Dövlət İmtahan Mərkəzinin Direktorlar Şurasının sədri Məleykə Abbaszadənin səsləndirdiyi bir ziddiyyətli fikir mübahisələrə səbəb olub.
O bildirib ki, aparılan anket sorğularının nəticəsinə görə, hər il qəbul imtahanında 600 baldan yuxarı nəticə göstərən uşaqların heç olmasa bir valideyni ali təhsillidir: “Ən yüksək nəticə göstərən məzunların nəticəsi valideynlərinin təhsilindən asılıdır. Bu elmi əsaslı faktdır".
Millət vəkili Etibar Əliyev Məleykə Abbaszadənin bu fikri ilə qəti razılaşmadığını deyib: “Dahi şəxsiyyətlərin bioqrafiyası ilə tanışlıqdan deyim ki, onların böyük əksəriyyəti uşaq vaxtı valideynlərini itiriblər. Onlar məktəb təhsilinin və valideynlərinin onlara miras qoyduqları kitabxananın ümidinə qalıblar. Ali təhsilli valideynlər uşaqlarına nəyi öyrədirlər? Onlarda yatmış istedad nişanələrini oyada bilirlərmi? Özləri və övladları üçün kitabxana qura biliblərmi? Məktəbin funksiyasını dərk edirlərmi? Fərz edək valideyn filoloqdur. Övladı təbiət elmlərini seçirmi? Yaxud riyaziyyatçının övladı riyaziyyat, yaxud fizika ixtisasını seçirmi? Bizim mentalitetdə ali təhsilli valideynlər övladlarına istiqamət verir, repetitorlara nəzarət edir və övladlarının təhsillərini normal şəkildə maliyyələşdirirlər”.
Deputat Məleykə Abbaszadəyə məsləhət görür ki, belə fikirləri səsləndirməkdənsə, Emin Əmrullayevlə birgə uşaqları məktəbə qaytarmağın yolları barədə düşünün.
DİM rəhbərinin bu fikirləri barədə digər ekspertlər nə düşünür?
Təhsil mütəxəssisi Elşən Qafarov “Bakı-Xəbər”ə açıqlamasında bildirdi ki, Dövlət İmtahan Mərkəzinin rəhbərinin bu günlərdə abituriyentlərin sosial durumu ilə bağlı verdiyi açıqlamanı təəssüf hissilə oxuyub: “Azərbaycan Respublikası hüquqi dövlətdir və Azərbaycan Respublikası hər bir vətəndaşın təhsil alma hüququnu təmin edir. Təhsil almasa belə, heç bir ayrıseçkiliyə yol verilmir. Bizim təhsilimizin vəzifəsi ondan ibarətdir ki, şagirdləri ilk növbədə şəxsiyyət və vətəndaş kimi yetişdirsin. Eyni zamanda əlavə təhsil verməklə onları əmək fəaliyyətinə, ictimai fəaliyyətə hazırlamalıdırlar. Amma bu gün abituriyentlərin sosial durumunu bu cür təhlil etmək, cəmiyyətə “yalnız oxuyan şəxsin uşağı oxumalıdır” kimi mesajlar ötürmək əks və yalniş fikir yaradır. Keçən əsrin əvvəllərindən bizim Ömər Faiq Nemanzadə, Hacı Zeynalabdin Tağıyev kimi şəxsiyyətlərimiz və digər mütəffəkirlər qadınlarımızın təhsil almasına böyük önəm veriblər. Ailədə ananın təhsilli olması doğrudan da uşağın gələcək təhsil həyatına müsbət təsir göstərir. Amma burada Məleykə xanımın açıqlaması əslində statistik bir rəqəmdir və bu şəkildə açıqlanmamalıdır. Yəni ola bilər ki, yüksək nəticə göstərənlərin ailələrinin təhsili olub. Ancaq bunu şərt kimi qoymamalıdırlar. Ola bilsin ki, bu mətbuatda da düzgün ifadə olmayıb. Ancaq istənilən halda, təhsilimizin məqsədi kimliyindən, ailəsinin oxuyub-oxumamasından asılı olmayaraq övladlara təhsil verməkdir. Bəli, doğrudan da haqlı suallar yaranır: axı bizim dövlət, ictimai xadimlərimizin, elm adamlarımızın valideynləri heç oxumamışdılar?! Oxumağın təbliğini bu şəkildə ayrıseçkilik qoymaqla aparmaq olmaz. Düşünürəm ki, ilk növbədə təhsil məktəblərinə inam, etimadın azalması məhz Dövlət İmtahan Mərkəzinin bugünkü imtahan mexanizminin acı nəticələridir. Bu gün Məleykə xanımın rəhbərlik etdiyi Dövlət İmtahan Mərkəzinin apardığı bu siyasət nəticəsində Azərbaycan məktəblərinə inam, etimad azalıb. Azərbaycanda oxuyan 1 milyon 700 min uşağın ən azı 50 - 60 faizi repetitor yanındadır. Yaxşı olar ki, bu acı statistika barədə danışsınlar”.
Məhəmmədəli QƏRİBLİ
