Təbriz Musayev: “Tarix bu etdiklərinə görə Trampı bağışlamayacaq”
Rusiya Prezidenti Vladimir Putin ABŞ Prezidenti Donald Trampla keçirdiyi telefon danışığında Ukrayna münaqişəsinin tam başa çatdırılması üçün Vaşinqtonun ata biləcəyi addımı diqqətə çatdırıb. Bu barədə Rusiya Prezidentinin xarici siyasət üzrə köməkçisi Yuri Uşakov məlumat verib.
Kremlin rəsmisi bildirib ki, Rusiya liderinin fikrincə, münaqişəyə son qoyulmasının əsas yolu Birləşmiş Ştatların Kiyevə göstərdiyi hər cür hərbi və maliyyə yardımını tamamilə dayandırmasıdır. İki ölkə rəhbərinin qapalı formatda reallaşan söhbətində dinc nizamlanmaya nail olunmasının real imkanları geniş şəkildə nəzərdən keçirilib.
Onsuz da Tramp prezident olandan sonra ABŞ Ukraynaya yardımları xeyli azaldıb. Yük Avropa İttifaqının üzərinə düşür. Bundan artıq nə olmalıdır? Yardımlar kəsilsin, Rusiya Kiyevi tutsun? Bu, artıq danışıqların gedişindən çox ilginc xəbərdir ki, Rusiya bunu istəyib. Ancaq maraqlıdır ki, ABŞ buna nə reaksiya verib? Əgər Tramp da Uşakovun səsləndirdiyi fikirlərin eynisini deyibsə, deməli, bu iki dövlətin yanaşmaları arasında fərq yoxdur və Ukraynaya qarşı oynayırlar. Yəni Tramp buna əks reaksiya verməyibsə, Putinin təklifini dəstəkləyibsə, bu böyük bir biabırçılıqdır.
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayevin fikrincə, bütün bunlar Trampın Ukrayna məsələsində təslimçi mövqedən çıxış etməsi ilə bağlı şübhələri artırır: “Halbuki, bu gün dünyada Rusiyanın Ukraynaya yönəlik azğın işğalçılıq fəaliyyətini dayandıra biləcək yeganə ölkə Birləşmiş Ştatlardır. Əfsuslar olsunn ki, zamanında nə Bayden, nə də Tramp gərəkən addımları atmadılar. Düzdür, Baydenin prezidentliyi dövründə ABŞ Ukraynaya silah yardımı ilə bağlı bir sıra böyük işlərə imza atdı. Ancaq buna baxmayaraq, həmin vaxt bir sıra vacib silahları Ukraynaya verməkdə tərəddüd etdilər. Hətta elə vəziyyət yarandı ki, ABŞ-ın Ukraynaya silah yardımında 6 aylıq fasilə yarandı. Konqresdə Respublikaçılar Partiyası buna mane oldu. 2023-cü ilin iyununda Ukraynanın əks-hücum əməliyyatı uğursuz oldu. Çünki həmin vaxt ABŞ Ukraynaya hava dəstəyinin təmin edilməsinə yardım etmədi. Hələ o zaman ABŞ tərəddüd etməsəydi, bir sıra silah yardımlarını göstərsəydi, Rusiya bir belə Ukrayna ərazilərini işğal edə bilməzdi. Ümumilikdə Ukraynanın təxminən 19 faizi Rusiya tərəfindən işğal edilib. Tramp prezident olandan sonra vəziyyət Ukrayna üçün dahada çətinləşdi. Tramp həm silah yardımını kəskin azaltdı, həm də Zelenskini təslim olmağa çağırdı. Bunlar alınmayandan sonra ABŞ Ukrayna şəhərlərinə endirilən balestik raketlərin qarşısını ala biləcək yeganə vasitə olan “Patriot” raketlərinin verilməsini dayandırdı. Tramp bunu onunla əsaslandırır ki, ABŞ-ın bu raketlərlə bağlı ehtiyatları tükənir. Hesab edirəm bu, Trampın uydurduğu yalandır. Tramp Zelenskini güzəştə məcbur etmək üçün həmin vasitələri vermir. Hesab edirəm ki, tarix bu etdiklərinə görə Trampı bağışlamayacaq. Ukraynanı böyük bir təcavüzkar dövlətlə tək buraxmaq, vacib olan silahları verməmək, danışıqlarda Moskvanın şərtlərini qəbul etmək Putinin cinayətlərinə ortaq olmaq deməkdir”.
Vidadi ORDAHALLI
