Bu gün Rusiya XİN başçısı Sergey Lavrovun Ermənistana nəzərdə tutulan səfəri qalmaqalla başlayıb. Belə ki, onsuz da aprel müharibəsi uğursuzluğunun əsas səbəbkarı kimi Rusiyanı görən Ermənistan hərbi hadisəlrin dərhal ardından Lavrovun yalnız Bakıya səfər etməsini son hadisələrin əsas fiqurantı kimi Azərbaycanı qəbul etməsi kimi yozmuş və bu onu son dərəcə hiddətləndirmişdi. Üstəlik Rusiya XİN başçısınin mətbuat katibi Mariya Zaxarovanın bugünkü səfər barəsində danışarkən İrəvan əvəzinə səhvən Bakı sözünü işlətməsi ermənilərin yarasına duz basıb.
Eyni zamanda o da bəllidir ki, Ermənistan Lavrovun gəlişindən özünə sərf edən nəsə gözləmir. Çox güman, qıcıqlanmanın daha bir səbəbi də elə budur. Bəllidir ki, "Lavrov planı” Qarabağın, qismən də olsa, qaytarılmasını nəzərdə tutur və hər zaman yalnız almağa öyrəşmiş, üstəlik nazı ilə oynanmasına alışmış bu ölkə isə Lavrov variantı ilə barışmaq istəmir. Rusiyanın dəstəyindən məhrum olmasını da əlavə etsək, İrəvan bu itkilərlə heç cür barışa bulmir və o üzdən də Rusiyanı hətta tarixin o üzündə qalmış faktlarla belə suçlamaqdan çəkinmir. Elə bu günlərdə 1921-ci il hadisələrini ortaya atıb rusiyanın Ermənistandan üzr istəməli olduğunu bəyan etməsi buna ən bariz sübutdur. Rusiyanı son hadisələrdə suçlamanın daha bir səbəbi isə, erməni tərəfinin özünün dediyi kimi, onun Qarabağ tənzimləməsini "monopoliyaya almaq” cəhdidir. Bununla İrəvan həm də Qərbə üstünlük verə biləcəyinin mesajını verir. Yəni sən yiyə durmazsan, dayağı kənarda axtararam.
Artıq Lavrovun səfəri öncəsi erməni mətbuatında belə fikirlər səslənməyə başlayıb ki, Lavrovun səfəri münaqişənin tənzimlənməsinə heç nə verməyəcək. Deyilənə görə, aprel müharibəsinin ardından həmsədrlərin İrəvanda keçirdiyi mətbuar konfransında digər həmsədrlər təkliflərlə çıxış etsələr də, rusiyalı həmsədr özünə siyasi rol götürüb və bəyan edib ki, heç bir "Lavrov planı” yoxdur, sadəcə bir sıra təkliflər var. Erməni mətbuatı hazırda bu fikirləri şərh edərək yazır ki, Rysiyanın münaqişənin həllində siyasi rolu aprel müharibəsi ilə bitib və Rusiya Qafqazda dominanlığını təmin etmək üçün Azərbaycana himayə göstərməyə başlayıb. Bu yerdə isə erməni tərəfi hazırda əlində olan yeganə silahını işə salır – Daqlıq Qarabağı rspublika olaraq tanıyacağı ilə hədələyir.
Görək, Lavrovun səfərindən sonra bu ölkənin mətbuatı "hansı hava çalacaq”...
Samirə SƏFƏROVA
