ABŞ prezidenti Barak Obama Britaniya kraliçası II Yelizavetanın 90 illik yubileyinə qatılmaq üçün Londona gedib. Lakin bu, yalnız məsələnin görünən tərəfidir.
Məsələnin görünməyən tərəfinə gəldikdə, analitiklər bildirir ki, əslində sözügedən səfərin məqsədi Böyük Britaniyanın Avropa İttifaqının üzvlüyündən çıxmaq istəməsi ilə bağlıdır. Bəllidir ki, bu məqsədlə ölkədə referendum keçirilməsi planlaşdırılır. Britaniyanın Aİ tərkibində qalıb-qalmayacağı isə referendumun nəticələrindən asılı olacaq. Məsələyə bu aspektdən nəzər yetirən analitiklər əslində referendumun Aİ-dən çıxma nəticəsini ortaya qoyacağını proqnozlaşdırır. Elə Obamanın səfərinə də bu kontekstdən yanaşılır və bildirilir ki, ABŞ prezidentinin məqsədi, Yelizavetanı təbrik etməkdən daha çox, onun məiyyətini Aİ tərkibində qalmağa inandırmağa yönəlib.
ABŞ-ın Böyük Britaniyanın Avropa İttifaqının tərkibində qalmasına bu dərəcədə önəm verməsinin səbəbini isə analitiklər terrorizmlə birgə mübarizə ilə izah edir.
Xatırladaq ki, hələ ötən il Britaniyanın Baş naziri Devid Kemeron Birləşmiş Krallığın Aİ tərkibindən çıxa biləcəyilə bağlı açıqlama vermiş, hətta əhaliyə bununla bağlı referendumda aktivlik göstərmək yönündə çağırış da etmişdi. Məsələ ilə bağlı referendumun üzümüzə gələn yay aylarında keçirilməsi gözlənir. Ölkədə referendum öncəsi keçirilən sorğular isə hələlik real nəticə barədə təsəvvür formalaşdırmağa imkan vermir. Belə ki, ölkənin Aİ tərkibindən çıxmasını istəyənlərlə bunun əksini arzu edənlərin sayı, demək olar ki, bərabərdir. Lakin o da var ki, Yaxın Şərqdən bu ölkəyə miqrasiya edənlərin sayı artdıqca Aİ-yə antipatiya bəsləyənlərin də sırası genişlənməyə meyllənir. O üzdən analitiklər Britaniyanın Aİ-ni tərk edəcəyi fikrinə üstünlük verir. Yəqin elə Obama da məsələnin ciddiliyinin fərqinə vararaq bu ölkəyə səfər etmək qərarına gəlib.
Hər halda, bütün bu deyilənlərin fonunda ABŞ prezidentinin məsələyə yaxından müdaxilə cəhdi başadüşüləndir.
Samirə SƏFƏROVA
