Əli Mustafa: “Məqsəd Azərbaycanın regionda oynadığı mühüm tranzit rolu azaltmaqdır”
Baş nazir Nikol Paşinyanla prezident Emmanuel Makron Yelisey sarayında keçirilən görüşdə Ermənistan-Fransa münasibətlərinin əsas istiqamətlərini və regional prosesləri müzakirə ediblər.
Paşinyan bildirib ki, strateji “Şimal-Cənub” nəqliyyat dəhlizinin bir hissəsi olacaq Barguşat tunelinin çəkilməsi üzrə tikinti işləri əsas mərhələyə daxil olub. Bununla əlaqədar tikinti işlərinin mümkün qədər tez başlanmasının vacibliyi vurğulanıb.
Məlumaq üçün qeyd edək ki, bu il mayın 5-də Ermənistan və Fransa Ermənistanın İran və Gürcüstanla sərhəd hissələrini birləşdirəcək “Şimal-Cənub” magistralında Barguşat tunelinin tikintisinə dair saziş imzalayıblar. Göründüyü kimi, Paşinyan Zəngəzur dəhlizinin tikintisini yubadır. Bu dəhlizə Avropa İttifaqından, Fransadan siyasi, iqtisadi dəstəyin verilməsini istəmək əvəzinə, “Şimal-Cənub” magistralına daha çox önəm verir.
Sözügedən məsələni baki-xeber.com-a şərh edən siyasi şərhçi Əli Mustafanın fikrincə, “Şimal-Cənub” magistralı məsələsi uzun illərdir Ermənistanın reallaşdırmaq istədiyi layihələrdən biridir: “Ancaq həmin magistralın dağlıq ərazilərdən keçməsi, böyük maliyyə vəsaiti tələb etməsi sözügedən layihənin həyata keçirilməsinə imkan vermir. Buna nə İranın maliyyə imkanı var, nə də Ermənistanın. Ermənistan istəyir ki, Fransa və yaxud da Avropa İttifaqı bu magistrala vəsait ayırsın. Ancaq hələ ki, bu real görünmür. Ən azından ona görə ki, “Şimal-Cənub” magistralının rentabelli olacağı sual altındadır. Bu layihə iqtisadi yox, məzmun baxımından siyasi layihədir. Məqsəd Azərbaycanın regionda oynadığı mühüm tranzit rolu azaltmaqdır. Ermənistanın, İranın və Fransanın məqsədi əslində budur. Digər tərəfdən İran-ABŞ qarşıdurması ilə əlaqədar Paşinyan Zəngəzur dəhlizi barədə çox danışmır. Paşinyanın Paris səfəri daha çox Rusiyanın təzyiqlərindən qorunmaq məqsədi daşıyır. Bu ara Nikol çalışır ki, Fransa hesabına Avropa İttifaqından daha çox siyasi, iqtisadi dəstək alsın. Odur ki, burada müxtəlif məsələlər ola bilər. Ola bilər ki, Paşinyan Makronla görüşdə daha vacib və həssas məsələləri müzakirə edib. Sadəcə diqqəti yayındırmaq üçün , “Şimal-Cənub” magistralını ortaya atıb. Ancaq Ermənistanın nə planlamasından asılı olmayaraq Şərq-Qərb, Orta Dəhlizin rolunu və əhəmiyyətini azaltmaq mümkün olmayacaq. Reallıq budur. İstəsələr də, istəməsələr də”.
Vidadi ORDAHALLI
