Bu gün Azərbaycan Kinematoqrafçılar İttifaqının (AKİ) sədr seçkisi ilə bağlı Nizami Kino Mərkəzində keçirilən konfransında sədr postuna namizədliyi müstəqil platformasından irəli sürülən, lakin qəbul edilməyən Xalq artisti Həmidə Ömərova seçki prosesi ilə bağlı narazılığını bildirib. H. Ömərova mətbuata deyib ki, müstəqil platformanın nümayəndəsi kimi ona çıxış etmək imkanı verilməyib. Həmidə Ömərova bildirib ki, namizədliyini irəli sürməyə şərait yaradılmayıb. "Namizədliyimi irəli sürməyə şərait yaradılmadı"-deyə xalq artisti bildirib. "Açığını deyim, gözləyirdim ki, müstəqil platformanın seçilən nümayəndəsi kimi mənə söz verəcəklər. Amma nəinki mənə, heç mənim adımdan danışmaq istəyənlərə də söz verilmədi. Kinematoqrafçıların bir qismi kiminsə namizədliyini irəli sürürlər, onu da dinləmək lazım idi. Heyif ki, mən öz sözümü deyə bilmədim. Yəni bu imkan verilmədi". Xalq artisti deyib ki, alternativ namizədin irəli sürülməsinə imkan verilmədi. "Bütün bunlara baxmayaraq mən Kinematoqrafçılar İttifaqının inkişafına xidmət etmişəm, bundan sonra da edəcəyəm. Mənə söz verilsəydi öz platformamı deyəcəkdim. Artıq mənası yoxdur"-deyə H. Ömərova mətbuata açıqlamasında bildirib. Qeyd edək ki, H. Ömərovanın sözlərinə görə, 50-yə yaxın kinematoqraf seçkilərin alternativ (çoxnamizədli) keçirilməsi üçün onun namizədliyini irəli sürüb.
LEYLA
