Məişət zorakılığına məruz qalmış qadınlara ilkin yardımın edilməsi vacib amillərdəndir. Qadın uşaqlarla təkbaşına qaldıqda və ya evdən qovulanda ona dost-tanışı və ya doğmaları tərəfindən yardım edilə bilər.
Ancaq elə ailələr var ki, qadın məişət zorakılığına məruz qalsa da, müxtəlif səbəblərdən doğmalarının evinə gedə bilmir. Belə olan halda, həmin qadın ya yoldaşının zorakılığına dözmək məcburiyyətində qalır, ya da həyatına son qoyur.
Bu kimi halların yaşanmaması üçün sığınacaq mərkəzləri mövcuddur, lakin ölkədə onların sayı yetərincə deyil.
Hətta "Qadınlara qarşı zorakılıq və məişət zorakılıq işləri üzrə mühafizə orderləri: beynəlxalq standartlar və Azərbaycanın milli təcrübəsi” adlı hesabatda da ölkədə sığınacaq sayının az olması qeyd edilib.
Ailə, Qadın və Uşaq Problemləri üzrə Dövlət Komitəsinin sədri Bahar Muradova da zorakılığa məruz qalan qadınların sığınacaqlara yerləşdirilməsində də bəzən problemlər yarandığını deyib. Komitə sədri bunu, sığınacaqlarda yer azlığı ilə əlaqələndirib.
Mehriban Zeynalova: "Sığınacaqların sayının artırılmasına ehtiyac var və bu artıq zərurət halını alıb"
Sığınacaq problemi ilə bağlı fikir bildirən “Təmiz dünya” Qadınlara Yardım İctimai Birliyinin sədri Mehriban Zeynalova qeyd etdi ki, sığınacaq sayının azlığı səbəbindən zorakılığa məruz qalan qadınları sığınacağa bəzən qəbul edə bilmirlər. Bu da zorakılığa məruz qalmış və hətta həyati təhlükəsi olan qadınlar üçün riskli vəziyyət yaradır: "Məlumat üçün deyim ki, DİN-nin 1, ƏƏSMN-nin Sosial Xidmətlər Agentliyinin də 3 sığınacağı var. Qalan 5 sığınacaq qeyri-dövlət əsaslıdır. Bizim Qadın sığınacağı Beynəlxalq Miqrasiya Təşkilatının dəstəyi ilə fəaliyyət göstərir. Əlbəttə, dövlətin yardımını, dəstəyini də hiss edirik. Bəli, sığınacaqların sayının artırılmasına ehtiyac var və bu artıq zərurət halını alıb. Amma buna necə nail olunmalıdır? Məsələn, Amerika Birləşmiş Ştatlarında dövlət qeyri-hökumət təşkilatlarına sifariş verir, ehtiyaclar dəyərləndirilir, buna uyğun olaraq da QHT-lər sifarişi icra edir. Bunun üçün dövlət QHT sektoruna 70 faiz civarında yardım edir. Hesab edirəm ki, bizdə də bu metoddan istifadə edilməlidir. Mövcud vəziyyət və ehtiyaclar dəyərləndirilməlidir. Keçid sığınacaqları da yaradıla bilər. Keçid sığınacaqları bölgələr üçün xarakterikdir. Təhlükəsizliyin təmini məqsədilə əvvəlcə keçid sığınacaqlara yerləşdirilənlər, təhlillər aparıldıqdan sonra digər sığınacaqlara köçürülə bilər. Paytaxtda da, bölgələrdə də buna ehtiyac var".
Fatimə Hacıbəyli: "Sığınacaqların tək paytaxtda deyil, bütün rayonlar üzrə yaradılmasına ehtiyac var"
"Vəfa" Sosial Ictimai Birliyinin sədri Fatimə Hacıbəyli qeyd etdi ki, hazırda məişət zorakılığından əziyyət çəkənlər üçün sığıncaqların sayı azdır: “Bir sıra ölkələrdə dövlət sığınacaqları mövcuddur. Ölkəmizdə dövlət sığınacaqlarının yaradılmasına ehtiyac var. Bu sığınacaqlara məişət zorakılığından əziyyət çəkənlər gəlir".
Birlik sədrinin sözlərinə görə, sığınacaqların tək paytaxtda deyil, bütün rayonlar üzrə yaradılmasına ehtiyac var: “Nəzərə almaq lazımdır ki, bəzi şəxslər rayondan Bakıya gələ bilmir. Bu cür şəxsləri nəzərə alıb, bölgələrdə də dövlət sığınacaq mərkəzi yaradılmalıdır".
Günel CƏLILOVA
