Suriyanın devrilmiş prezidenti Bəşər Əsədin qohumu və tanınmış narkotik satıcısının oğlu qanunsuz silah və narkotik saxlamaqda şübhəli bilinərək Livanda saxlanılıb.
“Associated Press” agentliyinin Livan hərbi və məhkəmə mənbələrinə istinadən verdiyi məlumata görə, Süleyman Əsəd və narkotik qaçaqmalçılığı şübhəlisi Nouh Zeiterin oğlu Əli Zeyter cümə günü Livanın şimal-şərqindəki Baalbek şəhəri yaxınlığında saxlanılıblar. Anonimlik istəyən iki məhkəmə mənbəyinin məlumatına görə, onlar birlikdə tutulublar. Süleyman Əsəd Suriyanın keçmiş prezidentinin əmisi oğlu Hilal Əsədin oğludur.
Livan ordusu, ölkədə qanuni qalmasını təsdiqləyən sənədləri təqdim edə bilməyən bir Suriya vətəndaşı da daxil olmaqla üç şəxsin saxlanıldığını bildirib. Hərbçilərin sözlərinə görə, saxlanılanların üzərindən silah və həşiş tapılıb. Ordu onların adlarını açıqlamasa da, açıqlamada göstərilən baş hərflər Süleyman Əsəd və Əli Zeyterin baş hərfləri ilə üst-üstə düşüb. Saxlanılanlar məhkəmə rəsmilərinin nəzarəti altında dindiriliblər.
Əsəd ailəsi Suriyanı təxminən on illərlə idarə edib. 2024-cü ilin dekabrında islamçı üsyançılar hakimiyyəti ələ keçirdikdən sonra Bəşər Əsəd rejimi devrilib. Bundan sonra bir sıra Suriya rəsmiləri və keçmiş prezidentin qohumları Livan da daxil olmaqla digər ölkələrə qaçıblar. Bəşər Əsədin özü və kiçik qardaşı Mahir hazırda Rusiyadadır.
Süleyman əl-Əsədin həbsi, Livanın Bəşər Əsəd ordusunda bir diviziyaya komandanlıq edən keçmiş general-mayoru Suriya hakimiyyətinə təhvil verməsindən bir neçə həftə sonraya təsadüf edir.
Tahir TAĞIYEV
