Firdovsi Şahbazov: “Bütün bunlar iki ölkə münasibətlərinin nə qədər gərgin olmasını göstərir”
İrəvan Rusiyanın Ermənistan məhsullarının idxalına tətbiq etdiyi məhdudiyyətlərlə bağlı Avrasiya İqtisadi İttifaqına (Aİİ) rəsmi şikayətlə müraciət edib.
Ölkənin iqtisadiyyat nazirinin müavini Tiqran Qasparyan bəyan edib ki, məsələyə yalnız Ermənistan və Rusiya arasındakı təmaslar çərçivəsində deyil, həm də bu cür ticarət maneələrinin aradan qaldırılması üçün mexanizmlərin mövcud olduğu Aİİ çərçivəsində baxılır: “Biz şikayət etmişik. Ümid edirik və əminik ki, maneələrin aradan qaldırılması üçün mexanizmlər işləyəcək. Rusiyanın tətbiq etdiyi məhdudiyyətlər Aİİ-nin prinsiplərinə və sazişlərinə uyğun deyil”.
Qeyd edək ki, “Rosselxoznadzor” mayın 22-dən Ermənistandan gül tədarükünə qadağa qoyub. Daha sonra qadağaların miqyası genişləndirilərək Ermənistanda istehsal edilən meyvə-tərəvəz məhsulları ora daxil edilib. Həmçinin Rusiya tərəfi Ermənistandan diri balıq və balıq məhsullarının idxalına məhdudiyyətlər tətbiq edib.
Sözügedən məsələni baki-xeber.com-a şərh edən iqtisad üzrə fəlsəfə doktoru Firdovsi Şahbazovun fikrincə, bütün bunlar Ermənistan-Rusiya münasibətlərinin nə qədər gərgin olmasını göstərir: “Ermənistanın bu şikayətinin Aİİ daxilində təmin ediləcəyi, Rusiya ilə bağlı hansısa tədbirlərin görülməsi real görünmür. Birincisi, Aİİ-nin yaradıcısı Rusiyadır. Məqsəd bir sıra postsovet ölkələrini Moskvanın təsir dairəsində saxlamaqdır. İkincisi, Rusiya amilinə görə üzv dövlətlərin Aİİ çərçivəsində müzakirələrdə Moskvaya qarşı mövqe sərgiləyəcəyi real görünmür. Heç bir ölkə istəməz ki, Ermənistana görə Rusiya ilə gərginlik yaşasın. Çünki Rusiya elə bir dövlətdir ki, bu kimi addımları anlayışla qarşılamaz. Üçüncüsü, bununla bağlı hüquqi mexanizmin nə dərəcədə Ermənistanın istəklərinə cavab verəcəyi də sual altındadır. Başqa bir reallıq ondan ibarətdir ki, Ermənistanda istehsal olunan kənd təsərrüfatı məhsulların ənənəvi bazarı Rusiya olub. Ermənistanın yaxın perspektivdə bunu digər bazarlarla əvəz etməsi də real görünmür. Düzdür, Avropa İttifaqı bununla bağlı Ermənistana bir sıra güzəştlər tətbiq edir. Ancaq logistika xərcləri və Ermənistanın Türkiyə ilə sərhədlərinin hələ bağlı olması həmin məhsulların Avropaya daşınmasının asan olmayacağı reallığını ortaya qoyur. Ona görə də bütün bu məsələlərin həlli Ermənistan üçün asan olmayacaq”.
Vidadi ORDAHALLI
