Əli Orucov: “Gecikmənin səbəblərindən biri geosiyasi vəziyyətin gərgin olması ilə bağlıdır”
Ermənistan ərazisindən keçəcək TRIPP (Trampın Beynəlxalq Sülh və Rifah Marşrutu) layihəsi çərçivəsində işlərə 2027-ci ilin əvvəlində başlanılacaq. Bu barədə Ermənistanın ABŞ-dakı səfiri Narek Mkrtçyan ABŞ-ın Semafora nəşrinə müsahibəsində bildirib.
Onun sözlərinə görə, layihə çərçivəsində Ermənistan ərazisində layihənin ilk daşının 2027-ci ilin əvvəlində qoyulması gözlənilir. Diplomat qeyd edib ki, layihənin texniki-iqtisadi qiymətləndirilməsi 2026-cı ilin sonuna qədər başa çatdırılmalıdır. Bununla yanaşı, səfir Ermənistanın Rusiya və İranla mövcud ənənəvi əlaqələrini qoruyub saxlamağa çalışdığını da bildirib.
Çox maraqlıdır, bu ilin iyulunda Ermənistan Baş naziri Nikol Paşinyan bəyan etmişdi ki, işlərə sentyabrda başlanacaq. Nə baş verdi ki, işi 4 ay daha geri atdılar?
Sözügedən məsələni baki-xeber.com-a şərh edən AMİP funksioneri Əli Orucov Zəngəzur dəhlizi ilə bağlı işlərin yubanmasını bir sıra amillərlə əlaqələndirdi: “Bunun müxtəlif səbəbləri var. Səbəblərdən biri geosiyasi vəziyyətin gərgin olması ilə bağlıdır. Məsələ ondadır ki, Rusiya-Ermənistan münasibətləri gərgin olaraq qalır. Rusiya prezidenti Vladimir Putin ard-arda Paşinyanı seçim etməyə çağırır. Yəni Ermənistan ya Avrasiya İqtisadi İttifaqını, ya da Avropa İttifaqını seçməlidir. Rusiya bu yöndə müxtəlif təzyiqləri Ermənistana artırır. İndiyə qədər Ermənistanda keçirilən seçkilərlə bağlı Paşinyana təbrik ünvanlanmayıb və s. Səbəblərdən biri bununla bağlıdır. İkinci səbəb ABŞ-İran qarşıdurmasının davam etməsi ilə bağlıdır. Bir sıra gözləntilərə rəğmən, ABŞ-la İran arasında atəşkəs dayanıqlı olmadı. Tehran da bəlli səbəblərdən Birləşmiş Ştatların Zəngəzur dəhlizində iştirakına, moderator olmasına qarşıdır. Paşinyan indiki mərhələdə Rusiya ilə İranın birlikdə hərəkət edərək Zəngəzur dəhlizinə qarşı təxribat törədə biləcəklərindən ehtiyat edir. Bu, müxtəlif formalarda ola bilər. Hətta Paşinyana qarşı terror da törədilə bilər. Baxmayaraq ki, ABŞ onun təhlükəsizliyinin təmin edilməsində texniki və kəşfiyyat dəstəyi verir. Gecikmənin üçüncü səbəbi, Ermənistanda referendum hazırlığı ilə bağlıdır. Məsələ ondadır ki, Paşinyan hakimiyyəti yeni Konstitusiyanı referenduma çıxarmağa hazırlaşır. İlin sonuna qədər Konstitusiya layihəsi dərc olunacaq. Ondan sonra müzakirələr aparılacaq və ictimaiyyət referenduma hazırlanacaq. Hesab edirəm ki, bütün bunlar Zəngəzur dəhlizinin tikintisi ilə bağlı işlərin yubanmasına öz təsirini göstərir”.
Vidadi ORDAHALLI
