gözləyirdilər, amma o, Moskvadan əvvəl Parisə getdi. Bu onun
Moskva səfəri ərəfəsində Parisdən təlimat almağa getməsi deməkdirmi? Çoxları ehtimal edir ki, o Parisə məhz təlimat almaq üçün gedib. Yəni Kosmik Sammitdə iştirakı məsələsi gözdən pərdə asmağa xidmət edir.
Politoloq Əli Orucov baki-xeber.com-a bildirdi ki, Paşinyan ya Putindən görüşlərindən əvvəl ya sonra bir qayda olaraq Parisə gedərək yeni ev tapşırıqları alıb. “Bu dəfə də fərqli bir şey olmadı. Bu dəfəki Fransaya səfər Qırğızıstanın paytaxtında keçirilən ŞƏTin növbəti Zirvəsi çərçivəsində Putinlə görüşündən və Rusiyaya səfəri öncəsi baş verdi. Prinsip etibarı ilə Ermənistan kosmik ölkə deyil, onun kosmik texnologiyalarla heç bir əlaqəsi yoxdur. Məntiqlə həmin tədbirə gərək Azərbaycan dəvət olunmalı idi. Məhz Fransanın dəstəyi ilə Azərbaycanın 2 süni peyki kosmosa çıxarılıb. Göründüyü kimi Makaron yenə də qərəzli yanaşaraq Azərbaycanı yox Ermənistanı dəvət edib. Məsələnin mahiyyəti ondadır ki, həmin beynəlxalq Kosmik Sammitdə Paşinyanın iştirakı simvolikdir. Əsas məqsəd Makrondan Moskva səfəri öncəsi göstəriş almaqla bağlıdır. Gözlənilir ki, Putinlə görüş çox gərgin və sərt atmosferdə keçəcək. İrəvanın qarşısında Aİ və Aİİ, yaxud Moskva ilə Brüssel arasında seçim edilməsi qəti şəkildə qoyulacaq. Kreml tərəfindən Paşinyanın ikili oyun oynaması imkanları daraldılacaq. TRİPP Trampın birbaşa marağında və nəzarətində olan qlobal layihənin tərkib hissəsidir. Ermənistan burda önəmli rol oynamır. Əgər Ağ Ev burda Moskvanın iştirakını məqbul hesab edəcəksə Paşinyan buna qarşı çıxa bilməyəcək”.
Bununla belə Ə.Orucov ABŞ-ın TRİPP layihəsində Rusiyaya pay verəcəyini düşünmür.
İradə SARIYEVA
