Sızdırılmış kəşfiyyat məlumatlarına görə, təqaüddə olan Qərbdən olan xüsusi təyinatlı qüvvələrin əməkdaşları Moskva ilə əlaqəli düşərgələrdə rus əsgərlərinə təlim keçirlər. Britaniyanın “The Telegraph” qəzetinin əldə etdiyi sızdırılmış kəşfiyyat məlumatlarında, Qərbin keçmiş xüsusi təyinatlılarının Rusiya vətəndaşları və rus hərbçilərinə Bolqarıstan və Serbiyadakı kamplarda hərbi təlimlər keçdiyi iddia olunur.
Məlumata görə, ABŞ, Böyük Britaniya, Kanada, Avstraliya və Yeni Zelandiyanın kəşfiyyat qurumları üçün hazırlanmış sənəddə Qərbdən olan keçmiş hərbçilərin Rusiya vətəndaşlarını və aktiv xidmətdə olan rus hərbçilərinin hazırlanmasına cəlb edildiyi qeyd edilir. Sənəddə üç keçmiş hərbçiyə Bolqarıstan və Serbiyada, rus əsgərlərin də olduğu hərbi təlim düşərgələrində təlimçi kimi işləmək təklif edildiyi bildirilir.
Sızdırılmış kəşfiyyat məlumatlarında Bolqarıstanın şimalında, Mejdeni bölgəsində yerləşən və Alfa-Metal şirkəti tərəfindən idarə olunduğu bildirilən hərbi təlim mərkəzinə xüsusi diqqət yetirilir.
İddialara görə, Böyük Britaniyanın SAS xüsusi təyinatlı qüvvələrinin keçmiş əməkdaşları və ABŞ xüsusi əməliyyat qüvvələrində xidmət etmiş hərbçilər təlimçi kimi burada fəaliyyət göstəriblər. Təlimçilər arasında ABŞ Hərbi Dəniz Qüvvələrinin elit Navy SEALs bölməsinin keçmiş üzvlərinin də olduğu bildirilir.
“Alfa-Metal”, özəl hərbi şirkətlərdə işləmək istəyən şəxslər, mühafizəçilər və korporativ təhlükəsizlik qrupları üçün xüsusi təyinatlı hazırlıq, eləcə də yüksək səviyyəli snayper kursları təşkil edib. Təlimlərin qiymətinin bir nəfər üçün təxminən 4 min avroya çatdığı qeyd olunur.
Keçmiş xüsusi təyinatlılardan biri rusiyalıların müharibə başladıqdan sonra da bu mərkəzdə təlim keçdiyini bildirib. Onun sözlərinə görə, şirkətdə çalışan şəxslərdən əldə edilən məlumatlar rus vətəndaşları üçün təlimlərin 2025-ci ildə də davam etdiyini göstərib. Kampda yaxın məsafəli döyüş, snayper hazırlığı və digər qabaqcıl hərbi bacarıqlar üzrə kursların keçirildiyi iddia edilir.
“The Telegraph”ın araşdırdığı “Alfa-Metal” şirkətinin internet səhifəsində təlimçilərin təqdimatları arasında SAS loqosunun göründüyü fotoşəkilin olduğu bildirilir. Şirkətin LinkedIn platformasında isə keçmiş SAS hərbçiləri üçün iş elanı yerləşdirdiyi qeyd olunur.
Elanın mətnində təcrübəli SAS təlimçisinin komandaya dəvət edildiyi və güclü əməliyyat təcrübəsinə malik Britaniya vətəndaşının axtarıldığı qeyd edilir. Sızdırılmış kəşfiyyat sənədində də təlimçilərdən ən azı birinin SAS keçmişinə malik olduğu iddia edilir.
Qəzet bu fəaliyyətləri Rusiya ordusunun Ukraynada ciddi canlı qüvvə itkiləri ilə əlaqələndirir. Qərb rəsmilərinin təxminlərinə görə, müharibənin başlanmasından bəri Rusiya ordusunun ölən və yaralanan hərbçilərinin ümumi sayı 1,4 milyona çatıb.
Bununla belə, “Alfa-Metal” “The Telegraph”ın irəli sürdüyü iddiaları rədd edib. Şirkət Ukraynada müharibə başladıqdan sonra rusiyalı vətəndaşlara təlim keçirmədiyini və keçmiş SAS üzvlərini işə götürmədiyini bildirir.
Şirkət həmçinin Sankt-Peterburqda yerləşən “Alfa Region”la əlaqəsinin olmadığını bəyan edib. Lakin “The Telegraph” “Alfa-Metal”ın internet saytında iki qurum arasında əvvəlki dövrdə “tərəfdaşlıq razılaşmasına” istinad edən səhifə aşkar etdiyini yazıb. Bundan sonra şirkət “Alfa Region”la keçmişdə “peşəkar əlaqələrinin” olduğunu etiraf edib və köhnə tanıtım materiallarının araşdırıldığını açıqlayıb.
“The Telegraph”a danışan keçmiş SAS üzvləri isə bu iddialara ehtiyatla yanaşıblar. SAS-ın yüksək rütbəli keçmiş əməkdaşlarından biri rus hərbçilərinə təlim keçən keçmiş bölmə üzvlərindən xəbərdar olmadıqlarını bildirib. Onun sözlərinə görə, SAS daxilində əlaqələr kifayət qədər sıxdır və belə bir fəaliyyət həyata keçirilsəydi, bundan xəbər tutmaları ehtimalı yüksək olardı.
Beləliklə, sızdırılmış kəşfiyyat sənədi Qərbin keçmiş xüsusi təyinatlılarının Rusiya hərbçilərinin hazırlığında iştirak edə biləcəyi ilə bağlı ciddi iddialar ortaya qoysa da, “Alfa-Metal” şirkəti bu ittihamları rədd edir, keçmiş SAS mənbələri isə məlumatların doğruluğuna şübhə ilə yanaşırlar.
Tahir TAĞIYEV
