Sosial şəbəkələrdə İstanbul meri, hazırda həbsdə olan Əkrəm İmamoğlunun oğlu Mehmet Səlim İmamoğlunun videosu yayılıb.
Magistr təhsili aldığını, akademik təhsilini davam etdirdiyini bildirən oğul İmamoğlu həmin videoyazıda bildirir ki, siyasətlə heç bir əlaqəsi olmasa da, sırf soyadı İmamoğlu olduğuna görə təqiblərə məruz qalıb. Lakin təqib və təzyiqlər təkcə ona qarşı yönəlməyib. Belə ki, babasının pensiyası belə, uzun müddət ona verilməyərək Əkrəm İmamoğluna təzyiq vasitəsi kimi istifadə olunub. Üstəlik, yaşlı adamın üzərinə ölkədən çıxma qadağası qoyularaq, Balıkesirdəki həyətində nə axtardıqları anlaşılmayan qazıntı işləri aparılıb.
Mehmet Səlim deyir ki, bundan başqa, dayısı Cavad Kaya nə ilə suçlandığını bilmədən bir il həbsdə saxlanıb. Digər dayısı Ali Kaya isə bir iftira üzündən 7 ay öncə həbs olunub. Hətta ona qarşı heç bir dəlil olmasa da, quru iftira ilə hələ də həbsdədir. Hazırda özünün də heç bir günahı olmadan təqib olunduğunu bildirən Mehmet Səlim bunun anasından və babasından aldığı borc pulla özünün müstəqil şirkət qurması ilə bağlı olduğunu bildirir. Qeyd edir ki, buna görə ona ölkədən çıxma qadağası belə qoyulub, hesabları bağladılıb. “Ölkədən çıxma qadağası nə deməkdir? Mənim ailəm, işim burada ikən, atam bir zülmlə qarşı-qarşıya ikən mənim qaça biləcəyimi necə düşünə bilərsiz?”- deyən oğul İmamoğlu bildirir ki, tələbə vaxtlarından ailə şirkəti olan İmamoğlu İnşaatda işləsə də, zamanla öz müstəqil şirkətini qurub və xarici partnyorlarla işləmək fikrində olub. Xorvatiyada bir şirkətlə ortaqlıq fikrinə atası sıcaq baxmayıb və siyasi diskussiyalara yol aça biləcəyini deyib. Lakin buna baxmayaraq özünün şirkəti üzərindən Xorvatiya şirkəti ilə kiçik pay sahibi olaraq əməkdaşlıq edən Mehmet Səlim bunun üçün bankdan kredit götürməsinin rəsmi sənədlərlə təsdiqlənməsinə baxmayaraq, hər cür yalan-yanlış xəbərlərin dövriyyəyə buraxıldığını, lakin sonda məhkəmə tərəfindən yanlışlığın etiraf olunduğunu bildirir. Maraqlıdır ki, elə İmamoğlu məsələsinin başladığı 2025-ci ilin iyul ayında oğul İmamoğlunun Xorvatiyadakı ortağı avtomobil qəzası nəticəsində dünyasını dəyişib. Qəzada isə oğul İmamoğlunun günahkar kimi adı hallanmağa başlayıb, nəticədə o, bu barədə yazan müxbiri məhkəməyə verib. Savadlı, enerjili gənc olaraq Mehmet Səlim gələcək üçün günəş panelləri, kvant fizikası sahəsində bir çox xəyallarının olduğunu deyir. Ölkəsinə perspektivli gələcək vəd edən bir gəncin sırf atasının siyasi fəaliyyəti üzündən qarşısına sədd çəkilməsi, bütöv bir ailənin repressiyalara məruz qalması, hətta yaşlı bir insanın həyatının qürub çağında pensiyası ilə sınanması hansı “ədalət”dən xəbər verir? Türkiyə kimi əzəmətli bir ölkədə ədalət tərəzisinin bu şəkildə əyilməsi heç xoş deyil…
Əli TURABOV
